Read Tontemboan Matius 12 Bible Online

Matius 12 - Tontemboan bible

Matius 12

¹ Asi sangando tumena in endo Sabat, si Yesus mawaya' lumangkoi im pangumaan ing gandum. Ampa'paan i maaremo, sé murit-Na maupu' im batuna ing gandum wo kanen éra.

²Keséré é tou Farisi in itu, icua éra a si Yesus, “Séréno, sé murit-Mu mengaéma' si ra'ica toro émaan asi endo Sabat.”

³ Taan isowat i Yesus ai séra, “Ra'ipé' réén binaca miow sapa e niéma' i Daud, an tutuw sia wo sé tou makiit sia maaremo?

⁴Sia muntep an Ténda Pengaapo'an a si Amang Kasuruan wo mindo i roti si ayumper si ra'ica toro kanen aluar sé imam, wo icesotna wo kanen éra mewali-wali ang karapi é makii-kiit sia.

⁵ Ra'ipé' réén binaca miow en aipatic ang kitap Torat sapaoka sé imam susur in endo Sabat matawoi am Balé Le'nas? Wo in taniitu séra ra'io makiit in atoran in endo Sabat, meséa' réén séra?

⁶Icua-Ku mangé ai camu, am bia'i awéan en lumébémai wo im Balé Le'nas.

⁷ Aipatic ang Kitap Le'nas tana'i, ‘Si icasalé'-Ku kaupusan, ra'ica raragés’. Sa réén wutul kailekan iow em peangé-angén in taar anio', tantu ra'ica wéan iow meséa' sé murit-Ku sé ra'ica meséa'.

⁸Ampa'paan si Toyaang i Tou awéan kawasa en tumu'tul im baya-waya icauntep in atoran in endo Sabat.”

⁹Itela'u i Yesus en tampa itu wo Sia muntep am balé paapo'an é agama Yahudi.

¹⁰Am bitu awéan si esa tou eng kamana esa imapalaio, wo am bitu awéan ka'i piraan tou Farisi sé maéré-éré ing kaséaan i Yesus. Séra mamuéi ai Sia, “Ro'na réén sumama' si tou sumakit an endo Sabat?”

¹¹ Icua i Yesus ai séra, “Sa awéan tou an uner iow makaanu esa domba wo si domba itu lumepok am bo'bok rarem asi endo Sabat, ra'ica réén mangéna icesot si domba asi wo'bok itu?

¹²Ra'ica réén tou en tayang lumébémai em bééna wo si domba? Ampa'paan in itu ro'na émaanta sé loor a sé tou an endo Sabat.”

¹³Wo icua i Yesus a si tou itu, “Yuluro mai eng kamamu!” Wo yulurna eng kamana, wo asi témpo ituke' imasama'o eng kamana itu puté wo si kamana esa.

¹⁴Wo sé tou Farisi itu kumesot am balé paapo'an, séra mepaar tumambisa e maté si Yesus.

¹⁵Kailekan i Yesus em pinepaar éra, ampa'paan in itu itela'u- Na en tampa itu. Taan keli en tou sé makii-kiit Sia wo séra im baya sinama'Na.

¹⁶Wo pinéro-Na séra eng kumua andumoro' Sia,

¹⁷wosama' malekep en taar si aicua i nabi Yesaya,

¹⁸ “Séréno, si anioo si Ata-Ku si sinisir-Ku, si caupus-Ku, Sia itu mengaarui in até-Ku. Iwéé-Ku oka e Roh-Ku ai Sia, wo Sia oka eng kumua sapaoka si Amang Kasuruan maai oka makim sé bangsa ra'ica tou Yahudi ang karapi ra'ica mengarapit.

¹⁹Sia ra'ica kawisa meindoan roma' wo ra'ica kawisa maangko', wo ra'ica kawisa ka'i lingan é tou Sia manuwu' an lala-lalan.

²⁰En saraw imeku' ra'ica lala'usen-Na in lumentu', wo en embung in sosoloan si mape'delo ra'ica lala'usen-Na i me'del, akar Sia muntung wo méé tuus sapaoka Sia ra'ica marapit.

²¹Sé bangsa ra'ica tou Yahudi maarap oka ai Sia.”

²²Kekawus in itu, iwali éra mai a si Yesus si esa tou si rinasuk i sétang. Si tou itu wola wo wowo', wo sia samaan i Yesus akar ro'nao maroma' wo maséré.

²³Wo mangaya-ngaya'ka' waya sé tou itu wo icua éra, “Sia itu wona' taranak i Daud si aijanji maai oka.”

²⁴ Taan tutuw é tou Farisi luminga in itu, icua éra, “Sia mausér sé sétang mapaké ing kawasa i Beelzebul, si kikiiten é sétang.”

²⁵Taan kailekan i Yesus em bewerot éra, wo icua-Na ai séra, “Sa an esa kakolanoan sé tou meréndé-réndéran, tantu eng kakolanoan itu makatongka-tongkar. Wo sa an esa kota kuma'pa esa pamalé meréndé-réndéran, tantuo ka'i eng kota wo em pamalé itu ra'ica kawisa tumang.

²⁶Taniitu ka'i sa si kikiiten é sétang musér sé sétang eng kaangéanna, séra itu meréndé-réndéran, tantuo eng kakolanoan itu ra'ica kawisa tumang.

²⁷Anaé, sa Aku musér sé sétang mapaké ing kawasa i Beelzebul, sé murit iow réén mengausér sé sétang mapaké ing kawasa i séi? Ampa'paan ituo sé murit iow in esa e méé oka tuus sapaoka kamu suméa'.

