Read gitonga ŴaHebere 9 Bible Online

ŴaHebere 9 - gitonga bible

ŴaHebere 9

¹Kweni chingana nchipanganu nacho chakudanga chinguŵa ndi miteŵetu ya chisopa, ndi so nyumba yakupaturika yapa charu.

²Chifukwa chingurongosoleka chihema, chakubwaro cho, mwenimo mwenga chikoleru-nyali cho, ndi gome lo, ndi viŵande vyo vyasembe; ndicho chizumbulika Malo Ghakupaturika.

³Ndipo parweka pa chijaru chachiŵi, chihema cho chizumbulika Malo Ghakupaturika gha Ghakupaturika;

⁴chakuŵa ndi chisoperu cha golide chachema, ndi bokosi lo la chipanganu lakumatika kosekose ndi golide, mwaku lenilo mwenga msuku wa golide mwaku wo mwengamana, ndi ndodo yo yaku Aroni yo yatundanga, ndi viŵaraŵaja vyo vya chipanganu;

⁵ndi pachanya pake wakerubi ŵa unkhankhu, ŵakuvimba chitengu chalisungu cho; paku vyenivyo kuti tingakambiya payijapayija sono cha.

⁶Ndipo vyati vyarongosoleka viyo vinthu vyenivyo, ŵazukuru ŵasere rutaruta mu chihema chakubwaro cho pakutata milimu;

⁷kweni mu chachiŵi cho wasere mzukuru mura yo yija, kamoza mu chirimika, wambura ndopa cha, zenizo wapereke pa chifukwa chaku iyo mweneko ndi chifukwa cha maubudi gha khamu lo.

⁸Mzimu Wakupaturika nayo wakusimikizga chenichi, chakuti nthowa ya ku malo ghakupaturika yindarongoleke, cheche kuma chihema chakudanga oho,

⁹chenicho ndi ntharika ku nyengo ya sono; kwakulingana ndi yeniyo ntharika mipasku ndi so visopu viperekeka, vyambura nthazi kumkongoreska wakusopa, kuchiri ku njuŵi,

¹⁰pakuŵa mu vyakurgha ndi vyakumwa ndi masambidu ghamtundumtundu malangulu ghanyama pe, ghakuŵikika mpaka nyengo yakukongore.

¹¹Kweni Kristu, pakuza ngendi mzukuru mura wa vinthu vyamampha vyakukhasa kuza, mu chihema cho chikuruka ndi chakufiskikaka, chakwatika ndi manja cha, ndikwesa kuti, cha kalengekedu kano cha, chingana ndi mu ndopa za vyaphongu ndi matholi cha, kweni mu ndopa zaku Yija.

¹²Wangusere kamoza mu Malo Ghakupaturika, wati waronde uwombozi wamuyaya.

¹³Chifukwa asani ndopa za mbuzi ndi nkhuzi, ndi choto cha thokazi vyakumijiya pa ŵakukazuzgika, vipatuliskiya ku chiphoto cha liŵavu:

¹⁴uli ukongwako ndopa zo zaku Kristu, mweniyo mu Mzimu Wamuyaya wangujipereka wambura kalema kwaku Chiuta, zitozgenge njuŵi zinu ku nchitu zakufwa kwachiteŵete Chiuta wamoyo?

¹⁵Ndipo pa chifukwa chenichi ndiyo mwendapakati wa chipanganu chifya, viyo kuti yati yaŵapo nyifwa yakwachipepeske pa maujumphi ghapa chipanganu chakudanga wo ŵadanika ŵarondenge phanganu lo la chihara chamuyaya cho.

¹⁶Pakuti po pe chipanganu cha chirawu, yikateskekanga nyifwa ya wakuchichita.

¹⁷Chifukwa chirawu nchanthazi po pe nyifwa: pakuti nchakukho cha weche wamoyo yo wanguchikamba.

¹⁸Chifukwa chenichi chingana nchipanganu chakudanga cho kuti chinguserezgeka kwambura ndopa cha.

¹⁹Pakuti lati lakambikiya ndi Mosese ku khamu lose langulu lose mwa dangu, wanguto ndopa zo za matholi ndi vyaphongu pamoza ndi maji ndi thonji lakuchesama ndi husope, ndipo wangumijiya buku nalo ndi so khamu lo lose,

²⁰wakuti, “Izi ndi ndopa zo za chipanganu chenicho Chiuta wangulanguliya imwe.”

²¹Ndipo kwakulingana so wangumijiya ndi ndopa zo chihema cho ndi viyaŵi vyose vyaku teŵete.

²²Ndipo mwa dangu lo viŵiviŵi vyose viphotoleka ndi ndopa, ndipo kwambura kudika ndopa chireke palive.

²³Viyo kungukhumbikwa kuti vikozgu vyaku vyo vyamu machanya vitozgeke ndi vyenivi, kweni vinthu ivyo vyeneko vyamumachanya ndi visopu vyakuzungura vyenivi.

²⁴Chifukwa Kristu walive kusere mu malo ghakupaturika ghakwatika ndi ŵanthu, cho nchikozgu cha malo gheneko. Kweni wanguruta kuchanya iko, kweniko sono wawoneka paurongo paku Chiuta pa chifwa chidu:

²⁵chingana nkhuti panandi wangujipereka cha; uli ndimo mzukuru mura waserere mu Malo Ghakupaturika chirimika ndi chirimika ndi ndopa zo kuti zake cha;

²⁶iku wangwenere kukomwa panandi kutuwa ku kujarikika kwa charu; kweni sonu kamoza pa umari wa migonezi warongoleka kwachituzgiya maulakwi mu chisopu chaku iyo yija.

²⁷Ndipo uli ndimo kutemeke ŵanthu kufwa kamoza, kweni pavuli pake kweruzgika,

²⁸viyo Kristu nayo, wati waperekeka kamoza kwachinyamuliya vilakwa ŵanandi, wamwoneka kachiŵi, kwambura maulakwi, ku ŵakumlereze, kwachiŵataska.