Read Tontemboan Matius 21 Bible Online

Matius 21 - Tontemboan bible

Matius 21

¹An tutuw i Yesus wo sé murit-Na tawio in Yerusalem wo icateka' am Betfage si an Tolaina in Zaitun, wo ru'du'-Na sé rua murit-Na.

²Icua-Na ai séra, “Mangém kamu asi roong an dior itu. Am bitu kaséréan iow oka esa keledai siwéi en talina ipakawa'kes wo an duru i celedai siwéi itu awéan si ana'na. Wukaano mio' en talina wo paalino mai a Yaku.

³Sa awéan tou tumegor icamu, icuao mio' in tana'i, ‘Paperlun i Tuang ami, wo makala'us oka iwaréng-Na mai sumawel am bia'i.’ ”

⁴Pakasa en itu mamuali wosama' malekepo sapa en aicua i nabi tana'i,

⁵ “Icuao mangé a sé tou an Yerusalem,[5] ‘Sérén, si Colano miow maayo ai camu. Sia ko'kos en até, makalukut am bawo i esa keledai, si esa keledai wo'basé'.’ ”

⁶Wo sé rua murit itu mangé, émaan éra meputé wo si aitaar i Yesus ai séra.

⁷Paalin éra mai si celedai siwéi wo si ana'na a si Yesus. Wo ya'li' éra eng karai éra an licur i celedai wo si Yesus lumukut am bawo i celedai itu.

⁸An tutuw i Yesus malangkoi, keli en tou maa'li' ing karai éra an lalan. Awéan ka'i sé mangé mokol im panga-pangana rintek ang karapi in lalaina wo yelur éra an lalan.

⁹ Wo sé tou keli mawaya' an dior-Na wo awéan ka'i sé makiit an somoi. Séra mewali-wali maangko', “Hosana a si taranak i Daud! Irayoo mangé Sia si mai ang karapi i ngaran i Amang Kasuruan! Hosana ai Sia asi tampa rumangka-rangka'!”

¹⁰An tutuw i Yesus muntep an Yerusalem, sé tou ang kota itu merega-rega. Wo séra membum-buéian, “Si séi si tou itu?”

¹¹Isowat é tou keli sé makiit si Yesus, “Sia itu si nabi Yesus a Nazaret owo si ang Galilea!”

¹²Wo si Yesus muntep ang kintal im Balé Le'nas. Am bitu sérén-Na sé tou mawangkér wo mateles, wo yusér-Na séra. Iwalintuang-Na e méja-méja pasawelan éra in doit wo em palukutan é mawangkér sé mombo.

¹³ Wo icua-Na ai séra, “Ang Kitap Le'nas awéan en aipatic in tana'i, ‘Em balé-Ku patuulen oka é tou walé pengasombayangan.’ Taan niéma'o miow tampa mauwak sé tou!”

¹⁴Kumawus in itu, sé tou wola wo sé tou kénto' mai ai Sia ang kintal im Balé Le'nas, wo séra sinama'-Na.

¹⁵An tutuw sé kikiiten é imam wo sé makailek wutul in Torat isuméré ing kakaya'kaan niéma'-Na, wo iluminga sé toyaang mengangko-ngangko' ang kintal im Balé Le'nas, “Hosana, a si taranak i Daud!”, wo séra mae'bow keli.

¹⁶ Wo icua éra a si Yesus, “Pinalinga-Mu sé ipaangko' é toyaang itu?” Isowat i Yesus ai séra, “Én, pinalinga-Ku. Ra'ipé' réén binaca miow si aipatic ang Kitap Le'nas si cumua in tana'i, ‘Aisusui-Muo a sé toyaang teké' wo a sé toyaang masusupé' e rumayo i makakii-kiit.’ ”

¹⁷Kumawus in itu, itela'u-Na séra. Sia kumesot in Yerusalem mangé an doong Betania wo Sia mento' sanga wengi am bitu.

¹⁸Mio' mandomai, si Yesus wo sé murit-Na maréng sumawel an Yerusalem, an uner in lalan Sia maarem.

¹⁹Wo an tembir in lalan sérén-Na awéan tuur in ara. Wo rurun-Na mangé e mengat im bua'na in ara itu, taan ra'ica kinéréan-Na, aluar in lalainake'. Wo icua-Na a si tuur itu, “Ico ra'io kawisa mua' akar ing kauré-uré!” Wo asi témpo ituke' en tuur in ara itu makala'us mapera.

²⁰An tutuw sérén é murit i Yesus en itu, séra mangaya-ngaya'ka', wo wuéien éra, “Tumambisa en tuura in ara itu makala'us imapera?”

²¹ Isowat i Yesus ai séra, “En ulitna icua-Ku mangé ai camu, sa kamu mercaya wo ra'ica marua-rua wasa, kamu ro'na iméma' tanu si niéma'-Ku asi tuur in ara itu. Wo ro'na ka'i peréntan iow si tolaina anio', ‘Icaangkaio wo icawangkilo mangé an ta'sic!’, tantu en itu mamuali oka.

²²Anaé, sapake' em pangileken iow an sombayang wo uli-ulit percayan iow, tantu sapa em pinangilek iow teriman iow oka.”

²³An tutuw i Yesus icateka'o ang kintal im Balé Le'nas wo Sia tumo'tolo sumusui a sé tou, wo mai sé kikiiten é imam wo sé matu'a é tou Yahudi. Wuéien éra, “Maké ing kawasa sapa réén akar ro'na émaan-Mu waya en itu? Si séi réén e iméé ing kawasa itu ai Co?”

²⁴Isowat i Yesus ai séra, “Yaku ka'i méé esa wuwuéien ai camu. Sa kasowatan iow em buéien-Ku, sowaten-Ku oka ka'i em buéien iow andumoro' ing kawasa sapa akar émaan-Ku waya en itu.

