Read gitonga 1 Petro 5 Bible Online

1 Petro 5 - gitonga bible

1 Petro 5

¹Viyo ndichiska ŵara ŵamwaku imwe, ine ndamura munyawo, ndi kaboni wa vyakukomwa vyaku Kristu, ndamsangazi so wa unkhankhu wakukhasa kuvumbulika:

²liskani muskambu waku Chiuta wo we mwinu, pakuulereze kwakupemberezgeka cha, kweni kwakukhumba, kwakuyana ndi kukhumba kwaku Chiuta; kwaupiripiri nako cha, kweni kwaphamphu;

³uli mbakutufuliya vigaŵa vinu nako cha, kweni pakuŵa vikozgu vya ku mskambu wo.

⁴Ndipo wachirongoleka Mliska mura yo, mwamronde ndumbu yambura mafoteka ya unkhankhu.

⁵Mwaŵamanako, kwakulingana, therani ku ŵara. Ndipo mose ku ŵanyinu mujichinyiriye ndi kujiyuyuwa mtima, pakuti, “Chiuta wamikana ndi ŵakujana, kweni wapaska wezi ku ŵakujiyuyuwa.”

⁶Viyo mujiyuyuliye kusi ku janja laukumu laku Chiuta, alinga kuti wamtumphuskeni ku nyengo yakwenere,

⁷pakupong'a paku iyo kweŵeku linu lose, pakuti waphwere imwe.

⁸Zizani, khazgani: diaboloyo, mphindikwa yinu, uli ndi nkharamu yakukoroma, wayingayinga ndi kupenja mweniyo wakamphe.

⁹Mikiranani nayo ndi kukhwima mu chivwanu chinu, pakuziŵa kuti vyakukomwa vyenivyo pe vifiskikiya mu ŵabali ŵinu ŵamu charu.

¹⁰Ndipo Chiuta wa wezi wose, mweniyo wangumdaniyani ku unkhankhu wake wamuyaya mwaku Kristu Yesu, mwati mwakomwapo kamanavi, mwenecho wafiskenge, wakhozgenge, wakhomeskenge imwe.

¹¹Kuŵiye iyo ukumu muyaya-muyaya. Ameni.

¹²Ndi Silvano, mbali wamagomekezgeka, mo ndimpimiya, ndalemba kwinu ghawida, kuchiska ndi kusimikizga kuti wenuwu mbwezi wenecho waku Chiuta: mwaku wo miyani nganganga.

¹³Yo wamu Babiloni wakusankhikiya pamoza namwe, wakutauzgani ndi Marko mwana wangu.

¹⁴Tauzganani ndi mfyofyonthu wa chanju. Chimangu chikuŵiyeni mose mwaku Kristu.