Read gitonga 1 Samuele 10 Bible Online

1 Samuele 10 - gitonga bible

1 Samuele 10

¹Sono Samuele wanguto supa ya mafuta wangupunguliya pa mutu wake, wangumufyofyontha ndi wanguti, “Asi ndi Ambuya wo akupaka mwakuti uŵe chirongozgi wa ŵanthu ŵake ŵaYisraele? Ndipo ukawusanga pa ŵanthu ŵa Ambuya ndi kuŵapozomoska mu janja la ŵarwani ŵawo ŵakuŵazingirizga. Ndipo ichi chiŵenge chisimikizgu kwaku iwe kuti Ambuya akupaka kukupatuwa uŵe fumu pa ŵanthu ŵake.

²Titakuti tapatukana pano msana wale uchiya pa muunda waku Rakele wamukumana ndi ŵanthu ŵaŵi mu mphaka yaku Benjamini pa Zelza, ŵakambenge nawe kuti, ‘Mbunda zo mungamupenja zikuwoneka, ndipo sono ausu ŵareka kughanaghana ndi mbunda ŵafipa mtima ndi iwe, ŵatiti, “Ndichitengenji ndi mwana wangu?” ’

³Mwamurutiyapo mwamufika pa muti wamu Taboro; po mwamukumana ndi ŵanthu ŵatatu wo ŵarata kwaku Chiuta pa Betele, yumoza wapinga twana twa mbuzi tutatu, munyake wapinga maburunga ghatatu gha viŵande, munyake wapinga vinyo mu thumba la chikopa.

⁴Ŵakutawuzgenge ndipo ŵakupaskenge maburunga ghaŵi gha viŵande, gho utenere kuronda.

⁵Pavuli pake mwa mufika ku Gibea-telohimi[4] ko kwe linga la ŵaFilisti, ndipo kwenikuwa, muchiza ku msumba, mwamukumana ndi mpingu wa ŵamchimi ŵachisika kutuwa ku malo gha pachanya, ŵakuŵa ndi bangwi, ng'oma, khweru ndi kaligu paurongo pawo, uku ŵachima.

⁶Ndipo mzimu wa Ambuya uzenge paku iwe ndi nthazi yikuru, ndipo ukachimanga pamoza nawo ndi ukasandukanga munthu munyake.

⁷Viyo asani visimikizgu ivi vyakufikiya, ipo chitanga cho chose janja lako lingaziŵa kuchita, pakuti Chiuta we nawe.

⁸Ndipo ukandidanjiriyanga ku Gilgala; ayivwa, ndizenge kwaku iwe kwazipereka visopo vyakocha ndi kubaya visopo vya chimangu. Undirindizge mazuŵa ghankhonde ndi ghaŵi, mpaka po ine ndafika ndazakukurongo cho utenere kuchita.”

⁹Wanguti, wang'anamuka kutuwako kwaku Samuele, Chiuta wangumpaska mtima unyake, ndipo visimikizgu ivi vingufiskika pa zuŵa liya.

¹⁰Po wanguti wafika ku Gibea, mpingu wa ŵamchimiungukumana nayo; ndipo mzimu waku Chiuta unguziya pake ndi nthazi, mwakuti iyo nayo wanguchima pamoza nawo.

¹¹Ndipo wose wo ŵangumuziŵa kali pakumuwona mo wachimiyanga pamoza ndi ŵamchimi, ŵakambirananga yumoza ku munyake, “Nchine cho chawiya mwana waku Kishi? Kumbi Sauli nayo so we mukati mu ŵamchimi?”

¹²Ndipo munthu yumoza wapa malo gha wangufumba, “Kumbi auskeu mbayani?” Mu chifukwa ichi yinguŵa nthanthi, “Kumbi Sauli nayo so we mukati mu ŵamchimi?”

¹³Wanguti wamara kuchima, wanguza ku malo gha pachanya.

¹⁴Asibweni ŵaku Sauli ŵangumufumba pamoza ndi wanchitu wake, “Munguya pani?” Iyo wanguti, “Tingampenja mbunda; ndipo po tinguwona kuti zengavi kusanirika, tinguruta kwaku Samuele.”

¹⁵Asibweni ŵake ŵanguti, “Ndipempha, ndikambiye cho Samuele wangukamba nawe.”

¹⁶Sauli wanguti, “Wakutinene umamphavi kuti mbunda zikusanirika.” Kweni kwakuyana ndi makani gha ufumu, gho Samuele wangurongoro, kuti wanguŵaneniyapo kanthu cha.

¹⁷Ndipo Samuele wangudana ŵanthu kuwungana ku Ambuya pa Mizpa;

¹⁸wangunena ndi ŵaYisraele, “Viyo atiti Ambuya Chiuta waku Yisraele, ‘Ndingukwezga Yisraele kutuwa mu Egipiti, ndingumukwamphuwani mu janja la ŵaEgipiti, ndi mu janja la mafumu ghose gho ghangumunyekezgani.’

¹⁹Kweni pa nyengo yino imwe mwakana Chiuta winu, yo watimupozomoskani mu masoka ndi masuzgu ghinu; ndipo mwakamba kuti, ‘Awa! Timikiyeni karonga pachanya pidu.’ Viyo sono jiwoneskeni mwaŵeni panthazi pa Ambuya mu mafuku ghinu ndi mu unandi winu.”

²⁰Samuele wangudaniya mafuku ghose gha ŵaYisraele pafupi, ndipo pakupenduzga fuku laku Benjamini lingutondoreka.

²¹Wangunderezga fuku laku Benjamini pafupi pamoza ndi mbumba yawo, ndipo mbumba yaku Matiri yingutondoreka; pa umari wangunderezga mbumba yaku Matiri pafupi munthu ndi munthu, Sauli mwana waku Kishi wangutondoreka. Kweni pakumpenja, wengavi kusanirika.

²²Viyo wangufumba so ku Ambuya, “Kumbi munthu uyu walipo panu?” Ambuya anguti, “Awonani, wabisama mukati muŵakatundu.”

²³Ŵanguchimbiya kwachimuto; ndipo po wanguti wama mukati mu ŵanthu, wenga mutali kuruska ŵanthu wose kutuwa mumaphewa ghake kurazgiya kuchanya,

²⁴ndipo Samuele wanguŵafumba ŵanthu wose, “Kumbi mutimuwona yo Ambuya atondo? Palivi nanga jumoza wakuyana nayo mu ŵanthu wose.” Ndipo ŵanthu wose ŵangukambura, “Waŵe ndi umoyo utari karonga.”

²⁵Sono Samuele wanguŵakambiya ŵanthu marangu ndi nchitu za ufumu, ndipo wanguziremba mu buku ndi kuliŵika paurongo pa Ambuya. Viyo Samuele wanguŵanene ŵanthu ŵarutenge, munthu yose ku nyumba yake.

²⁶Sauli nayo wanguruta ku nyumba yake ku Gibea, ndi pamoza nayo ŵanthu ŵanthazi wo Chiuta wangukwaska mitima yawo.

²⁷Kweni ŵanyake wo wengavi kwenere ŵatinge, “Watitaskenge uli munthu uyu?” Ŵangumuyeya ndipo kuti ŵangumuziya ndi vyawanangwa cha. Kweni iyo wanguja chete.