Read gitonga ŴaHebere 13 Bible Online

ŴaHebere 13 - gitonga bible

ŴaHebere 13

¹Kwanja ŵabali kwinu kujaririyenge.

²Mungaruwirizga kwanja ŵalendo nako; chifukwa viyo ndimo ŵanyake ŵangurondere ŵangelo ŵakuseŵe nawo kwambura kuŵaziŵa.

³Kumbukani ŵamagoŵa wo ulimba kumangikiya pamoza nawo; kumbukani wo mbakuchitikiya uheni, pakuti namwe so mwe muliŵavu lo.

⁴Nthengwa yiŵe yaulemu mwaku wose, ndipo chita chiŵe chikhovu: chifukwa ŵareŵi ndi ŵarowozi waŵeruzgenge Chiuta.

⁵Nkharu yinu yingaŵanga yakwanja ndrama cha; mukhorwe ndi vyo mwe navyo; chifukwa wanguti mweneko, “Kuti ndamleka iwe cha, chingana nkhuti ndamsiya iwe cha kosekose.”

⁶Viyo ifwe taŵakuchintha mtima tititi, “Mbuya ndi Movya kwaku ine; kuti ndopenge cha: munthu wandichitiyenge chine?”

⁷Kumbukani ŵarongozgi ŵinu, ŵeniwo ŵangukamba namwe mazu ghaku Chiuta, ghanaghanani ndi vipasi vya umoyo wawo, mwezge chivwanu chawo.

⁸Yesu Kristu zana ndi le ndi mweniyo pe, ndi so ku muyaya.

⁹Mungalongozgeka ndi visambizgu vyamtundumtundu ndi vilendo: chifukwa nkhwamampha kuti mtima ukhozgeke ndi wezi; ndi vyakurgha cha, mwenimo ŵakutangwanikamo kuti ŵangawovyeka kanthu cha.

¹⁰Te nacho chisoperu, paku chenicho ŵalive mtufu kurghapo ŵeniwo ŵachiteŵete chihema.

¹¹Chifukwa vitocheke kubwaro ku ugoŵi vitanda vya vinyamandopa zaku vyo zitoleke mu malo Ghakupaturika ndi mzukuru mura nge ndi sembe yapa ulakwi.

¹²Viyo so Yesu nayo, alinga kuti wapaturiye khamu mu ndopa zaku yija, wangukomwa kubwaro ku ugoŵi.

¹³Viyo nafwe tituliye kubwaro ku ugoŵi ŵakupinga tozu lake.

¹⁴Chifukwa panu tirive muzi wakujaririya, kweni tiupenja wo utuza.

¹⁵Viyo mwaku iyo tipereke kwaku Chiuta rutaruta sembe yakuthamikiya, ndiyo chipasi cha milomo yakuzomerezga Zina lake.

¹⁶Ndipo kuchita umampha ndi kusangana kwawezi mungaruwanga cha: pakuti ndi visopu vyaviyo Chiuta wakondwereskeka ukongwa.

¹⁷Vwiyani ŵarongozgi ŵinu, ndipo ŵatheriyeni: chifukwa iwo ŵalindiya pa chifwa cha mizimu yinu, uli mbeniwo ŵamkamba likonkhoska; alinga ŵalichite ndi chimwemwe, ndipo ndi kudinginika cha: chifukwa chenichi chingaŵiya imwe chambura chanduku.

¹⁸Rombani pa chifwa chidu: pakuti tikopeka kuti te nayo njuŵi yamampha, taŵakukhumba mwaku vyose kuja umampha.

¹⁹Ndipo ukongwa viŵi ndikuchiskani kuchita chenichi alinga kuti ndiwezgeke ruŵiruŵi kwaku imwe.

²⁰Ndipo Chiuta iyo wa chimangu, mweniyo wangumyuska ku ŵakufwa Mliska yo Mura wa mberere mu ndopa za chipanganu chamuyaya, ndiyo Ambuyafwe Yesu,

²¹wakongoreske imwe ku mlimu wose wamampha, kwachichita khumbu lake, ndi watataliye mwaku imwe cho nchakukondweska paurongo pake, mwakuYesu Kristu; kwaku mweniyo kuŵiyenge unkhankhu muyaya-muyaya, Ameni.

²²Kweni ndikuchiskani, mwa ŵabali, junthiyanipo mazu gha chichiska cho; pakuti ndakulembiyani ndi mazu ghakuŵerengeka.

²³Ziŵani kuti mbali widu Timote wafwatulika; pamoza ndi mweniyo, asani wazenge ruŵi, ndazamkumuwonani.

²⁴Tauzgani ŵarongaozi ŵinu wose, ndi wose ŵakupaturika wo. Wo ŵaku Italia ŵakutauzgani.

²⁵Wezi uŵe ndi imwe mose, Ameni.