Read Tontemboan Matius 20 Bible Online

Matius 20 - Tontemboan bible

Matius 20

¹Icua i Yesus, “Taniitu ka'i andumoro' ing Kakolanoan in Sorga meputé wo in andéan anio'. Awéan esa tou maka- uma wo en umana niusewan in anggor. Matawi mando, sia kumesot e mangéré tou mangé tumawoi an uma in anggorna.

²An tutuw sia makéréo piraan tou en tumawoi, sia meroma' wo iséra en laasa iwérna ai séra sangando esa dinar. Wo iru'du'na séra mangé tumawoi an uma in anggorna.

³Wona' in jam sembilan imamoondo, sia maya' ka'i mangé am pasar, wo sérénna awéané' piraan tou sé ra'ica wana kaakoan.

⁴Icuana ai séra, ‘Mangéo taré tumawoi kamu an uma in anggorku, wo wéranku oka kamu si patus pawér ai camu.’ Kelinga in itu, séra makala'us mangé tumawoi.

⁵Wo asi jam dua belas wo in jam tiga im bawaando, sia kumesot ka'i sumawel mangé am pasar mangéré tou tumawoi.

⁶Wona' in jam lima im bawaando sia kumesot ka'i sumawel wo ipeta'upna ka'i tou walina. Icuana ai séra, ‘Kéitu réén kamu asalo mengena-ngena' am bia'i, ra'ica réén wana eng kaakoan iow asi endo anio'?’

⁷Wo isowat éra ai sia, ‘Ra'ica wana tou en tume'tek ai cami.’ Wo icuana ai séra, ‘Sa taniitu, mangéo taré kamu tumawoi an uma in anggorku!’

⁸ An tutuw tawio imuntep si yéndo, icua i makauma itu a si mandorna, ‘Towano mai waya sé tou itumawoi wo wérano mio' en laasa éra, tumo'tol asé tou sosomoi mangé itumawoi akar asé tou imangé kataré-taré.’

⁹Wo mai sé tou itumawoi tumo'tol asi jam lima im bawaando, en tinerima éra mekélé esa dinar.

¹⁰Wo mai sé tou tine'tekkan tumo'tol i mamoondo. Em pawasan éra en laasa iwér ai séra kumeli mai wo sé tou mai tumawoi sosomoi. Taan en tinerima éra wayake' in esa dinar.

¹¹Pakateriman éra mai en doit itu, séra mangingimburung oka a si makauma itu.

¹²Icua éra, ‘Tuang, sé tou mai tumawoi sosomoi en aitawoi éra wayake' in satu jam, taan en aiwér ai séra meputéke' wo en aiwér ai cami sé itumawoi uter sangando wo imendamo ing kapaso' i yéndo.’

¹³Taan icua i makauma itu a si esaan ai séra, ‘Poow, ra'ica wana eng kaséaanku ai co. Ampa'paan niénanmuo sapaoka em bérku ai co esa dinar en sangando.

¹⁴Anaé, indono en laasamu wo maréngo. Kasalé'anku in esa e mér sé tou mai tumawoi sosomoi anio' meputé wo en aiwérku ai co.

¹⁵Si séi e méro yaku e maké in doitku in esa kumiit ing kasalé'anku? Kuma'pa panganatenmu réén ampa'paan aku tumuru' ing kalooranku a sé tou anio'?’

¹⁶ Taniituo ka'i e mamuali sa, sé tou kumataré-taré mamuali oka tou sumomo-somoi, wo sé tou sumomo-somoi mamuali oka tou kumataré-taré.”

¹⁷An tutuw i Yesus wo sé murit-Na ang karoro'an imawaya' maangé an Yerusalem, an uner in lalan towan-Na sé sangapulu' rua murit-Na mali'usai ai Sia wo icua-Na ai séra,

¹⁸“Intarépé' kita maangé an Yerusalem. A mangé mbitu si Toyaang i Tou isarakan oka a sé kikiiten é imam wo sé makailek wutul in Torat wo wéan éra oka Sia ukuman patén.

¹⁹Isarakan éra oka Sia a sé bangsa ra'- ica Yahudi wosama' Sia para'i-ra'ien, samboken wo isalip éra. Taan asi endo katelu Sia touen oka sumawel.”

²⁰Si Penanaan i Zebedeus ang karapi é rua toyaangna mai a si Yesus, wo kumundu an dior-Na e mangilek ai Sia.

²¹Wuéien i Yesus ai sia, “Sapa réén em pangileken i inang?” Icuana a si Yesus, “Guru, sa si Guru kumawasao tanu Kolano, iru'du'o sé rua toyaangku anio' si esa lumukut ang kakan wo si esa ka'i ang ka'biri i Amang.”

²²Taan isowat i Yesus ai séra, “Ra'ica kailekan iow sapa em pinangilek iow. Makawoo réén kamu melep asi paelepan si musti elepen-Ku?” Wo isowat éra, “Én kawooan ami.”

²³Icua i Yesus ai séra, “Mémang kamu melep oka asi paelepan si musti elepen-Ku. Taan andumoro' in lumukut ang kakan wo ang ka'biri-Ku, Yaku ra'ica wana hak en tumantu ampa'paan sé palukutan itu aitu'tulo i Amang-Ku a sé tou si aitantu-Nao.”

²⁴Kelinga in itu wo sé sangapulu' murit-Na mae'bow a sé rua metuari itu.

²⁵ Taan towan i Yesus pakasa sé murit-Na, icua-Na ai séra, “Kailekan iow sé makatimboi ing kakawasaan a sé bangsa sé ra'ica makatuus si Amang Kasuruan, séra maperénta sé tou éra kumiit ing kasalé'an éra. Wo sé kikiiten pasiri-siriin ka'i mengaokoi a sé tou kiit ing kasalé'an éra.

²⁶Taan kamu ra'ica toro mengaéma' tanu siitu! Si séike' e masalé' mamuali tou wangko', aweso taré' sia sumelewir icamu.

²⁷Wo si séi e masalé' mamuali tou pasiri-siriin, sia musti sumelewir icamu tanu ata.

²⁸En itu meputé wo si niéma' i Toyaang i Tou. Sia maai ang kayo'baan anio' ra'ica maai selewiran é tou taan en sumelewir sé tou wo méé in owak-Na in esa en tumu'bus ing kamesé-meséaan é tou keli.”

²⁹An tutuw i Yesus wo sé murit-Na tumela'u ing kota Yerikho, keli en tou mengii-ngiit Sia.

³⁰An tembir in lalan awéan rua tou wola makalukut. Kelinga éra si Yesus malangkoi wo séra mangko', “Tuang, taranak i Daud, icaupusai kami!”

³¹Wo romaan é tou keli séra in dua wosama' menes, taan séra in dua makataangko'ke' taré matowa, “Tuang, taranak i Daud, icaupusai kami!”

³²Wo si Yesus mento' wo towan-Na sé rua tou itu wo wuéien-Na ai séra, “Sapa en casalé' miow émaan-Ku ai camu?”

³³Isowat éra, “Tuang, icasalé' ami em beren ami ro'na suméré.”

³⁴Wo mai eng kaupusan i Yesus ai séra in dua wo isuun-Na ing kama em beren éra. An tutuw ituke' séra ro'nao maséré wo séra kumiit Isia.