²⁸Taan sa Aku musér si sétang maké ing kawasa i Roh i Amang Kasuruan, en ulitna si Amang Kasuruan Kumawasao tanu Kolano an uner iow.

²⁹Kuma'pa tumambisa réén si esa tou ro'na muntep am balé i esa tou enté' e mandét ing kasiyaanna, sa ra'ica wa'kesenna owo si tou enté' itu? Pakawa'kesenna mio' sia wo ro'nao andétenna waya sé an untep im balé itu.

³⁰ Si séi si ra'ica kiim mewali-wali wo Yaku, sia masundur Yaku. Wo si séi si ra'ica kiim sumémbong lumi'us sé tou mai a Yaku, niéma'nao sé tou icatané-tané.

³¹Ampa'paan in itu icua-Ku ai camu, pakasa eng kamesé-meséaan wo en ojat é tou makéré oka kaampungan, taan séi si maojat si Roh Le'nas, ra'ica kawisa kaampungan.

³² Sa awéan tou manuwu' en sumundur si Toyaang i Tou, si tou itu ampungan oka. Taan sa sé ipanuwu'na maojat si Roh Le'nas, sia ra'ica kawisa kaampungan, intarépé' wo ka'i akar ing kauré-uré.”

³³ Sa en tuura icua miow loor, tantu loor ka'i em bua'na, taan sa en tuura icua miow ra'ica loor tantu ra'ica loor ka'i em bua'na. Ampa'paan asi wua'na ituo kailekanta en tuurana.

³⁴ Éi camu sé taranak i ula' rumacu-racung, tumambisa kamu ro'na kumua sé andumoro' in loor sa kamu in esa léwo'. Ampa'paan sapa en aicua im ba'ba' lumembo an até owo.

³⁵Si tou sama', em ipanuwu'na andumoro' sé loor, ampa'paan sé pakaéma'na an até andumoro' sé loor. Taan si tou léwo' em ipanuwu'na andumoro' sé léwo', ampa'paan sé pakaéma'na an até andumoro' sé léwo'.

³⁶Icua-Ku ai camu, asi endo kaka'puan ing kayo'baan panowaten oka é tou pakasa é nunuwu' ra'i-ra'i sé aicua éra.

³⁷Ampa'paan e nunuwu' miow in esao em pakén oka en tumantu sa kamu wutul kuma'pa makéré in ukuman.

³⁸ Asi témpo itu icua é piraan tou sé makailek wutul in Torat wo sé tou Farisi a si Yesus, “Guru, icasalé' ami suméré si Guru méma' esa tuus kakaya'kaan.”

³⁹ Taan icua i Yesus ai séra, “Kamu tou léwo' wo ra'ica le'tek anio' mangilek a Yaku méma' in esa tuus. Sé tou tanu icamu ra'ica turu'an-Ku esa tuus aluar in tuus si mamuali a si nabi Yunus.

⁴⁰ Ampa'paan kaputé i nabi Yunus mento' an untep im poot i sera' wangker telu ngando wo telu ngawengi, taniituo ka'i mai si Toyaang i Tou mento' oka an untep ing kubur telu ngando wo telu ngawengi.

⁴¹ Asi endo kaka'puan ing kayo'baan, sé tou Niniwe touen oka sumawel mewali-wali wo icamu sé menonou intarépé' wo séra oka e makim icamu. Ampa'paan sé tou Niniwe mape'diso an tutuw éra luminga in aicua i Yunus. En ulitna, an dior iow awéan Aku si lumébémai wo si Yunus, taan kamu ra'ica mape'dis!

⁴² Asi endo kaka'puan ing kayo'baan, si ratu Syeba a mékona owo touen oka sumawel mewali-wali wo icamu sé menonou intarépé', wo sia oka e makim icamu. Ampa'paan si ratu itu mai an tempok ing kayo'baan owo en luminga ing kapinteran i Salomo. En ulitna, Yaku am bia'i lumébémai wo si Salomo, taan ra'ica kiim iow luminga Yaku!”

⁴³“Sa si roh léwo' kumesotai asi esa tou, sia mangé lumi'cir in tana' karuinsungan e mangéré paento'an. Taan ra'ica kinéréanna.

⁴⁴Wo werotenna, ‘Aweso taré aku maréng angé sumawel am balé si aitela'ukuo itu’. Wo sia ka'i maréng angé wo sérénna em balé itu ra'io wana tou, kina'isano wo tinu'tulo sumama-sama'.

⁴⁵Wo mangéna uwasen sé pitu roh walina sé lumébémai eng kaléwo' wo isia. Wo séra muntep wo mento' am bitu. Sumiwak angé em peri i tou itu lumébéomai eng kaléwo'na asi cataré. Taniitu ka'i e mamuali a sé tou léwo' anio'.”

⁴⁶An tutuw i Yesus mapaaré' wo sé tou keli itu, si inang-Na wo sé mepoow wo i Sia mai am bitu. Séra makatulung ang kesot rumaméji meta'up wo Sia.

⁴⁷Wo icua i esa tou ai Sia, “Tuang, si inang wo sé mepoow wo si Tuang ang kesot. Séra rumaméji e meta'up wo si Tuang.”

⁴⁸Taan isowat i Yesus a si tou itu, “Si séi réén si inang-Ku? Si séi réén sé mepoow wo Yaku?”

⁴⁹Wo icua i Yesus in tumuru' a sé murit-Na, “Si anioo si inang-Ku wo sé poo-poow-Ku.

⁵⁰Ampa'paan si séike' si mengaéma' ing kasalé'an i Amang-Ku an sorga, siao si poow-Ku tuama, poow-Ku wéwéné wo inang-Ku.”