Read gitonga ŴaHebere 3 Bible Online

ŴaHebere 3 - gitonga bible

ŴaHebere 3

¹Viyo na, mwa ŵabali ŵakupaturika, ŵasambazi ŵa mdanu wakuchanya, pimani wakutumika yo ndi Mzukuru Mura wachizomerezgu chidu, Yesu;

²yo wenga wamagomekezgeka kwaku yo wangumsankha, uli ndimo Mosese nayo waŵiyanga mu nyumba yake yose.

³Chifukwa mwenuyu wapimika wakwenere unkhankhu wakuruska ukongwaku kwaku Mosese, uli ndimo yo wazenga nyumba waliri ndi thamu likuruku ku nyumba.

⁴Chifukwa nyumba yose yizengeka ndi munthu wakuti: kweni wakuzenga vyose ndi Chiuta.

⁵Ndipo Mosese nadi wenga wamagomekezgeka mu nyumba yake yose nge ngwakuteŵeta, kuti waŵe kaboni waku vyo vitakambikanga;

⁶kweni Kristu nge ndi mwana, pa nyumba yake; nyumba yaku mweniyo ndifwe, asani tikoreska chiganga chidu ndi chitumbwa cha chigomekezgu chidu gwa mpaka umari.

⁷Viyo na, uli ndimo wanene Mzimu Wakupaturika, “Le asani muvwenge liu lake,

⁸mungangangamiskanga mitima yinu, uli ndi mu chigaruka cho, nge ndi mu zuŵa la kesedu ko mu bozwa,

⁹keniko auskemwe ŵangundesa, ndipo ŵanguwona machitidu ghangu virimika machumi ghanayi.

¹⁰Viyo na ndingukaraliskika nayo mphapu yeniyi, ndipo ndinguti, ‘Rutaruta ŵarandiyarandiya mu mitima yawo: kweni iwo kuti ŵanguziŵa cha nthowa zangu.’

¹¹Uli ndimo ndingurapiya mukandundu kangu, kuti ‘Wamsere cha mu chipumulu changu.’ ”

¹²Cheŵani, mwa ŵabali vinu kokuli mu yumoza waku imwe uŵenge mtima uheni wambura chivwanu, mu kudezukako kwaku Chiuta wamoyo.

¹³Kweni chiskanani zuŵa ndi zuŵa kweche kuzumbulika “Le,” vinu yumoza waku imwe wangangangamiskika ndi fuvyu la ulakwi:

¹⁴chifukwa taŵa ŵasangazi ŵaku Kristu, asani tikoreska chandiru cha chigomekezgu chidu nganganga mpaka umari;

¹⁵po kweche kukambika kuti, “Le, asani muvwenge liu lake, mungangangamiskanga mitima yinu, uli ndi mu chigaruka cho.”

¹⁶Kumbi mbayani wo, ŵanguti ŵavwa ŵangugaruka? Asi ndi wose wo ŵangutuwa ku Egipiti ndi Mosese?

¹⁷Ndipo mbayani wo ŵanguŵatundiriya virimika machumi ghanayi? Asi mbakulakwa wo, vyaku ŵeniwo vitanda vinguwa mu buzwa lo?

¹⁸Ndipo mbayani wanguŵarapiya kuti ŵangasere cha muchipumulu chake, kweni ku ŵamtafu wo?

¹⁹Ndipo tiwona kuti ŵanguwuravi nthazi kwachisere chifukwa chakuŵavi chivwanu.