Read gitonga Ŵeruzgi 2 Bible Online

Ŵeruzgi 2 - gitonga bible

Ŵeruzgi 2

¹Sono mungelo wa Ambuya wangukwera kutuwa ku Gilgala kuya ku Bokimu. Ndipo wanguti, “Ndingumutoni mu Egipiti, ndinguza namwe mu charu ichi, cho ndingurapiya kupaska ku auskemwe. Ndinguti kuti ndikaswanga cha phanganu langu ndi imwe,

²ndi kuti imwe mungachitanga phanganu cha ndi ŵakuja mu charu ichi; mubwanganduliyenge pasi viguŵa vyawo vya sembe, kweni mulivi kuvwiya dangu langu. Nchine ichi mwachita?

³Viyo ndititi, kuti ndikaŵadikiskangamo cha paurongo pinu; kweni ŵakaŵanga ŵakupindikana ŵinu, ndipo ŵachiuta ŵawo ŵakaŵanga chiŵana kwaku imwe.”

⁴Po mungelo wa Ambuya wangurongoro mazu yagha ku ŵaYisraele wose, ŵanthu ŵangusoska mazu ghawo, ŵanguliya.

⁵Ndipo ŵangudana zina la malo gha, Bokimu;[1] ndipo ŵangupereka sembe ku Ambuya.

⁶Yoswa wati wambininiska ŵanthu, ŵanthu ŵaku Yisraele ŵanguruta we yose ku chihara chake kwachito charu cho kuŵa chawo.

⁷Ndipo ŵanthu ŵangutataliya Ambuya mu mazuŵa ghose ghaku Yoswa, ndi mu mazuŵa ghose gha ŵaraŵara wo ŵanguŵa ndi umoyo wati wafwa Yoswa, wo ŵanguwona nchitu zikuru zo Ambuya anguchitiya Yisraele.

⁸Ndipo Yoswa mwana waku Nuni, mteŵeti wa Ambuya, wangufwa pa ura wa virimika machumi pe chumi ndi chumi limoza (110).

⁹Ndipo ŵangumuŵika mukati mwa chihara chake mu Timnaheresi mu charu cha mitunthu chaku Efraimu, kuchiri ku nkhonde kwa phiri la Gashi.

¹⁰Ndipo mgonezi wose wuwa unguwunjikika ku auskeu; ndipo kunguyuka mgonezi unyake pavuli pawo, wo wengavi kuziŵa Ambuya pamwenga nchitu yo anguchitiya Yisraele.

¹¹Ndipo ŵaYisraele ŵanguchita cho chenga chiheni mu maso gha Ambuya, ŵanguteŵete Bala.[2]

¹²Ŵangujowo Ambuya, Chiuta wa auskeu, yo wanguŵatuzga mu charu cha Egipiti, ŵangundondoloska ŵachiuta ŵanyake, ŵamu ŵachiuta ŵa ŵanthu wo ŵajanga kwakuŵazunguliya ndipo ŵanguŵalambiya wo; ndipo ŵangusosomole Ambuya ku ukari.

¹³Ŵangujowo Ambuya, ndi ŵangutataliya Bala ndi Ashitaroti.[3]

¹⁴Viyo ukari wa Ambuya ungukole paku Yisraele, ndipo anguŵapereka ku ŵamawongo wo ŵanguŵayora; ndipo anguŵaguliska ku nthazi ya ŵakupindikana ŵawo ŵakuŵazunguliya, alinga kuti ŵangalimbana nawo so cha ŵakupindikana ŵawo.

¹⁵Penipo pose ŵangwenda janja la Ambuya lingumikana nawo kuŵachitiya uheni, nge ndimo Ambuya anguŵachenjezge, ndipo uli ndimo Ambuya angurapiya kwaku wo; ndipo ŵenga mu kuŵaŵa kwakufinyirizgika.

¹⁶Sono Ambuya anguyuska ŵeruzgi ŵeniwo ŵanguŵapozomoska ku nthazi yaku wo ŵanguŵayora.

¹⁷Ndipuuli, kuti ŵanguvwiya ŵeruzgi ŵawo cha; pakuti ŵangusomphorwa ku ŵachiuta ŵanyake ŵanguŵalambiya; ruŵiruŵi ŵangupatuka mu nthowa yo auskeu ŵangwendamo, wo ŵanguvwiya marangu gha Ambuya, kweni iwo kuti ŵanguchita viyo cha.

¹⁸Penipo pose Ambuya anguŵamikiya ŵeruzgi, Ambuya ŵenga pamoza ndi mweruzgi, ndipo anguŵapozomoska ku janja la ŵakupindikana ŵawo mu mazuwa ghose gha mweruzgi yo; pakuti Ambuya angukoreka chifundu pa mitamanthu yawo chifukwa cha ŵakuŵayuzga ndi kuŵasuzga.

¹⁹Kweni penipo pose wangufwa mweruzgi yo, iwo ŵanguwere vuli, ŵangutimbanizga kujumpha pa auskeu kundondoloska ŵachiuta ŵanyake, kuŵatataliya, ndi kuŵalambiya; ŵengavi kutaya pasi nanga nchimoza cha vyakuchita vyawo pamwenga nthowa zawo zinonono.

²⁰Viyo ukari wa Ambuya ungukole paku Yisraele; ndipo anguti, “Chifukwa chakuti ŵanthu yaŵa ŵaswa phanganu langu lo ndingulanguliya auskeu, ndipo ŵalivi kuvwiya mazu ghangu.

²¹Kutuwa sono kuti ndikadikiskanga paurongo pawo mtundu nanga ngumoza cha wa ŵamitundu wo Yoswa wangusiya wachifwa,

²²mwakuti mwaku yo ndimu ndimwesiyenge Yisraele vinu wakaphwerenga kwenda mu nthowa ya Ambuya uli ndimo ŵanguchitiya auskeu pamwenga awa.”

²³Viyo Ambuya anguyireka mitundu yo, kuyidikiskamo kwaruŵi, ndipo kuti anguyipaska mu nthazi yaku Yoswa cha.