Read Tontemboan Matius 23 Bible Online

Matius 23 - Tontemboan bible

Matius 23

¹Wo icua i Yesus a sé tou keli wo a sé murit-Na,

²“Sé makailek wutul in Torat wo sé tou Farisi makéré kawasa masusui in ukum i Amang Kasuruan a sé tou, meputé wo si Musa indior.

³Ampa'paano in itu musti lingan wo émaano waya sé aisusui éra ai camu. Taan tioo kiiten iow em peri éra, ampa'paan em pasusui éra ai camu ra'ica pengaémaan éra.

⁴Kelian en atoran uter sé niéma' éra wo iru'du' éra émaan é tou, taan séra in esa ra'ica kiim méma' in atoran itu. En itu tanu séra ma'kes im barang uter wo iwéé éra wuléngen é tou taan séra in esa ra'ica kiim sumémbong.

⁵ Pakasa em pengaémaan éra asalo ipapaturu' éra a sé tou. Séra mengapaké in tali sombayang si aipetutu' éra winangkeran toyo' wo e rumbai in juba aipetutu' éra ka'i linambot.

⁶Séra masalé' malukut an tampa im pasiri-siriin am pésta wo am balé-walé paapo'an é agama Yahudi.

⁷Séra masalé' pasiri-siriin é tou am pasar wo masalé' ka'i patuulen é tou ‘guru’.

⁸Taan kamu, tioo masalé' im patuulen éra ‘guru’! Ampa'paan si Guru miow wayake' in esa wo icamu im baya mepoow.

⁹Wo tioo kamu matuul a si séike' ‘amang’ ang kayo'baan anio', ampa'paan si Amang iow wayake' in esa, si Amang an sorga.

¹⁰Tioo ka'i kamu masalé' im patuulen éra ‘kikiiten’, ampa'paan wayake' in esa eng Kikiiten iow, Siao si Kristus.

¹¹ Anaé, si séi masalé' mamuali tou pasiri-siriin an esaan angé ai camu, sia musti mamuali tou si mengaselewir icamu.

¹² Si séi e mengarangka' in owak, sia iwawa' oka. Taan si séike' e mengawawa' in owak, sia iparangka-rangka' oka.”

¹³“Icawangkuro mio' kamu sé makailek wutul in Torat wo sé tou Farisi! Kamu anio' tou punek. Ampa'paan pengakalaan iowke' sé tou masalé' muntep ang Kakolanoan in Sorga. Icamu in esa ra'- ica kiim muntep ang Kakolanoan in Sorga, akar pengakalaan iow sé tou masalé' muntep ang Kakolanoan in Sorga. [

¹⁴Icawangkuro mio' kamu sé makailek wutul in Torat wo sé tou Farisi! Kamu tou punek, ampa'paan pauwaken iow sé wéwéné balu e mandét im balé éra. Wo mengaakal sé tou ang karapi in sombayang lalambotan. Ampa'paan in itu kéréan oka miow en ukuman si uter keli.]

¹⁵Icawangkuro mio' kamu sé makailek wutul in Torat wo sé tou Farisi! Kamu anio' tou punek. Icamu imaya'o tayang lumangkoi in ta'sic wo ing katanaan asalo i maéré-éré si esa tou eng kumiit in sususuien in agama miow. Taan an tutuw i tou itu icumi- ito in sususuien in agama miow, niéma' miow sia mamuali tou si sumiwak muntep an api ra'ica mape'de-pe'del akar ing kauré-uré, wo eng kaléwo'na makarua lumepet wo ing kaléwo' miow.

¹⁶Icawangkuro mio' kamu sé kikiiten wola! Kamu anio' puté wo si tou wola maakin sé tou wola walina! Ipasusui iow a sé tou, ‘Sa si tou sumumpa maké im Balé Le'nas, en sumpana itu ro'nake' ra'ica émaanna. Taan sa sia sumumpa maké i mas am Balé Le'nas, en sumpana itu musti émaan.’

¹⁷Éi camu tou bodok wo tou wola! Si wisa en lébé penting, mas kuma'pa Walé Le'nas si méma' i mas itu male'nas?

¹⁸Ipasusui iow ka'i, ‘Si séi en sumumpa maké im pawetaan i raragés am Balé Le'nas, en sumpana itu ro'nake' ra'ica émaanna. Taan sa sia sumumpa maké i raragés si am bawo im pawetaan i raragés itu, en sumpana itu musti émaan.’

¹⁹Éi camu tou wola! Si wisa réén en lébé penting, raragés kuma'pa pawetaan i raragés si méma' i raragés itu male'nas?

²⁰Anaé, si séike' sumumpa ang karapi im pawetaan i raragés, sia isumumpao imaké im pawetaan i raragés wo ka'i pakasa sé raragés am bawona.

²¹Si séike' sumumpa imaké im Balé Le'nas, sia isumumpao imaké im Balé Le'nas wo ka'i Sia si maento' am bitu.

