Read gitonga Chivumbuzi 3 Bible Online

Chivumbuzi 3 - gitonga bible

Chivumbuzi 3

¹“Ndipo ku mungelo wa mpingu wamu Sardisi ulembe: ‘Vyenivi watiti mweniyo we nawo ŵazimu ŵankhonde ndi ŵaŵi ŵaku Chiuta, ndi nyenyezi nkhonde ndi ziŵi. “ ‘Ndiziŵa nchitu zako, we nalo zina lakuti we wamoyo penipo we wakufwa.

²Uŵe wakucherezga, ndipo uvikhozge vyo vyajapo, vyenga vindafwe; chifukwa kuti ndasaniya nchitu zako zakufiskika cha paurongo paku Chiuta wangu.

³Viyo kumbuka, cho ungusambizgika ndimo unguchivwiya; uchisunge; ndipo ng'anamuka. Asani ureka kucherezga, ndizenge nge ndi munkhungu, ndipo kuti ukaziŵanga cha ora lo ndiziyenge pako.

⁴Kweni we nagho mazina ghamanavi mu Sardisi, ŵanthu wo ŵalive kukazuzga minjirira yawo: ndipo ŵamukwenda pamoza nane mu vituŵa: pakuti mbakwenere.

⁵Yo wapunda wakavwarikikanga viyo minjirira yakuti tu! Ndipo kuti nkhasisitanga cha zina lake mu buku la umoyo; ndipo nkhazumbuwanga zina lake paurongo pa Ada, ndi paurongo pa ŵangelo ŵawo.

⁶Mweniyo we ndi gutu, wavwenge cho Mzimu ukamba ku mipingu.’

⁷“Ku mungelo wa mpingu wamu Filadelfia lembapo: ‘Vyenivi watiti Wakupaturika, Mneneska yo, mweniyo we ndi mjuriru waku Davidi, yo wajura, ndipo kuti yumoza wangajara cha, yo wajara, ndipo kuti yumoza wangajura cha.

⁸“ ‘Ndiziŵa nchitu zako. Awona, ndaŵika paurongo pako khomo lakujuriko, lenilo palive yumoza ngwanthazi kujara; ndiziŵa we ndi nthazi kweni yimanavi, ndipuuli wasungirizga mazu ghangu, kuti walikana zina langu cha.

⁹Awona, nkhaŵachitanga ŵamu mpingu waku Satana, wo ŵatijitamula kuti mbaYuda, ndipo kuti mbaviyo cha, mbatesi, awona, nkhaŵachitanga kuti ŵazenge ndi kulambiya paurongo pa marundi ghako, ndipo ŵakaziŵanga kuti ine ndakwanja iwe.

¹⁰Pakuti wasungirizga mazu ghangu ghakuti, kunthiyangapo, nane so, nkhakusunganga ku ora la kesedu, lo likaziyanga pa charu chose, kwachesa wo mbakuja panupasi.

¹¹Nthuza ruŵi: koreska cho we nacho, alinga kuti paŵevi yumoza wakupoka ndumbu yako.

¹²Yo wapunda nkhamuchitanga mzati mu kasopi waku Chiuta wangu, ndipo kuti wakatuwangamo so cha; ndipo nkhalembanga pake zina laku Chiuta wangu, ndi zina lamsumba waku Chiuta wangu, Yerusalemu mufya, yo wasika kutuwa kuchanya kwaku Chiuta wangu, ndi zina langu lifya.

¹³Mweniyo we ndi gutu, wavwenge cho Mzimu ukamba ku mipingu.’

¹⁴“Ku mungelo yo wa mpingu wamu Laodikea lembapo: ‘Vyenivi watiti Ameni yo, kaboni wamogomekezgeka ndi wakuneneska, Chandu wa ulengi waku Chiuta.

¹⁵“ ‘Ndiziŵa nchitu zako, kuti iwe we wakuzizira pamwenga wakocha cha: mphanyi wenga wakuzizira, pamwenga wakocha.

¹⁶Viyo pakuti we wakufunda ŵaka, ndi wakocha chingana ngwakuzizira cha, ndikhumba kukuwukuwa mu mlomo wangu.

¹⁷Chifukwa utiti, ndine msambasi, ndasakatiskika ndi uromba, kuti ndikavuka kanthu cha; ndipo ureka kuziŵa kuti we musokwa iwe, ndi wachisungu, msauchi, wachiburumutiya, ndi wankhuli.

¹⁸Chifukwa ichi ndikupangizga kugula kwangu golide lakwengeka mu moto, alinga kuti usambase: ndi minjirira yituŵa kuti ujivwarike, mwakuti soni ya unkhuli wako yireke kurongoreka: ndi munkhwara wa kupaka mumaso ghako, alinga kuti ulereske.

¹⁹Ŵeniwo wose nditanja, ndituŵachenya ndikuŵalanga: viyo pamphuka, ndi ng'anamuka.

²⁰Awona, ndama pa khomu ndipo ndigong'oska: asani munthu watuvwa mazu ghangu, ndi wajura ku khomu, ndiserenge kwaku iyo, ndirghenge pamoza nayo, ndi iyo pamoza nane.

²¹Yo wapunda ndimpaskenge kwachija pamoza nane pa chitengu changu chaufumu uli ndimo ine nane ndikupundiya, ndipo ndija pasi pamoza ndi Ada pa chitengu chawo chaufumu.

²²Mweniyo we ndi gutu, wavwenge cho Mzimu ukamba ku mipingu.’ ”