Read gitonga Chivumbuzi 13 Bible Online

Chivumbuzi 13 - gitonga bible

Chivumbuzi 13

¹Ndipo ndinguwona chikoku chakukwera kutuwa ku nyanja, cho chenga ndi sengwi chumi ndi mitu yinkhonde ndi yiŵi, ndi pa sengwi zake vifuku chumi, pa mitu yake penga mazina gha kutuka.

²Ndipo chikoku cho ndinguwona chingukozgana ndi nyalubwe ndi marundi ghake nge ndi chipembere, mlomo wake nge ndi mlomo wa nkharamu. Ndipo nchalinda yo wanguchipaska nthazi yake, ndi chitengu chake chaufumu ndi mtufu ukuru.

³Ndinguwona umoza wa mitu yake wenga nge ngwakukosoreka ndi kubayika; ndipo bala lake lanyifwa linguchizgika: ndipo charu chose chingurondo chikoku cho ndi kuzizwa.

⁴Ndipo ŵanthu ŵangumlambiya nchalinda, pakuti wangupaska chikoku mtufu; ndipo ŵanguchilambiya chikoku, ŵakuti, “Njani wakukozgana ndi chikoku cho? Ndipo wanthazi njani kurwana nacho?”

⁵Ungupaskika ku chikoku cho mlomo wakurongoro vinthu vikuru ndi vyakutuka; chingupaskika mazaza kurongoro ivi kwamyezi machumi ghanayi ndi yiŵi.

⁶Ndipo chingujura mlomo wake kutoza Chiuta, kutuka zina lake, ndi chihema chake, ndi wo ŵaja kuchanya.

⁷Ndipo kungupaskika kwaku cho kurwana ndi ŵakupaturika wo, ndi kuŵapunda. Ungupaskika kwaku cho mtufupa fuku lose ndi khamu ndikarongororedu ndi mtundu.

⁸Ndipo wose ŵakuja pa charu chapasi ŵakachilambiyanga, we yose yo zina lake lirivi kulembeka kutuwa ku kujarikika kwa charu mu buku la umoyo la Mwana-mberere yo, mweniyo wangubayika.

⁹Asani munthu we nalo gutu, wavwenge.

¹⁰Asani munthu watemeke mkoli, ku mkoli wakenge; asani munthu wabayenge ndi lipanga, iyo nayo wabayikenge ndi lipanga. Panu pe unkhunthiya wa ŵakupaturika wo, ndi chivwanu chawo.

¹¹Ndipo ndinguwona chikoku chinyake chakuzuwuka kutuwa ku charu; chenga nazo sengwi ziŵi uli ndi mwanamberere, ndipo charongoronga nge ndi nchalinda.

¹²Ndipo chitakataka paurongo pake ndi mtufu wose wa chikoku chiya chakudanga. Ndipo chichita kuti charu chapasi ndi ŵakuja mwenimo ŵalambiyenge chikoku chakudanga cho, chenicho bala lake la nyifwa linguchizgika.

¹³Ndipo chitata visimisimi vikuru, viyo kuti chituzga chingana ndi moto kuchanya, kuwusiskiya pa charu pa maso gha ŵanthu.

¹⁴Ndipo chituŵarandizga wo ŵaja pa charu chapasi chifukwa cha visimikizgu vyo vikupaskika kwaku cho kuchitiya paurongo pa chikoku chakudanga cho. Chikoku chinguŵanene ŵakuja pa charu kuchitiya chikoku cho chikozgu, mukutumbika chikoku cho chenga ndi bala la lipanga kweni chakuŵa chamoyo.

¹⁵Ndipo chinguronde nthazi kupaska mvuchi ku chikozgu cho cha chikoku, viyo kuti chikozgu cha chikoku cho chingaziŵa kurongoro, ndi kuchitiska kuti wo wose ŵarekenge kulambiya chikozgu cha chikoku, ŵabayike.

¹⁶Ndipo so ndi kukakamizga wose, ŵamana ndi ŵara, ŵasambasi ndi ŵakavu, ŵanangwa ndi ŵaŵanda, kusimbika pa manja ghawo ghamarghe, pamwenga pa mphumi zawo;

¹⁷ndi kuti munthu kuti wanguziŵa kugula pamwenga kuguliska cha, kwambura kuti we ndi lisimbu lo, lo ndi zina la chikoku cho pamwenga muŵerengu wa zina lake.

¹⁸Panu pe zeru: yowawamo, wapime muŵerengu wa chikoku cho; chifukwa muŵerengu ngwa munthu; ndipo muŵerengu wake ndi machumi pe chumi ghankhonde ndi limoza pachanya machumi ghankhonde ndi limoza ndi vinkhonde ndi chimoza (666).