Read gitonga 1 Samuele 15 Bible Online

1 Samuele 15 - gitonga bible

1 Samuele 15

¹Samuele wangunena ndi Sauli, “Ambuya angudituma kukupaka iwe kuŵa karonga pa ŵanthu ŵake ŵaYisraele; viyo sono uvwiske ku mazu gha Ambuya.

²Viyo atiti Ambuya ŵa maŵanja, ‘Ndilangenge Amaleke paku cho ŵanguchitiya ŵaYisraele pa kuŵakhazga panthowa, pakukwera ŵachituwa mu Egipiti.

³Sono rutanga ukaŵathereske Amaleke, kwachinangiya limu vyose vyo ŵenavyo; kuŵagowoke cha, kweni kubaya wose munthurumi ndi munthukazi, litema ndi wakonkha, ng'ombe ndi mberere, gamila ndi mbunda.’ ”

⁴Viyo Sauli wangudana ŵanthu, ndi wanguŵaŵerenga pa Teleimi, vikwi machumi pe chumi ghaŵi (200,000) ŵakwenda pasi vikwi chumi (10,000) ŵaku Yuda.

⁵Ndipo Sauli wanguza ku msumba waAmaleke, wangubisama mu dambo.

⁶Wangunena ndi ŵaKeni, “Rutani, tuwanimo, sikani kutuwa mukati mu Amaleke, vinu ndingamunangiyani pamoza ndi iwo; pakuti imwe mungurongo lisungu ku ŵaYisraele ŵachikwera kutuwa mu Egipiti.” Viyo ŵaKeni ŵangutuwamo mukati mu Amaleke.

⁷Ndipo Sauli wanguthereska Amaleke, kutuwa ku Havila mpaka ku Shuru, ko nkhuvuma kwa Egipiti.

⁸Wanguto wamoyo Agagi karonga wa Amaleke, ndipo ŵanthu wose wanguŵabaya ndi wuyi wa lipanga.

⁹Sauli pamoza ndi ŵanthu ŵake ŵangusiya Agagi, ndi mberere zamampha ndi ng'ombe ndi vyakututuŵa, ndi twana twa mberere, ndipo ndi chose cho chinguŵa chakunozga, kuti ŵangukhumba kuvimariya limu cha, vyo vyenga vya kuyeyeka ndi vyambura kwene ŵanguvinanga vyose.

¹⁰Mazu gha Ambuya ghanguza kwaku Samuele:

¹¹“Kuti ndipaska chitima kuti ndikutondo Sauli kuŵa karonga; pakuti wawere vuli wareka kundirondo, ndipo kuti wafiska marangu ghangu cha.” Ndipo Samuele wangukwiya; ndipo wanguliya ku Ambuya usiku wose.

¹²Samuele wangusoka ndi mlenji-lenji kwachikumana ndi Sauli; wanguziŵiskika kuti, “Sauli wanguza ku Karmele, awonani, wakujimikiya chikumbusku, wakuzunguliya, ndi kurutiliya kusikiya ku Gilgala.”

¹³Ndipo Samuele wanguza kwaku Sauli; Sauli wangunena nayo, “Ambuya akutumbikeni imwe; ndafiska dangu la Ambuya.”

¹⁴Ndipo Samuele wanguti, “Nanga kumeta uku kwa mberere ndituvwa mu makutu ghangu, ndi kubama kwa ng'ombe ko ndituvwa nchine?”

¹⁵Sauli wanguti, “Ŵavipinga kutuwa ku Amaleke, pakuti ŵanthu ŵangusunga mberere ndi ng'ombe, zakunozga kupereka sembe ku Ambuya Chiuta winu, vinyake vyose tapasuwa.”

¹⁶Sono Samuele wanguti kwaku Sauli, “Ima! Ndikunene cho Ambuya arongoro nani usiku uno.” Ndipo wanguti kwaku iyo, “Kambani.”

¹⁷Samuele wanguti, “Nanga wemumana mu maso ghaku wamweni asi we mutu wa mafuku ghaku Yisraele? Ambuya akupaka kukupatuwa kuŵa karonga pa ŵaYisraele.

