Read gitonga 1 Samuele 13 Bible Online

1 Samuele 13 - gitonga bible

1 Samuele 13

¹Sauli wenga…vilimika vya ura po wangwamba kuwusa; ndipo wanguwusa…ndi virimika viŵi pa ŵa Yisraele.

²Sauli wangusankha ŵaYisraele vikwi vitatu (3,000); vikwi viŵi (2,000) ŵenga ndi Sauli mu Mikimasi, ndi mucharu cha mapiri cha Betele, ndi chikwi chimoza (1,000) ŵanga ndi Jonafani mu Gibeya waku Benjamini; ndipo wangutuma ŵanthu ŵanyake ŵakujapo ku muzi, munthu we yose ku hema lake.

³Jonafani wangupunda linga la ŵaFilisti lenga mu Gibea; ndipo ŵaFilisti ŵanguchivwa ichi. Ndipo Sauli wangumba mbata mu charu chose, wakuti, “Mwa ŵaHebere vwani.”

⁴ŴaYisraele wose ŵanguvwa kuti Sauli wapunda linga la ŵaFilisti ndikuti ŵaYisraele ŵatinkhika ku ŵaFilisti. Ndipo ŵanthu ŵangudanika kuti ŵakumane ndi Sauli ku Gilgala.

⁵ŴaFilisti ŵanguwungana kuti ŵarwi nkhondo ndi ŵaYisraele magareta, vikwi machumi ghatatu (30,000) ŵanthu vikwi vinkhonde ndi chimoza (6,000) ŵakukwera pa ŵakavalo, ndipo ŵanthu ŵanguŵa nge ndi mchenga wapa likumba la nyanja mu unandi; ŵangukwera ndi kugoŵa mu Mikimasa ku vuma Bete-avene.

⁶ŴaYisraele ŵanguti ŵawona kuti ŵafinyikizgika pakuti ŵangunyekezgeka ukongwa, ŵangubisama mu zimphanji, mu majarawi, mu masano, ndi mu zingarande,

⁷pamwenga kwambuka Yordane ku charu chaku Gadi ndi Gileade. Sauli wenga weche pa Gilgala ndipo ŵanthu wose ŵangumurondo ŵakukoreka ndi chitenthe.

⁸Ŵangulinda kwa mazuŵa ghankhonde ndi ghaŵi, nyengo yo yingutemeka ndi Samuele kweni Samuele wengavi kufika ku Gilgala ndipo ŵanthu ŵathaŵanga kwaku Sauli.

⁹Sono Sauli wanguti, “Nditoriyeni sembe yakocha, ndi mpasku wa chimangu.” Ndipo wangupereka sembe yakocha.

¹⁰Po wamaranga kupereka sembe yakocha, awonani, Samuele wangufika, Sauli wangusoka kwachikumana nayo kumutauzga.

¹¹Samuele wangumufumba, “Wachitanji?” Sauli wanguti, “Po ndiguwona kuti ŵanthu ŵathaŵa, ndipo kuti imwe mwengavi kufika mu mazuŵa gho ghangutemeka, ndi pakuziŵa so kuti ŵaFilisti ŵangungana pa Mikimasa,

¹²ndatinge, ‘Sono ŵaFilisti ŵakasikiyanga kunu kwangu ku Gilgala, po kuti ndaŵeyere wezi wa wa Ambuya cha’; viyo ndingujichichizga, kupereka sembe yakocha.”

¹³Samuele wanguti, “Wachita kwakupusa; kuti wasunga dangu la Ambuya Chiuta cha, lo angukulanguliya pakuti sono mphanyi Ambuya akuzganga ufumu wako paku Yisraele muyaya.

¹⁴Kweni ufumu wako kuti urutiliyenge cha; Ambuya asankha munthu wapa mtima wawo; ndipo amumika kuŵa murongozgi wa wanthu ŵake, chifukwa iwe kuti wasunga cho Ambuya angukulanguliya cha.”

¹⁵Viyo Samuele wangusoka, wangutuwako ku Gilgala wanguya ku Gibea waku Benjamini. Ndipo Sauli wanguŵerenga ŵanthu wo ŵenga pamoza nayo, akhumba wenga machumi pe chumi ghakhonde ndi limoza (600).

¹⁶Ndipo Sauli ndi Jonafani mwana wake, ndi ŵanthu wo wenga pamoza nawo, ŵanguja mu Gibea waku Benjamini; kweni ŵaFilisti ŵangugoŵa mu Mikimasa.

¹⁷Ndipo ŵakupopeska ŵangutuwa mu ugoŵi wa ŵaFilisti mu maliŵanja ghatatu; liŵanja limoza lingurazga ku Ofra, ku charu cha Shuala,

¹⁸Liŵanja linyake lingung'anamuka kurazga ku Bete-horoni, ndi linyake lingung'anamuka kurazga ku mphaka yakulereska pa chinkhwawu chaku Zeboimu mubozwa.

¹⁹Kweni kwengavi kusanirika ŵakusula mu charu chose cha ŵaYisraele pakuti ŵaFilisti ŵanguti, “Vinu ŵaHebere ŵangajichitiya malipanga pamwenga mikondo,”

²⁰munthu yose wa ŵaYisraele wangusikiya ku ŵaFilisti kwachinorako chisenga chake, ndi cha kulimiya chake, mbavi yake, pamwenga mphopo yake;

²¹kunguŵapo so kulipira kunyake kwa zimbavi ndi zimphopo.

²²Viyo pa zuŵa la nkhondo kuti kungusanirika lipanga nanga ndi mkondo cha mu janja la munthu yose yo wanguŵa ndi Sauli ndi Jonafani, kweni Sauli pe ndi mwana wake Jonafani ndiwo ŵenga navyo.

²³Ndipo ŵamu linga la ŵaFilisti ŵangutuwa kurazga ku Mikimasa.