Read Tontemboan Matius 19 Bible Online

Matius 19 - Tontemboan bible

Matius 19

¹Kumawusai si Yesus masusui im pakasa in itu, itela'u-Nao en sangkum ing Galilea wo mangé an Yudea an lewet in doyongan Yordan.

²Kelian sé tou makiit Sia, wo sé tou sumakit an uner éra sinama'-Na.

³Wo mai piraan tou Farisi en tuma'kong Sia. Wuéien éra ai Sia, “Sa kumiit in ukum in agamata, ro'na réén si tuama icumawéngo cuméré si penanaanna maké in alasan sapake' mangé?”

⁴ Isowat i Yesus ai séra, “Tantu binacao miow ang Kitap Le'nas sapaoka tumo'tolke' mai asi cataré niéma' i Amang Kasuruan sé tou, ‘Niéma'-Na tuama wo wéwéné.’

⁵ Wo en aicua-Na ka'i tana'i, ‘Ampa'paano in itu, si tuama tumela'u oka si amang wo si inangna wo meesa ang karapi i penanaanna, wo séra in dua meesao.’

⁶Wo in taniitu séra ra'io ka'i rua, taan esa. Ampa'paan in itu, sapa sé pineesao i Amang Kasuruan, ra'io toro petanén é tou.”

⁷ Icua éra ai Sia, “Sa taniitu, kéitu réén aiperénta i Musa sa si tuama cuméré si penanaanna musti méé surat céré?”

⁸Wo isowat i Yesus, “Niénan i Musa kamu mabacéré wo si penanaan iow ampa'paan kamu keté ro'kos. Taan tumo'tolke' mai indior ra'ica kiim i Amang Kasuruan kamu méma' in taniitu.

⁹ Taan icua-Ku mangé ai camu, sé tuama cuméré si penanaanna wo kumawéng sumawel wo si wéwéné walina, si tuama itu mabersinao, aluar si penanaanna itu mabersinao ang karapi é tuama walina.”

¹⁰Kelinga in itu, sé murit i Yesus kumua ai Sia, “Sa tanu siitu e mamuali a sé mempenanaan, lébé loor séra ra'ica kumawéng.”

¹¹Taan icua i Yesus ai séra, “Ra'ica pakasa sé tou makawoo tumerima in sususuien itu. Wayake' sé tou aitantuo mai i Amang Kasuruan.

¹²Awéan tou ra'ica icakawéng ampa'paan ketounake' mai tanuo siitu. Awéan ka'i ra'ica icakawéng ampa'paan niéma' é tou walina akar mamuali tanu siitu. Awéan ka'i sé ra'ica icumawéng ampa'paan kasalé'anna in esa, wosama' séra ro'na maké in témpo éra en sumelewir si Amang Kasuruan. Si tou makawoo tumerima in sususuien-Ku anio', lébé loor terimana en itu.”

¹³Wo paalinai é tou sé toyaang teké' a si Yesus wosama' Sia ro'na maro ing kama-Na ai séra wo isombayang-Na. Taan sé tou itu aicae'bowke' é murit-Na.

¹⁴Taan icua i Yesus a sé murit-Na, “Iwayao mio' sé toyaang itu maai a Yaku! Tioo pepéro-péronen séra, ampa'paan sé tou tanu sé ituo e makaanu ing Kakolanoan in Sorga.”

¹⁵Kumawus in itu, si Yesus maro ing kama-Na a sé toyaang itu wo isombayang-Na séra. Wo Sia kumesot am bitu.

¹⁶Asi sangando, awéan si esa tuama mai a si Yesus, wo wuéienna, “Guru, sapa si loor e musti émaanku e makéré ing katouan akar ing kauré-uré?”

¹⁷Wo isowat i Yesus ai sia, “Kéitu réén ko mamuéi a Yaku andumoro' sapa si loor? En loor wayake' in Esa. Taan sa ko masalé' makéré ing katouan akar ing kauré-uré, musti kiitenmu em perénta-perénta i Amang Kasuruan.”

¹⁸ Wo wuéien ka'i i tou itu, “Perénta-perénta sapa e musti émaanku?” Isowat i Yesus ai sia, “Tioo mengapaté tou, tioo mengabersina, tioo mengarombit, tioo mengasairi in towo,

¹⁹siriin angé si amang wo si inangmu, wo mengaupus angé sé kakélému tou meputé ko mengaupus in owakmu in esa.”

²⁰Wo icua i tou wo'bas itu a si Yesus, “Pakasa em perénta itu niéma'kuo waya. Sapapé' sé ra'ipé' niéma'ku?”

²¹Icua i Yesus ai sia, “Sa ko masalé' mamuali tou makakii-kiit am beren i Amang Kasuruan, mangé iwangkéro waya eng kasiyaanmu, wo iwééo mio' en itu a sé tou lengéi, wo in taniitu kéréanmu oka eng kasiyaan an sorga. Kumawus in itu mayoo wo kumiito mai Yaku.”

²²Kelinga in aicua i Yesus, si tou wo'bas itu makala'us maya' ang karapi im bendu en até, ampa'paan keli eng kasiyaanna.

²³Wo icua i Yesus a sé murit-Na, “En ulitna icua-Ku mangé ai camu, susa keli sé tou siya' muntep ang Kakolanoan in Sorga.

²⁴Wo icua-Ku ka'i sumawel ai camu, lébé taporak si esa onta muntep am bo'so im biwilit wotaré si tou siya' muntep ang Kakolanoan i Amang Kasuruan.”

²⁵Kelinga in itu, sé murit i Yesus mangaya-ngaya'ka'. Wo icua éra, “Sa taniitu, si séi réén e ro'na malowir?”

²⁶Wo téintengen i Yesus séra wo icua-Na, “En tou ra'ica makawoo lumowir in owak in esa. Taan si Amang Kasuruan ro'na lumowir waya sé tou ampa'paan em baya-waya ro'na émaan-Na.”

²⁷Wo icua i Petrus a si Yesus, “Kami anio' itumela'uo im baya-waya wo kami kumiito si Guru. Anaé, sapa réén eng kéréan ami sa?”

²⁸ Icua i Yesus ai séra, “En ulitna icua-Ku mangé ai camu, ang kayo'baan weru, si Toyaang i Tou lumukut oka am palukutan-Na iparayo-rayo wo pasiri-siriin e makim waya sé tou. An tutuw itu, kamu im baya é murit-Ku lumukut oka ka'i asi sangapulu' rua palukutan pasiri-siriin mewali-wali wo Yaku e makim sé sangapulu' rua suku é Israel.

²⁹Wo si tou itumela'- uo im baléna, sé metuari wo isia tuama kuma'pa wéwéné, si amangna kuma'pa si inangna, kuma'pa sé toyaangna kuma'pa umana ampa'paano ing kumiit Yaku, terimanna oka waya en iitu sangaatus lumepet wo makéré oka ing katouan akar ing kauré-uré.

³⁰ Taan keli en tou kumataré-taré mamuali oka tou sumomo-somoi, wo sé tou sumomo-somoi mamuali oka tou kumataré-taré.”