¹⁸Ndipo Ambuya angukutuma, kuti, ‘Ruta, ukapasuliye limu teteti ŵanthu ŵaheni wo, Amaleke, urwani nawo mpaka po ŵamara.’

¹⁹Nchifukwa uli cho ungureke kuvwiya mazu gha Ambuya? Chifukwa nchine unguthaŵiriya pavyakuskoŵa, ndi kuchita cho nchiheni mu maso gha Ambuya?”

²⁰Sauli wanguti kwaku Samuele, “Ndinguvwiya mazu gha Ambuya, ndinguruta ko Ambuya angundituma, ndapingako Agagi karonga wa Amaleke, ndipo Amaleke ndapasuwa wose teteti.

²¹Kweni ŵanthu ŵangutoko vya kuskoŵa mberere ndi ng'ombe, vyamampha kwakuruska, vya vinthu vyakwenere kubayika, kupereka sembe ku Ambuya Chiuta winu mu Gilgala.”

²²Samuele wanguti, “Kumbi Ambuya ŵendi likondwa likuru mu mipasku yakocha ndi zisembe, nge ndimo aliri nalo mu kuvwiya mazu ghawo? Ehe, kuvwiya nkhwamampha kuruska sembe, kutegherezga kuruska mafuta gha viphongo.

²³Pakuti kugaruka kwenge mbuheni wa kombeza, ndipo mtafu wenge nkhwananga ndi kusopa vikozgo. Chifukwa wakana mazu gha Ambuya iwo nawo akana iwe kuŵa karonga.”

²⁴Sauli wangunena ndi Samuele, “Ndalakwa; pakuti ndajumpha dangu la Ambuya ndi mazu ghinu, chifukwa ndingopa ŵanthu ndinguvwiya mazu ghawo.

²⁵Viyo sono, ndi murombani, gowokiyani kulakwa kwangu, ndipo muŵe pamoza nane, mwakuti ndikasope Ambuya.”

²⁶Samuele wanguti kwaku Sauli, “Kuti ndiwenge pamoza nawe cha; pakuti wakana mazu gha Ambuya, Ambuya akana iwe kuŵa karonga pa ŵaYisraele.”

²⁷Sono pakung'anamuka Samuele kuti warutenge, Sauli wanguko mkano wa munjirira wake, ndipo unguparuka.

²⁸Samuele wanguti kwaku iyo, “Ambuya aparuwa ufumu waku Yisraele kutuwa kwako msana wale, ndipo awupereka ku mwanasi wako, yo ngwamampha kuruska iwe.

²⁹Chiuta yo mbunkhankhu waku Yisraele kuti wapusikenge pamwenga kusintha cha; pakuti Iyo kuti ndi munthu cha kuti wasinthe.”

³⁰Sauli wanguti, “Ndalakwa; kweni ndipuuli ndichitiyeni ulemu paurongo pa ŵara ŵa ŵanthu ŵangu ndi paurongo paku Yisraele, muŵe pamoza nane, mwakuti ndikasope Ambuya Chiuta winu.”

³¹Viyo Samuele ndi Sauli ŵanguwere vuli; ndipo Sauli wangusopa Ambuya.

³²Samuele wanguti, “Tore kunu kwangu Agagi karongo wa Amaleke.” Agagi wanguza kwake wakukondwa. Agagi wanguti, “Ndithu urwirwi wa nyifwa waruta.”

³³Ndipo Samuele wanguti, “Nge ndimo lipanga lako lachitiskiya ŵanthukazi kuŵa ŵambura ŵana, viyo ndimu anyoko ŵaŵiyenge ŵambura mwana mukati mu ŵanthukazi.” Ndipo Samuele wangudumuwa Agagi tuvipitika paurongo pa Ambuya mu Gilgala.

³⁴Pavuli paku ichi Samuele wanguruta ku Rama, ndipo Sauli wangukwere ku nyumba yake ku Gibea waku Sauli.

³⁵Ndipo Samuele kuti wangumuwona so cha Sauli mpaka zuŵa la nyifwa yake, kweni Samuele wanguchita chitima paku Sauli. Ndipo Ambuya anguchita chitima chifukwa angutondo Sauli kuŵa karonga pa ŵaYisraele.