Read gitonga 1 Samuele 11 Bible Online

1 Samuele 11 - gitonga bible

1 Samuele 11

¹Sono wangukwera Nahashi mwina Amoni, wangugoŵa pa Yabeshe-Gileada. Ndipo ŵanthu ŵaku Yabeshe ŵangukamba ndi Nahashi ŵanguti, “Upangani nafwe phanganu ndipo tikakuteŵetiyanga.”

²Nahashi wanguti, “Ndipanganenge namwe phanganu pa fundu iyi yakuti, ndikorowonge mose jiso linu laku marghe, mwakuti chiŵi chitozero pa ŵaYisraele wose.”

³Ŵaraŵara ŵaku Yabeshe ŵangunena nayo, “Tipaskeni mazuŵa ghankhonde ndi ghaŵi mwakuti titume mathenga mu mphaka zose za ŵaYisraele. Ndipo asani kungaŵavi yumoza wakutitaska, ipo tazamkujipereka kwinu.”

⁴Mathenga ghanguti ghafika ku Gibea kwaku Sauli, ndi kukamba makani yagha mumakutu gha ŵanthu; ŵanthu wose ŵanguliya ukongwa.

⁵Pa nyengo iyi Sauli watuwanga ku munda ndi ng'ombe zake; ndipo Sauli wanguti, “Ŵanthu ŵachita uli, po ŵafwifwinthiya?” Ŵangumukonkhoske vya kuŵapo pa ŵanthu ŵaku Yabeshe.

⁶Sauli wanguti wavwa makani yagha mzimu waku Chiuta ungumufikiya ndi nthazi, ndipo mtima wake ungukwiyiskika ukongwa.

⁷Wanguto chipingu cha ng'ombe, wangudumuwa tumana-tumana, kutumizga mu mphaka zose za ŵaYisraele pa manja gha mathenga, wakuti, “Yo yose warekenge kuza pavuli paku Sauli ndi Samuele, ndimu kumuŵiyenge viyo ndi ng'ombe zake!” Ndipo wofi wa Ambuya unguŵawiya ŵanthu, mwakuti ŵangutuwa nge ndi munthu yumoza.

⁸Po wanguti waŵaŵerenga pa Bezeke, ŵaYisraele ŵenga vikwi machumi pe chumi ghatatu (300,000), ŵaku Yuda ŵenga vikwi machumi ghatatu (30,000).

⁹Ndipo wangukamba ndi mathenga gho ghanguza, “Ichi ndicho mukakambe ku ŵanthu ŵaku Yabeshe-Gileada: ‘Mawa ndi msana pakati, mukaŵanga ndi chipozomosko!’ ” Viyo mathenga ghanguti ghafika pakuŵakambiya ŵanthu ŵaku Yabeshe, ŵangukondwa.

¹⁰Chifukwa ichi ŵanthu ŵaku Yabeshe ŵanguti, “Mawa tikajiperekanga kwaku imwe, ndipo mukatichitiyanga chose cho chingamuŵiyani chamampha.”

¹¹Ndi mlenji Sauli wanguŵika ŵanthu mu maliŵanja ghatatu; ndipo ŵangusere mukati mu ugoŵi kumatandakucha, wanguŵabaya ŵaAmoni mpaka pa nyengo yakufunda kwa lumwi; ndipo ŵaku japo ŵanguthaŵa, mwakuti chingana mbanthu ŵaŵi kuti ŵanguziŵa kuma pamoza cha.

¹²Sono ŵanthu ŵangukamba ndi Samuele, “Mbayani wo ŵatinge, ‘Kumbi Sauli wangaziŵa kutiwusa?’ Titoriyeni ŵanthu yaŵa mwakuti tiŵabaye.”

¹³Kweni Sauli wanguti, “Palivi munthu yo wangabayika msana wale, chifukwa ndi zuŵa lo Ambuya ataskiya Yisraele.”

¹⁴Samuele nayo wangunene ŵanthu wakuti, “Tiyeni ku Gilgala tikawerezgiyemo so ufumu.”

¹⁵Viyo wose wanguruta ku Gilgala, ndipo ŵangupereka mipasku ya chimangu paurongo pa Ambuya, viyo Samuele pamoza ndi ŵanthu wose ŵangukondwa ukongwa.