Read gitonga ŴaHebere 5 Bible Online

ŴaHebere 5 - gitonga bible

ŴaHebere 5

¹Chifukwa mzukuru mura yose, wakusankhika mu ŵanthu, waŵikikiya pa chifwa cha ŵanthu mu vinthu vya kuchiri kwaku Chiuta, alinga kuti waperekenge mipasku ndi visopu pa chifwa cha vilakwa.

²Mweniyo wangaziŵa kukunthiyapo kwachitima ndi ŵajira ndi ŵakuranda, pakuti iyo nayo wakwetereka ndi unthomboru;

³ndipo chifukwa chenichi watene, uli mpha khamu lo, viyo so paku iyo mweneko, kupereke chifukwa chavilakwa.

⁴Ndipo palive munthu wajitole mlimu uwu waulemu, kweni yo ngwakudanika ndi Chiuta, uli ndimo wangudanikiya Aroni.

⁵Viyo so Kristu nayo kuti wangujikakankhuska kuŵa Mzukuru mura cha, kweni ndiyo wangumkambiya, “Ndiwe, Mwana wangu, ine le ndakupapa”;

⁶uli ndimo so wakambiya panyake, “Ndiwe Mzukuru ku muyaya, mwa ndondomeku yaku Melkizedeke.”

⁷Mweniyo mu mazuŵa ghake ghaliŵavu, wanguti wapereke, ndi Mubobotu wanthazi ndi masozi, maniniziku, maŵeyerero, kwaku yo wenga ndi nthazi kumtaska kunyifwa, ndipo wanguvwika pa chifwa cha uwopa Chiuta wake.

⁸Chingana wenga Mwana, wangusambira mvwiyu mwaku vyo wangukomwa;

⁹ndipo wanguti wafiskika wanguŵaŵiya wose ŵakumvwiya chata wa utaski wamuyaya;

¹⁰pakutamulika ndi Chiuta Mzukuru Mura mwa ndondomeku yaku Melkizedeke.

¹¹Ghapaku mweniyo te nagho mazu ghanandi kukamba, gho nganononu kung'anamuwa, pakuti mwaŵa ŵakudodoma kutegherezga.

¹²Chingana pa nyengo iyi mukhumba kuŵa ŵasambizgi kweni mukavuka yumoza kukusambizgani so mitendeku ya chiyambu cha mazu ghaku Chiuta; ndipo mwaŵa ŵakukavuka mkaka, ndi chakurgha chakukhoma cha.

¹³Chifukwa yose wakujilera ndi mkaka ngwambura kuziŵiriya mazu gha urunji, pakuti ndi litema.

¹⁴Kweni chakurgha chakukhoma ncha ŵara, ŵeniwo mu kupiripita ŵe ndi vinjeru vyawo vyakurongosoleka kuteska chamampha ndi so chiheni.