Read gitonga 2 Petro 2 Bible Online

2 Petro 2 - gitonga bible

2 Petro 2

¹Kweni so ŵanguŵa mu khamu lo ŵamchimi ŵatesi, uli ndimo mwaku imwe namwe muŵiyenge ŵasambizgi ŵatesi, ŵeniwo ŵaserengemu kwaudeke ndi mipambuku yakwananga, ndi kumkana Mweneko yo wanguŵawombo, ndi kujitole viyo kunanga kwa paruŵi.

²Ndipo ŵanandi ŵalondonge mauyaya ghawo; pa chifwa chaku ŵeniwo nthowa yo ya uneneska yikatokoskekanga.

³Ndipo mu chiŵinu ndi mazu ghafuzi ŵakachitiyanga mwinu chanduku; chisusa paku ŵeniwo kutuliya ku mwaka chiura kukotoka, ndi wanangiku wawo uwura kugompho.

⁴Chifukwa asani Chiuta wengavi kulekerezga ŵangelo wo ŵangulakwa, kweni, pakuŵatayiya ku Gehena kumagoŵa gha munkhorwi, wanguŵakombole kusungirizgikiya ku cheruzgu,

⁵ndipo wengavi kulekerezga charu chapa mtendeku, kweni wangusungirizga Nowa yo wangumemeza urunji, pamoza ndi ŵanyake ŵankhonde ndi ŵaŵi, wachitole chazandi pa charu cha ŵambura kopa Chiuta;

⁶ndipo pakunyekeska mizi yaku Sodomu ndi Gomora, wangweruzga yo ndi kuyigadabuwa, ndipo wanguyiŵika nge nchichenjezgu kwaku wo ŵanguŵa ŵambura kopa Chiuta;

⁷ndipo wangumtaska Lote murunji yo, mweniyo wasuzgikanga ukongwa ndi kajaridu kaheni ka ŵachikana marangu wo,

⁸(chifukwa murunji mweniyo wachija mukati mwawo, pakuwona ndi pakuvwa, zuŵa ndi zuŵa wasuzganga mzimu wake urunji, ndi nchitu zawo zambura dangu).

⁹Mbuya waziŵa kutaska ŵakopa Chiuta me kesedu, ndi kuŵasungirizga ŵaheni wo ŵalindizgikiya zuŵa la cheruzgu,

¹⁰kweni ukongwa wo mbakwende mu nyama mu ulakalaka wa ukazuzi, ndi mbakuyuyuwa mtufu. Ŵachiganga wo, ŵakajivwiyi, ŵalive chitenthe ŵachinanga pa vyaunkhankhu:

¹¹kweni ŵangelo, chingana mbaraku mu ukhomi ŵalive kutole paurongo paku Chiuta chisusa chitokosi paku vyo cha.

¹²Kweni yaŵa, nge ndi vyamoyo vyambura chinjeru, vyakawi vyakupapikiya kwachikoleka ndi kwanangika, pakunanga paku vyenivyo kureka kuziŵa, mu chivuzi chawo ŵanangikenge mbwenu,

¹³ndi kulangika ndi mphotu ya ulakwi. Ŵapima ujira wa msana uli ndi likondwa, ŵakufipa ndi ŵamidoko, ŵakulakwa mu fuzi zawu ŵachirgha pamoza namwe!

¹⁴Pakuŵa ndi maso ghakuzara urowozi, ghambura matunika mu ulakwi; pakuŵa ndi mtima wakutakatakiya mbunu, ŵanyengere mizimu yakuyaghayika.

¹⁵Mbana ŵakutembeka; pakusiya nthowa yakurunjika, ŵarandizgika mu kurondo karusu kaku Balamu, mwana waku Beori, mweniyo wangwanja mphotu ya uwura urunji;

¹⁶kweni wanguchenyeka pa uchikana marangu wake; mbunda yambura mazu, yingurongoro ndi mazu gha munthu, yingurekeska uzereza wa mchimi yo.

¹⁷Yaŵa ŵe visima vizira maji, nyankhuŵinda wakuputiskika ndi chimphunga; mbanthu kwaku ŵeniwo ŵasungirizgikiya koyoyu wa mdima.

¹⁸Chifukwa pakukamba vya umbughuya, ŵanyengere mu maulakalaka gha liŵavu, mu mauyaya, ŵeniwo ŵafyanthamuka pamanavi ku ŵakujariya mu urandizgi;

¹⁹ŵapangana nawo wanangwa, penipo iwo ŵeneko mbaŵanda ŵa marusu ghakubwanganduwa. Pakuti ndi chenicho munthu wathereskeka, kwaku chenicho watoleke mu uŵanda.

²⁰Chifukwa asani, wati wathaŵa maukazuzi gha charu mu chiziŵiru cha Ambuyafwe ndi Mtaski Yesu Kristu, pakuwiramo so mwaku ghenigho, wathereskeka, vyakumariya vyaŵaŵiya viheniku kwakuruska vyakudanga vyo.

²¹Chifukwa kwenga kwamamphaku kwaku wo kuura kuyiziŵiska nthowa yo ya urunji, kwakuruska kuti, ŵati ŵayiziŵa, ŵanyongokeko ku dangu lakupaturika lo, lakuperekeka kwaku wo.

²²Chaŵaŵiyacho cha nthanthi yakuneneska, “Garu wawereko ku bukuzi lake, ndipo nkhumba yisamba kwachikunkhuruka mu urambwi.”