Read gitonga ŴaHebere 10 Bible Online

ŴaHebere 10 - gitonga bible

ŴaHebere 10

¹Chifukwa, pakuti dangu lo le ndi chizgezge cha vyamampha vyo vituza, chikozgu cheneko cha vinthu vyo cha, muyaya liuravi nthazi ndi visopu vyenivyo pe, vyo chirimika ndi chirimika ŵapereke rutaruta, kuŵafiska ŵakuŵandikako.

²Iku asi mphanyi visopu vyenivyo vingureka kuperekeka chifukwa ŵakusopa, pakuphotoleka limu, mphanyi ŵanguwuravi njuŵi ya vilakwa?

³Kweni mu visopu vyenivyo mwe chinkhumbo cha vilakwa chirimika ndi chirimika.

⁴Chifukwa ndopa za zinkhuzi ndi zimbuzi zambura nthazi kutuzgapo vilakwa.

⁵Ndipo viyo, Kristu wachiza mu charu, watiti, “Sembe ndi mpasku kuti mungukhumba cha, kweni liŵavu mwandirongosole;

⁶mu sembe zakocha ndi mu mpasku wapa vilakwa kuti mungukondwere cha.

⁷Sono ndinguti, ‘Awona, ndaziya mu chizinga cha buku kwalembeka paku ine kwachichita khumbu linu, Achiuta.’”

⁸Pachanya po watiti, “Sembe ndi mipasku, ndi mipasku yakocha, ndi mipasku yapa vilakwa kuti mungukhumba cha,” chingana nkhuti mungukondwere mwenimo cha (vyenivyo vyaperekeka uli ndi dangu lo);

⁹sono watiti, “Awona, ndaziya kwachichitakhumbu linu.” Watuzgapo chakudanga cho, alinga kuti wamiske chachiŵi cho.

¹⁰Mu khumbu lenilo to ŵakupaturikiya mu kaperekedu ka liŵavu lo laku Yesu Kristu kamoza limu.

¹¹Ndipo nadi mzukuru yose watuma zuŵa ndi zuŵa pakumiriya ndi kupereka sembe zenizo pe nyengo zinandi, zo muyaya zilive nthazi kutuzgapo vilakwa:

¹²kweni mwenuyu, wanguti wapereka sembe yimoza yapa chifukwa cha vilakwa, wangujariya pasi ku marghe ghaku Chiuta muyaya;

¹³kwamba penipo wakulereze mpaka wamawongu wake waŵikika kuŵa chitengu cha marundi ghake.

¹⁴Pakuti mu sembe yimoza wafiskiya muyaya wo mbakupaturika.

¹⁵Ndipo watisimikizgiya Mzimu Wakupaturika nayo, pakuti pavuli pa kukamba,

¹⁶“Ichi nchipangano cho nkhachitanga nawo pavuli pa mazuŵa gho, atiti Ambuya: Nkhaŵikanga marangu ghangu mu mitima yawo, ndipo pa njuŵi zawo ndighalembenge.”

¹⁷Ndipo sono watiti, “Vilakwa vyawo ndi mauchikana marangu ghawo kuti ndikumbukenge so cha.”

¹⁸Kweni po pe chireke chaku vyenivyo, kuti uripo so cha, mpasku pa chifukwa cha vilakwa.

¹⁹Viyo, mwa ŵabali, pakuŵa nacho chigomezgu chakwachisere mu malo ghakupaturika mu ndopa zaku Yesu,

²⁰ndi nthowa yeniyo watipatuliskiya, yifya ndi yamoyo, mu chijaru cho, ndicho liŵavu lake,

²¹ndipo pakuŵa ndi mzukuru mura pa nyumba yaku Chiuta,

²²tiŵandikiye ndi mtima weneko mu uzali wa chivwanu, ŵakumijirika kuchiri ku mitima yidu kutuwa ku njuŵi yiheni, ndi ŵakusambiskika kuchiri ku liŵavu lidu ndi maji ghakutowa,

²³tikoreske chizomerezga chambura kupetere cha chigomekezgu; chifukwa ngwamagomekezgeka yo wangupangana:

²⁴ndipo tipimirane kwachikhu ŵirizgiyana ku chanju ndi ku nchitu zamampha;

²⁵kwambura kujowo unganu waku taŵeni, uli nkharusu ka ŵanyake, kweni ŵakuchiskana; ndipo ukongwa viŵi po muwona kuti zuŵa lo liŵandika.

²⁶Chifukwa asani tilakwiya ncheni pavuli pa kuronde mziŵiru wa uneneska wo, kuti ujako so cha mpasku wapa chifukwa cha vilakwa,

²⁷kweni chilereze chakofya chakuti e cha cheruzgu, ndi ukari wa moto wo upirizgenge wamawongu wo.

²⁸Munthu wakukana dangu laku Mosese watufwa kwambura lisungu pa chisimisimi cha ŵakeboni ŵaŵi pamwenga ŵatatu:

²⁹mughanaghana kuti weruzgikenge nge ngwakwenere chilanga chikuru chauli, yo wakandirizga pasi Mwana waku Chiuta yo, ndi wazipima ndopa za chipanganu, mwaku zo wangupaturikiya, chinthu chaŵaka, ndi wayuyuwa Mzimu wa wezi?

³⁰Chifukwa timziŵa yo wanguti, “Thayu ndangu, ine ndamwerezgiyapo.” Ndipo so, “Mbuya weruzgenge khamu lake.”

³¹Nkhwakofya kuwa mu manja ghaku Chiuta wamoyo.

³²Kweni mujikumbuske ndi mazuŵa ghakundanga, mwenimo, munguti mwangweuskika, mungukunthiyapo mlimbalimba ukuru wa vikomwa,

³³panyake, pakuŵa chakuwoniyapo mu matozu ndi so masuzgu; ndipo panyake pakusazgana nawo ŵakukomwa viyo.

³⁴Chifukwa mungufwiya so lisungu ŵamagoŵa wo, ndipo mungukunthiyapo kwakukondwa muskowu wa viŵetu vinu, pakuziŵa kuti mwaŵeni mwe ndi chiŵetu chamamphako ndi chakujaririya.

³⁵Viyo mungataya cha chigomekezgu chinu, cho che nayo mphotu yikuru.

³⁶Chifukwa mutanere kukunthiyapo, alinga kuti, mwati mwachita khumbu laku Chiuta, mungaronde phanganu lo.

³⁷“Chifukwa kachalipo kanyengo kamanavikeni, ndipo yose wakuza wazenge, ndipo kuti wakaziwulikanga cha.

³⁸Kweni murunji wangu yo mu chivwanu wajariyenge wamoyo: ndipo asani wawere vuli umoyo wangu kuti ukondwere mwake cha.”

³⁹Kweni ifwe kuti te ŵakuwele vuli cha ku wanangiku, kweni ŵa chivwanu ku utaski wa mzimu.