²⁵Sa iciit icamu, si Yohanes Mabaptis maptis sé tou imaké réén ing kawasa i séi? Asi Amang Kasuruan owo kuma'pa asé tou owo?” Wo séra wo i séra mengkuanan, “Sa icuata, ‘Asi Amang Kasuruan owo’, tantu icua-Na oka ai cita, ‘Sa taniitu, kéitu réén sia ra'ica percayan iow?’

²⁶Taan sa icuata, ‘Asé tou owo’, caindé'ta sé tou keli itu, ampa'paan paanggapen éra si Yohanes itu esa nabi.”

²⁷Wo isowat éra a si Yesus, “Ra'ica kailekan ami!” Wo icua i Yesus ai séra, “Sa taniitu, ra'ica icua-Ku ka'i ai camu asi séi owo eng kawasa a Yaku akar émaan-Ku waya en itu.”

²⁸“Wo sa iciit icamu, tambisa andumoro' in andéan anio'? Awéan esa amang makatoyaang rua tuama. Asi makasa sia mangé a si toyaangna luluna, wo icuana, ‘Toyaangku, asi endo anio' ico mangéo tumawoi an uma in anggor.’

²⁹Isowat i toyaang itu, ‘Ra'ica kiimku é amang.’ Taan sia imangéke' an uma in anggor.

³⁰Wo si amang mangé ka'i a si toyaangna karua, wo icuana, ‘Asi endo anio' ico mangéo tumawoi an uma in anggor.’ Isowat i toyaang karua itu, ‘Én é amang.’ Taan sia ra'ica imangé tumawoi an uma in anggor.

³¹Anaé, sa iciit icamu, si séi ai séra in dua e méma' ing kasalé'- an i amang éra?” Isowat éra, “Si toyaang luluna.” Wo icua i Yesus ai séra, “En ulitna icua-Ku mangé ai camu, sé matagi im pajak wo sé wéwéné sundal en dior muntep ang Kakolanoan i Amang Kasuruan wo icamu.

³² Ampa'paan an tutuw i Yohanes Mabaptis mai sumusui ai camu tambisa menonou wosama' nianggap wutul i Amang Kasuruan, taan ra'ica pinercaya miow en aicuana. Taan sé matagi im pajak wo sé wéwéné sundal mercaya ai sia. Wo mandé ka'i sinéréo miow sapaoka séra itu mercaya, taan em bewerot iow ra'ica mawalina, kasake' tuu ra'ica pinercaya miow en aicuana.”

³³ “Lingan iow ka'i si esa andéan walina: Awéan si esa makauma imuka' uma usewan in anggor wo pagerenna waya en lumi'cir in uma itu. Wo sia kuma'il esa lo'beng an tana' em patepesan in anggor. Wo toorna terung rangka' an uma itu, paento'an i matéir in uma. Wo iséwana en uma itu a sé tou matawoi in uma kumawus in itu sia mangé an doong walina.

³⁴An orasnao en anggor upuun, iru'du'na sé atana mangé a sé matawoi an umana, e mangilek im buéna si mamuali bagéanna.

³⁵Taan sé ata itu tinangka'ke' é tou matawoi in uma. Si esa pinangkur wo sé walina pinaté wo sé walina ka'i winangkil éra im batu.

³⁶Wo iru'du'na ka'i sumawel sé atana walina maangé a sé matawoi in uma, kumeli mai wo sé airu'du'na kataré. Taan e niéma' é matawoi in uma a sé ata itu puté ka'i wo si niéma' éra a sé ata sé airu'du' kataré.

³⁷Sumiwakio', ru'du'na si toyaangna in esa mangé ai séra icuana, ‘Sa si toyaangku in esa tantu siriin éra oka.’

³⁸Taan an tutuw i toyaang i makauma itu sérén é matawoi in uma itu wo séra mengkuanan, ‘Siao e makaanu in uma anio' sa. Mayoo paténta sia wo en uma anio' mamuali oka anuta.’

³⁹Wo tangkaan éra si toyaang i makauma itu, wo iwangkil éra ang kesot in uma wo patén éra.

⁴⁰Sa si makauma itu mai, sapa en émaan oka i makauma in anggor a sé tou matawoi itu?”

⁴¹Isowat éra a si Yesus, “Tantu paténna oka sé tou léwo' itu, wo en umana itu iséwana oka a sé matawoi walina sé masalé' méé im buéna in uma itu ai sia an orasna in upuun.”

⁴² Wo icua i Yesus ai séra, “Ra'ipé' réén binaca miow si aipatic ang Kitap Le'nas icumua in tana'i, ‘Watu aitiya' é bas, imamualio watu patuuran. Niéma' i Amang Kasuruan en itu, wo sérénta e niéma'-Na itu uli-ulit ra'io cakua!’

⁴³Ta'néien sumama-sama' en anio'! Indon oka sumawel i Amang Kasuruan en hak iow mamuali tou ang Kakolanoan-Na, wo iwéé-Na oka en hak iow itu a sé bangsa walina sé masalé' le'tek maéma' ing kasalé'an-Na. [

⁴⁴Wo si séike' en lumepok asi watu itu, sia mamu'muk oka. Wo si séi e rongkoran im batu itu, sia makamu'mu-mu'muk oka tanu awu.]”

⁴⁵An tutuw é kikiiten é imam wo sé tou Farisi iluminga in andéan aicua i Yesus, makala'uso kailekan éra en aicua i Yesus itu andumoro' iséra.

⁴⁶Anaé, raméjin éra in tumangka' Sia, taan icaindé' éra sé tou keli, ampa'paan kailekan éra si Yesus itu nabi.