Read gitonga Chivumbuzi 4 Bible Online

Chivumbuzi 4 - gitonga bible

Chivumbuzi 4

¹Pavuli paku vyenivi ndingulereska, ndipo, wonani, khomu lingujurika kuchanya, ndipo liu lakudanga lo ndinguvwa lenga ulaka nda mbata yakukamba nane, “Kwere kuno, mwakuti ndikurongo vyo vitenere kuŵapo pavuli.”

²Ndipo sosonukweni ndinguŵiya mu Mzimu: ndipo ehe, chitengu-chaufumu chingujarikika kuchanya, ndi pa chitengu-chaufumu cho yumoza wakujapo!

³Ndipo yo wangujapo mu kawonekedu wangukozgana ndi mwa wa jasperendi karneliyani: ndipo kuzingiriya chitengu-chaufumu cho penga chiŵingavuwa, chakukozgana ndi mwa wa emeraldo.

⁴Ndipo kwakuzunguliya chitengu-chaufumu cho kwenga vitengu-vyaufumu machumi ghaŵi pachanya vinayi, ndipo pa vitengu vyo ŵangujapo ŵara machumi ghaŵi pachanya ŵanayi, ŵakuvwara, minjirira yituŵa; ndi pa mitu yawo ndumbu zagolide.

⁵Ndipo mu chitengu-chaufumu cho ghangutuwamo malimphezi ndi mazu ndi vidiririzi. Ndipo ghengapo malimbuni ghankhonde ndi ghaŵi gha moto ghakukole pauronga pa chitengu-chaufumu cho, ghenigho mbazimu ŵankhonde ndi ŵaŵi ŵaku Chiuta;

⁶ndipo paurongo pa chitengu-chaufumu cho penga ulaka ndi nyanja yakulangaliya, yakukozgana ndi sangalawi. Ndipo kuzunguriya chitengo chaufumu cho kuchiri kunu ndi kuchiri kuwa kwenga vyamoyo vinayi vyakuzara maso kunthazi ndi kuvuli.

⁷Ndipo chamoyo chachimoza chakozgananga ndi nkharamu, chamoyo chachiŵi chakukozgana ndi tholi, chamoyo chachitatu chenga ndi chisku ulaka ncha munthu, ndipo chamoyo chachinayi chakozgananga ndi nombo yakuphururuka.

⁸Ndipo vyamoyo vyo vinayi vyose, chimoza ndi chimoza vyenga ndi mapapiku ghankhonde ndi limoza vyenga vyakuzazika ndi maso kwakuzunguliya ndi mukati viyo, ndipo msana ndi usiku kuti vipumuliya cha pakumba, “Mtuŵa, mtuŵa, mtuŵa, ndi Mbuya Chiuta, Wanthazizose, mweniyo wengako, walipo, ndipo watuza.”

⁹Ndipo penipo pose vyamoyo vyo vipaska unkhankhu ndi rumbu ndi kuwonga kwaku yo waja pa chitengu chaufumu cho, kwaku mweniyo ngwamoyo ku muyaya ndi muyaya,

¹⁰ŵatuwa pasi ŵara wo machumi ghaŵi ndi ŵanayi paurongo paku yo waja pa chitengu chaufumu cho, ndi kumlambiya yo ngwamoyo ku muyaya ndi muyaya; ndipo ŵapong'a pasi ndumbu zawo paurongo pa chitengu-chaufumu cho, ŵatumba,

¹¹“Wakwenere ndimwe, Ambuyafwe Chiuta widu, kuvironde, unkhankhu, rumbu ndi nthazi: pakuti imwe munguvilenga vyose, ndipo chifukwa cha khumbu linu vinguŵako, ndipo vingwatika.”