Read gitonga Filemone 1 Bible Online

Filemone 1 - gitonga bible

Filemone 1

¹Kalata wakutuwa kwaku Paulo wamagoŵa waku Kristu Yesu, ndi Timote, mbali widu, kwaku Filemone, nkhwanjiwa yo ndi wanchitu munyidu,

²ndi kwaku Apfia mzichi widu, ndi kwaku Arkipo wankhondo munyidu, ndi ku ŵampingu ŵamu nyumba yako.

³Wezi kwaku imwe ndi chimangu kutuliya kwaku Chiuta Auskefwe ndi Ambuya Yesu Kristu.

⁴Ndimwonga Chiuta wangu nyengo zose, ndichizumbuwa mu marombu ghangu,

⁵pakuvwa chanju chako, ndi chivwanu cho we nacho ku Ambuya Yesu, ndi kwaku wose ŵakupaturika wo;

⁶Kuti masanga gha chivwanu chako ghaŵe ghakutataliya Kristu mu mziŵiru waku chose chamampha cha mwaku imwe.

⁷Chifukwa ndenga ndi chimwemwe chikuru ndi kusangaruka pa chanju chako, pakuti mitima ya ŵakupaturika yasisipuskikiya mwako, mbali.

⁸Chifukwa chenichi, chingana nde ndi wanangwa ukuru mwaku Kristu kukulanguliya cho nchakuyamu,

⁹ukongwa chifukwa cha chanju ndiŵeyere nda Paulo, mura yo, ndi sono wamagoŵa so waku Kristu Yesu:

¹⁰ndikuŵeyere pa chifwa cha mwana wangu, mweniyo ndapapa mu magoŵa ghangu,

¹¹Onesimo yo, wambura chanduku kwaku iwe kali, kweni sono wakwanduliya iwe ndi ine:

¹²mweniyo ndamwezge kwako, ndikwesa ndiyo mtima wangu:

¹³mweniyo ndakhumbanga ine kumsungiya kwaku ndamweni, alinga kuti mu malo mwako wanganditeŵete mu magoŵa gho gha evangeli:

¹⁴kweni kwambura khumbo lako kuti ndingukhumba kuchita kanthu cha, alinga kuti umampha wako ungaŵa wakuchichizga cha, kweni wakukhumba.

¹⁵Chifukwa akhumba chifukwa chenichi wangupatuskika kwako kanyengo, alinga kuti uŵe nayo muyaya;

¹⁶uli ndi muŵanda so cha, kweni wakuzungura muŵanda, mbali wakwanjiwa ukongwa viŵi kwaku ine, kweni ukongwako mbwenu kwaku iwe, muliŵavu ndi so mu Ambuya.

¹⁷Viyo asani utindesa ine nge ngwamasanga, mronde nge ndine ndamweni.

¹⁸Ndipo asani wakwanangiya kanthu, pamwenga wateuwa kanthu, kapimiye keniko kwaku ine;

¹⁹ine nda Paulo ndachilemba ndi janja langu, ndazamlipiyapo ine: kweni kuti ndikunene cha kuti pachanya napo uteuliye ine wamweni nawe.

²⁰Nadidi, mbali, ndikondwereske mu Mbuya, totole mtima wangu mwaku Kristu.

²¹Pakugomekezga mu muvwiyu wako ndakulembe, pakuziŵa kuti chingana nkhwakuruska vyo ndikamba, uchitenge.

²²Posepose napo ndirongosole pakura: chifukwa ndigomekezga kuti mu marombu ghinu ndipaskikenge kwawanangwa kwaku imwe.

²³Wakutauzga Epafra, mkoli munyango mwaku Kristu Yesu;

²⁴ndi so Marko, Aristarko, Demase, Luka, ŵanchitu ŵanyangu.

²⁵Wezi wa Ambuyafwe Yesu Kristu uŵe ndi mzimu winu. Ameni.