Read gitonga Yuda 1 Bible Online

Yuda 1 - gitonga bible

Yuda 1

¹Kalata wakutuwa kwaku Yuda mteŵeti waku Yesu Kristu, ndi mhurwa waku Yakobe, ku ŵakudanika wo ŵakwanjiwa mwaku Chiuta Dada, ndi ŵakusungikiya mwaku Yesu Kristu:

²Lisungu, chimangu, ndi chanju vyandaniskike mwaku imwe.

³Mwaŵakwanjiwa, pakutinthimikiya kukulembiyani vyapa utaski widu wamasanga, ndingukakamizgika kumlembiyani ndi kumchiskani kulimbiya pa chivwanu cho chaperekeka kamoza ku ŵakupaturika.

⁴Chifukwa ŵakwaŵiyamo kwaudeke ŵanthu ŵanyake wo kali ŵangutemeke limu ku chisusa chenichi, ŵambura uwopa Chiuta, ŵakusanduska wazi waku Chiuta widu ku uyaya, ndi ŵakumkana mweneko yija ndi Mbuyafwe Yesu Kristu.

⁵Kweni ndikhumba kumkumbuskani, mwaŵakuziŵiya limu vyose, kuti Ambuya, ŵati ŵataska khamu ku Egipiti, pavuli po anguŵananga ŵambura kuvwana.

⁶Ŵangelo nawo so viyo ŵeniwo ŵengavi kusunga ura waku ŵija, ŵangureka ujazi wapa mtima wawo, ŵaŵasunga mu magoŵa ghamuyaya pasi pa munkhorwe ku chisusa cha zuŵa likuru.

⁷Uli ndimo Sodomu ndi Gomora, ndi misumba yakuzunguliya, pakujipereke ku maureŵi kwakukozgana nawo, ndi pakusaka uyaya wakutimbang'a vyakawi, ŵaŵikikiya nge nchirongoleru, ndi kulangikiya ku chisusa cha moto wamuyaya.

⁸Kweni kwakukozgana nako ŵakulota yaŵa nawo ŵakazuzga liŵavu, ndipo ŵayeya mazaza, ndi kutuka maunkhankhu.

⁹Kweni Mikaeli, mungelo mura yo penipo pakususkana ndi diabolo yo wangulimbana nayo pa thupi laku Mosese, kuti wangugangiya cha kumsuska kwautusi, kweni wanguti, “Ambuya akuchenye.”

¹⁰Kweni yaŵa ŵanthu mbakutuka vyenivyo vyose ŵalivi kuziŵa; ndipo vyenivyo vyose ŵawamo kwakawi, nge ndi vyamoyo vyambura vinjeru, mwaku vyenivyo ŵanagikiya.

¹¹Owe wo nawo! Pakuti ŵangukiya mu nthowa yaku Kaine, ndipo ŵangutunthwiya ku urandizgi waku Balamu chifukwa cha mphotu, ndipo ŵayowe mu chigaruka uli nchaku Kora.

¹²Ŵenaŵa ndi maŵanga gha kufipa mu madghera ghinu ghachanju, pakurghiya pamoza namwe ŵajariska kwambura wofi: mitambo yambura maji, yakuyungwiskika ndi zimphepu; miti yachihanya yambura vipasi yakufwa kaŵi, yakuzgulika;

¹³mayigha ghakari gha nyanja, ghenigho ghamokoka phovu la soni zawo; nyenyezi zakurandiyarandiya, kwaku zenizo wasungikiya munkhorwe wa mdima muyaya.

¹⁴Ndipo mphaku ŵenaŵa po wanguloske Hanoke, wachinkhonde ndi chiŵi kutuwa kwaku Adamu, wakuti, “Awonani, ŵanguza Ambuya ndi ŵakupaturika ŵaŵo vikwi chumi.

¹⁵Kwachichitiya cheruzgu paku wose, ndi kwachipanikizgiya wose ŵambura uwopa Chiuta ndi nchitu zawo zakuura uwopa Chiuta, zeneizo watakatakiya kwambura uwopa Chiuta, ndipo ndi vinononu vyose vyenivyo ŵalakwi ŵambura kopa Chiuta ŵakamba paku iyo.”

¹⁶Ŵenaŵa mbakudinginika, ŵakudandauriya, ŵakwenda kwakuyana ndi maulakalaka ghawo (ndipo mlomu wawo urongoro viphweti), pakurumba visku pa chifwa cha chanduku.

¹⁷Kweni imwe, mwaŵakwanjiwa, kumbukani manenedu ghenigho ghanguneneke limo ndi ŵakutumika ŵaAmbuya Yesu Kristu;

¹⁸ŵanguti kwaku imwe, “Pa nyengo ya umari paŵenge ŵakuwera, ŵakwenda uli ndi maulakalaka gha uwura uwopa Chiuta waku ŵija.”

¹⁹Yaŵa mbakugauskana, ŵa mtima wakawi, ŵambura Mzimu.

²⁰Kweni imwe, mwaŵakwanjiwa, pakujizenge pa chivwanu chinu chakupaturika kwakuruska, ndi pakurombe mu Mzimu ŵakupaturika,

²¹mujisunge mu chanju chaku Chiuta, ndi kulereze lisungu la Ambuyafwe Yesu Kristu la ku umoyo wamuyaya.

²²Ndipo ŵachitiyeni lisungu wo mbakukayika,

²³ndipo ŵanyake ŵataskeni, pakuŵabuwa mu moto; ndipo ŵanyake ŵachitiyeni lisungu ndi wofi, muchitinkha munjirira wakukazuzgika ndi lisiru la liŵavu.

²⁴Ndipo kwaku mweniyo ngwanthazi kumbhozgani ŵambura kuguŵa, ndi kumjarikani paurongo pa unkhankhu wake ŵambura kalema mu chimwemwe chenichikuru,

²⁵kwaku Chiuta yijayija pe, Ntaski widu, kuŵiye mwaku Yesu Kristu Ambuyafwe, unkhankhu, mazaza, ukumu ndi mtufu, uli ndimo kwaŵiyanga yindaŵepo migonezi, kuliri sono, ndipo kukaŵiyanga muyaya. Ameni.