Read gitonga Yakobe 2 Bible Online

Yakobe 2 - gitonga bible

Yakobe 2

¹Mwa ŵabali ŵangu, mungaŵa nacho mu urumba chisku cha chivwanu cha Ambuyafwe Yesu Kristu, Mbuya wa Unkhankhu wo.

²Chifukwa asani waserenge mu sinagoge linu munthu wa mphete yagolide, wakuvwara vyachiŵaliŵali, ndipo so waserenge mkavu nayo wakuvwara vyachisokwa:

³ndipo mulereskengepo paku yo wavwara chivwaru chachiŵaliŵali, ndi kunena nayo, “Uje iwe panu pamampha,” ndipo ku mkavu yo munenenge, “Ima kweniko iwe,” pamwenga, “Ja msina mu chitambaliru changu”;

⁴asi mwagaukana mwaku mwaŵeni, ndipo mwaŵa ŵeruzgi ŵa marunguruku ghaheni?

⁵Vwani, mwa ŵabali ŵangu ŵakwanjiwa, asi Chiuta wajisankhiya ŵakavu mu charu kuŵa ŵasambasi mu chivwanu, ndi ŵakuhara ufumu weniwo wangupangana ku ŵakumwanja?

⁶Kweni imwe muyuyuwa mkavu yo. Asi mbasambasi wo ŵasuzga imwe, ndi ŵakuguziyani iwo ku mphara zakwe uzgiya?

⁷Asi ndiwo ŵatokoska zina lo lakutowa lenilo lingudanika paku imwe?

⁸Kweni asani mulifiska dangu laufumu, kwakuyana ndi lembo lo, “Wanjenge mwanase wako uli ndi wamweni,” muchita umamphavi:

⁹kweni asani mulondo chisku, muchitachilakwa, ndi mupanikizgika ndi dangu lo nge mbajumphi.

¹⁰Chifukwa yose yo wakorezenge dangu lose, kweni waguŵenge mu limoza, waŵa wakalema mwaku ghose.

¹¹Chifukwa mweniyo wanguti, “Ungareŵa cha,” wanguti so, “Ungabayanga cha,” Ndipo asani ureka kureŵa, kweni ubaya, waŵa mbudi pa chilangulu.

¹²Viyo ndipo kambani, ndi chitani, nge mbeniwo ŵeruzgikenge ndi dangu la wanangwa.

¹³Chifukwa cheruzgu nchambura lisungu ku wakureka kuchita lisungu: ndipo lisungu litumbwiya pa cheruzgu.

¹⁴Chitovya uli, mwa ŵabali ŵangu, asani munthu wanenenge kuti we nacho chivwanu, kweni wauravi milimu? Kumbi chivwanu cho nchanthazi kumtaska?

¹⁵Asani mbali pamwenga mzichi ngwankhuli, ndi wasauka chakurgha cha zuŵa ndi zuŵa,

¹⁶ndipo yumoza wamwaku imwe wanenenge kwaku wo, “Mukenge mu chimangu, mufundiskike ndi mugutiskike”; kweni mureka kuŵapaskavyo vikhumbikwa ku liŵavu, chitovya chine?

¹⁷Viyo chivwanu mwakucho, asani chirive milimu nchakufwa mwaku chija.

¹⁸Kweni wakambenge yumoza, “Iwe wenacho chivwanu, ndipo ine nde nayo milimu”; ndirongo chivwanu chako pade pa milimu yako, ndipo ine mu milimu ndikurongonge chivwanu changu.

¹⁹Iwe uvwana kuti walipo Chiuta Yumoza; uchita umampha: wademone wavwana, ndipo wambwambwanthiya.

²⁰Kweni unkhumba kuziŵa ati, wamunthu we wambughuya, kuti chivwanu pade pa milimu nchaŵaka?

²¹Asi Abrahamu auskefwe wangurunjiskikiya mu milimu, wachipereka Yisaki, mwana wake, pa chisoperu cho?

²²Uwona kuti chivwanu chake chingutataliya pamoza ndi milimu yake, ndipo mu milimu yake chivwanu chake chingufiskika,

²³ndipo linguzazika lembo lo lakuti, “Ndipo Abrahamu wanguvwana mwaku Chiuta, ndipo kungumpimikiya nge mburunji,” ndipo wangutamulika bwezi laku Chiuta.

²⁴Muwona kuti mu milimu munthu warunjiskika, ndi mu chivwanu pe cha.

²⁵Kwakulingana nako asi Rahabi, mureŵi yo, wangurunjiskikiya mu milimu pakuronde nthumi zo, ndi kuzituzgiya mu nthowa yinyake?

²⁶Chifukwa uli ndimo liŵavu lo pade pa mzimu ndakufwa, viyo chivwanu nacho pade pa milimu nchakufwa.