²² Si séike' en sumumpa imaké in sorga, sia isumumpao imaké im palukutan pasiri-siriin i Amang Kasuruan wo ka'i Sia si makalukut am palukutan pasiri-siriin itu.

²³ Icawangkuro mio' kamu sé makailek wutul in Torat wo sé tou Farisi! Kamu anio' tou punek. Em pengawéé miow sanga pepulu' a si Amang Kasuruan wuéna i nanamur ruminte-rintek tanumai salasi, adas tombal wo jintan. Taan si penting keli an ukum Torat ra'ica pengaémaan iow, tanumai tioo mengarapit, mengaturu' mangé ing kaupusan a sé tou walina, kasake' le'tek maéman a si Amang Kasuruan. Pakasa en itu musti émaan iow wo tioo pelupa miow e méma' sé walina.

²⁴Icamu sé kikiiten wola! Si réong an elepen iow pengatapisen iow,[6] taan si onta an untepna pengalo'moten iow.

²⁵Icawangkuro mio' kamu sé makailek wutul in Torat wo sé tou Farisi. Icamu anio' tou punek. Icamu meputé wo sé mawu'as im pakakas paelepan wo em pakanan ang kesotnake', tanu siituo em peri miow pakasérén ang kesot maéma' in atoran in agama, taan en até miow wuta ing kalongi'an wo mengaandét in anu é tou.

²⁶Éi tou Farisi wola! Wu'asan owo en an untep im paelepan wo em pakanan itu wosama' ang kesotna ka'i maweresi.

²⁷ Icawangkuro mio' kamu sé makailek wutul in Torat wo sé tou Farisi! Icamu anio' tou punek. Icamu itu puté wo ing kubur kinisu ing kulo'. Ang kesot kaséréan pasung, taan an untepna mawuta-wuta in du'i é tou imaté wo pakasa im buruk sé membam-balinaan.

²⁸Tanu siituo ka'i em peri miow, pakasérén kéndo' tanuoka sé tou maéma' im butul, taan en até miow mawuta-wuta ing kapunekan wo ing kaléwo'an.

²⁹Icawangkuro mio' kamu sé makailek wutul in Torat wo sé tou Farisi! Kamu anio' tou punek. Niéma' miow sumawel eng kubur é nabi sé pinaté é apo-apo' miow, wo pinerong iow ka'i en tugu pata'néian é tou le'tek a si Casuruan.

³⁰Wo icua miow in tana'i, ‘Sa kami menonou an jaman é apo-apo' ami indior, tantu ra'ica kiim ami kumiit tanu iséra sé maté sé nabi.’

³¹Wo in taniitu, e nunuwu' miow ituo en tumuru' sapaoka kamu itu taranak é tou sé maté sé nabi.

³²Anaé, lekepeno mio' taré eng kaléwo'an sé aito'tolo é apo-apo' miow indior itu.

³³ Éi camu tou léwo', eng kaléwo' miow meputé wo si ula' rumacu-racung, ampa'paan kamu taranak é tou léwo'. Tumambisa kamu ro'na icawekar an ukuman in api ra'ica mape'de-pe'del akar ing kauré-uré?

³⁴Ampa'paan in ituo yutus-Ku oka mai ai camu sé nabi, sé tou pandéi wo sé makailek wutul in Torat. Taan awéan ai séra itu patén iow oka wo sé walina isalip iow. Sé walina ka'i okoien iow oka am balé-walé paapo'an iow wo awéan ka'i sé paangi-angiten iow asi kota esa akar asi kota walina.

³⁵ Anaé ukumen oka i Amang Kasuruan kamu ampa'paan kamu wo sé apo-apo' miow indior imaté sé tou sé ra'ica wana kameséaan, tumo'tolai asi Habel tou nianggap wutul itu akar a si Zakharia toyaang i Berekhya. Si Zakharia itu pinaté am Balé Le'nas am paawuun ing Kamar Le'nas wo em pawetaan i raragés.

³⁶En ulitna icua-Ku mangé ai camu, pakasa sé andumoro' ing kaléwo'an itu pamuléngen oka é tou menonou intarépé'.”

³⁷“Éi tou Yerusalem! Pinaté miow sé nabi, wo ka'i winangkil iow im batu sé tou ayutusai i Amang Kasuruan. Makapirao Aku masalé' lumi'us icamu im baya mai anduru-Ku, meputé si inang é ko'ko' lumi'us sé sisina an darem in tétéléwna. Taan ra'ica kiim iow.

³⁸Ampa'paan in ituo eng kotamu itela'u oka wo mamuali oka lulu in tou.

³⁹ Icua-Ku ai camu, tumo'tol asi oras anio' Yaku ra'io kaséréan iow. Sérén iow oka Aku, an oras-Ku maai sumawel, wo icua miow, ‘Irayoo mangé Sia si mai ang karapi ngaran i Amang Kasuruan.’ ”