Read gitonga Chivumbuzi 15 Bible Online

Chivumbuzi 15 - gitonga bible

Chivumbuzi 15

¹Ndinguwona munthondwi unyake kuchanya, ukuru ndi wakuziziswa, ŵangelo ŵankhonde ndi ŵaŵi, ŵenga ndi videru vinkhonde ndi viŵi vyakumariya, mwaku vyenivyo ndimu kamarizgikiya kandundu kaku Chiuta.

²Ndinguchiwona chakukozgana ndi nyanja yakulangaliya, yakusazgikana ndimoto; ndi ŵeniwo ŵangupunda chikoku chiya, ndi chikozgu chake, ndi muŵerengu wa zina lake, ŵanguma iwo pa nyanja yakulangaliya, ndipo ŵenga ndi ŵakaligu ŵaku Chiuta mumanja ghawo.

³Ndipo ŵambanga sumu yaku Mosese, muŵanda waku Chiuta, ndi sumu ya Mwana-mberere yo, ŵakuti, “Ngakuru ndi ngakuziziswa machitidu ghinu, Ambuya Chiuta, Mwaŵanthazizose! Ngakurunjika ndi ngakuneneska mendedu ghinu, mwa karonga wa migonezi!

⁴Njani warekenge kopa imwe, Ambuya, ndi kukankhuska zina linu? Pakuti ndimwe pe mwe ŵakupaturika. Chifukwa mitundu yose yikazanga, ndipo yilambiyenge paurongo pinu; pakuti vyeruzgu vinu vyakurunjika vyawoneka pakweru!”

⁵Pavuli paku vyenivi ndingulereska, ndipo wangujurika kuchanya kasopi yo wa chihema cha chisimisimi cho.

⁶Ndipo ŵangutuwa mu kasopi yo ŵangelo ŵankhonde ndi ŵaŵi wo ŵenga ndi videru vinkhonde ndi viŵi, ŵakuvwara malikwamba gha golide.

⁷Ndipo chimoza cha vyamoyo vyo vinayi chingupaska ŵangelo ŵankhonde ndi ŵaŵi mbali nkhonde ndi ziŵi zakuzaza fwa ndi kandundu kaku Chiuta, mweniyo ngwamoyo ku muyaya ndi muyaya.

⁸Ndipo kasopi wanguzazika ndi usi wakutuwa ku unkhankhu waku Chiuta ndi ku nthazi yake; ndipo pengavi yumoza wanguziŵa kusere mu kasopi mo, mpaka vingumara videru vyo vinkhonde ndi viŵi vya ŵangelowo ŵankhonde ndi ŵaŵi.