Read gitonga Chivumbuzi 6 Bible Online

Chivumbuzi 6 - gitonga bible

Chivumbuzi 6

¹Ndipo penipo Mwana-mberere yo wangubanuwa chimoza cha vizighiri vyo vinkhonde ndi viŵi, ndingulereska, ndipo ndinguvwa chimoza cha vyamoyo vyo vinayi chakukamba, ndi mazu uli ngachidiririzi, “Zanga!”

²Ndipo ndingulereska, awonani, kavalo mtuŵa, ndi wakugarapo pake wenga ndi uta; yingupaskika kwaku iyo ndumbu; ndipo wangutuliya kupunda kuti wapundenge.

³Ndipo penipo wangubanuwa chizighiri chachiŵi, ndinguvwa chamoyo chachiŵi chakuti, “Zanga!”

⁴Ndipo wangutuwa kavalo munyake muchesamu: ndipo kwaku yo wangugarapo pake kungupaskika kutuzgapo chimangu pa charu, alinga kuti ŵanthu ŵabayanenge; ndipo kwaku iyo kungupaskika lipanga likuru.

⁵Ndipo penipo wangubanuwa chizighiri chachitatu, ndinguchivwa chamoyo chachitatu chakuti, “Zanga!” Ndipo ndingulereska, wonani kavalo mfipa: ndipo yo wangugara pake wenga ndi chakwese mu janja lake.

⁶Ndipo ndinguvwa ulaka ndi mazu mukati mu vyamoyo vinayi vyo, ghakuti, “Mwesu wa trigu pa tambala yumoza, ndi myesu yitatu ya barile pa tambala yumoza! Ndipo ungananganga mafuta chingana ndi vinyo cha.”

⁷Ndipo penipo wangubanuwa chizighiri chachinayi, ndinguvwa mazu gha chamoyo chachinayi chakuti, “Zanga!”

⁸Ndipo ndingulereska awonani, kavalo wakonda: ndipo zina laku yo wangugarapo pake lenga Nyifwa: ndipo Hadesi wangurongozgana nayo; kwaku iwo kungupaskika mtufu wapa chigaŵa chapanayi cha panupasi kwachibaya ndi lipanga ndi ndi chirara, ndindi nyifwa, ndindi vikoku vyo charu.

⁹Ndipo penipo wangubanuwa chizighiri chachinkhonde ndinguŵawona kusi ku jochero ŵazimu ŵaku wo ŵangubayikiya pa chifwa cha mazu chaku Chiuta, ndi pa chifwa cha chisimisimi cho ŵenga nacho;

¹⁰ndipo ŵangukambura ndi mazu ghakuru, kuti, “Mpaka zuŵanji Ambuya Mwaŵanthazizose, ŵakupaturika ndi ŵakuneneska, murekenge kweruzga ndi kutayiya thayu yapa ndopa zidu paku wo ŵaja pa charu?”

¹¹Ndipo kwaku yose waku iwo kungupaskika khanju lituŵa: ndipo kunguneneka kwaku wo, kuti ŵapumuwepo nyengo yimanavi so, mpaka ŵafiskike ŵakuteŵeta ŵanyawo ndi ŵabali ŵawo, wo kungwenere kubayika nge ndiwo.

¹²Ndipo penipo wangubanuwa chizighiri chachinkhonde ndi chimoza, ndingulereska, ndipo kunguŵapo chiyeuyeu chikuru; dazi linguŵa lifipa ulaka nchigudulu chifipa, ndipo mwezi wa baraŵara unguŵa uli ndi ndopa;

¹³nyenyezi za kuchanya zingumbotoke pa charu, uli ndimo mkuyu umbotoske nkhuyu zake ziŵisi, pakusukung'ika ndi mphepu yikuru.

¹⁴Ndipo kuchanya kungukungunuka ulaka ndi buku lo lazingika pamoza; ndipo phiri le lose ndi chirwa che chose vingunderezgeka mu malo ghawo,

¹⁵ndipo ŵakaronga ŵa panupasi ndi ŵaraŵara, ndi zinduna, ndi ŵasambasi, ndi virimbi, ndi muŵanda yose ndi mwanangwa ŵangubisama mu zimphanji ndi mu majarawe gha mapiri,

¹⁶ndi kughanene mapiri ndi majarawe, “Wiyani paku ifwe, ndi tivunikiriyeni ku chisku chaku mweniyo waja pa chitengu-chaufumu cho, ndi ku kandundu ka Mwana-mberere,

¹⁷chifukwa laza zuŵa likuru la kandundu kawo; ndipo njani waziŵa kulimiya?”