Read gitonga Ŵeruzgi 10 Bible Online

Ŵeruzgi 10 - gitonga bible

Ŵeruzgi 10

¹Pavuli paku Abimeleke kunguyuka ŵakuwombo Yisraele Tola mwana waku Pua, mwana waku Dodo, mwina Isakara; wajanga pa Shamiri mu charu cha mitunthu chaku Efraimu.

²Ndipo iyo wangweruzga Yisraele virimika machumi ghaŵi ndi vitatu (23). Pavuli wangufwa, ndipo wanguŵikika pa Shamiri.

³Pavuli paku iyo wanguyuka Jairi mwina Gileada, mweniyo wangweruzga Yisraele virimika machumi ghaŵi ndi viŵi (22).

⁴Wenga ndi ŵana ŵanthurumi machumi ghatatu (30) wo ŵakweranga pa mbunda machumi ghatatu (30); ndipo wenga ndi misumba machumi ghatatu (30), yakudanika Havotiyairo mpaka zuŵa lino, wo ŵemu charu cha Gileada.

⁵Ndipo Yairo wangufwa, wanguŵikika mu Kamono.

⁶Ndipo ŵaYisraele ŵanguwerezgapo kuchita uheni mu maso gha Ambuya, ŵangutataliya ŵaBala, ndi Ashitaroto, ŵachiuta ŵa Siriya, ŵachiuta ŵa Sidoni, ŵachiuta ŵa Moabu, ŵachiuta ŵa Amori, ndi ŵachiuta ŵa ŵaFilisti; ndipo ŵangujowo Ambuya, ndi kureka kuŵatataliya.

⁷Ndipo ukari wa Ambuya ungukole pa ŵaYisraele, ndipo anguŵaguliska mu janja la ŵaFilisti ndi mu janja la Amoni,

⁸wanguŵapweteka ndikuŵayuzga ŵaYisraele chirimika chiya. Kwa virimika chumi pachanya nkhonde ndi vitatu (18) wanguyuzga ŵaYisraele wo ŵenga ku sirgha la Yordane mu charu cha Amori, cho chemu Gileada.

⁹Ndipo Amoni wangwambuka Yordane kwachirwa so ndi Yuda, ndi Benjamini, ndi kumikana ndi nyumba yaku Efraimu; viyo kuti Yisraele wanguyuzgika kwakuŵaŵa.

¹⁰Ndipo ŵaYisraele ŵangubongole ku Ambuya, ŵanguti, “Talakwiya imwe, chifukwa tareka Chiuta widu tatataliya ŵaBala.”

¹¹Ambuya anguti ku ŵaYisraele, “Asi ndingukuwomboni ku ŵaEgipiti ndi ku Amori; ku Amoni, ndiku ŵaFilisti?

¹²ŴaSidoni so nawo, ndi Amaleke, ndi ŵina Maono, ŵangumuyuzgani ndipo mungubongole kwangu, ndingukuwomboni kumutuzgani mu janja lawo.

¹³Kweni imwe mwandijowo ndi kutataliya ŵachiuta ŵanyake; chifukwa cho kuti ndikamupozomoskaninga so cha.

¹⁴Rutani kabongoliyeni ku ŵachiuta wo mukusankha; iwo ndiwo ŵamupozomoskeni mu nyengo yinu ya suzgu.”

¹⁵Ndipo ŵaYisraele ŵanguti ku Ambuya, “Talakwa; tichitiyeni chose cho nchamampha kwaku imwe; kweni titukuŵeyani tipozomoskeni, msana wale.”

¹⁶Viyo ŵangutuzgamo ŵachiuta ŵachilendo mukati mwawo ndi ŵangutataliya Ambuya; ndipo iwo angukaripa pa masuzgu ghaku Yisraele.

¹⁷Pavuli ŵina Amoni ŵangudanikiya ku nkhondo, ŵangugoŵa mu Gileada; ŵaYisraele ŵanguwungana pamoza, ndi ŵangugoŵa pa Mizipa.

¹⁸Ndipo ŵanthu, ŵarongozgi ŵamu Gileada, ŵangunenerana, “Munthu yo wadankhenge kurwa ndi Amoni ndiyani? Iyo ndiyo wakaŵanga mutu paku wose ŵakuja mu Gileada.”