Read Tontemboan Matius 26 Bible Online

Matius 26 - Tontemboan bible

Matius 26

¹Kekawus i Yesus sumusui waya in itu, icua-Na a sé murit-Na,

² “Kailekan iow, en endo wangko' Paska waya oka i rua ngando wo si Toyaang i Tou isarakan oka in salipen.”

³Asi témpo itu, sé kikiiten é imam wo sé matu'a é tou Yahudi mali'us am balé paento'an i imam wangko' makangaran Kayafas.

⁴Séra mepaar wo mawasa en tumangka' si Yesus ang karapi i maene-enep e maté Sia.

⁵Taan séra mengkuanan,“Tioo tumangka' Sia asi endo wangko' Paska, wosama' sé tou ra'ica méma' ing kalicokoan.”

⁶An tutuw i Yesus am Betania, Sia tumuli am balé i Simon si sumangkumo sinakitan ing kusta.

⁷ Ang karoro'an i Yesus makalukut i makan, wo mai ai Sia si esa wéwéné maali-ali im botel teké' niéma' am batu pualam owo, si pinumpunan in solo mawou manam sosor keli em bééna. Wo inaamna en solo itu an do'kos i Yesus.

⁸E niéma' i wéwéné itu sinéré é murit i Yesus, wo séra mae'bow. Icua éra, “Kéitu réén en solo itu ipengéla-ngélanake'?

⁹Ampa'paan en solo itu sosor keli em bééna! Aweso taré en solo itu iwangkér, wo en doit itu ro'na iwéé a sé tou lengéi.”

¹⁰Taan kailekan i Yesus em pawero-weroten éra wo icua-Na, “Kéitu réén kamu sumusa si wéwéné anio'? E niéma'na a Yaku loor.

¹¹ Ampa'paan sé tou lengéi tatap ang karapi miow wo séra ro'na tawangen iow. Taan Aku ra'io uré mewali-wali wo icamu.

¹²Ampa'paan an tutuw sia numaam in solo an owak-Ku, meputéo sia tumu'tulo in owak-Ku en icubur.

¹³En ulitna icua-Ku mangé ai camu, am bisake' sé tou makua in Abar Kaaruien a sé tou ang kayo'baan, tantu ipakua éra oka ka'i sapa e niéma' i wéwéné anio' a Yaku, en tuma'néi sia.”

¹⁴Awéan esaan asé sangapulu' rua murit i Yesus, makangaran i Yudas Iskariot mangé a sé kikiiten é imam.

¹⁵ Wo icuana ai séra, “Sapa em béé oka miow a yaku sa si Yesus isarakanku ai camu?” Wo wéran éra ai sia telu ngapulu' roit pérak.[8]

¹⁶Tumo'tolai asi témpo itu si Yudas maéré-éré témpo loor en sumarakan si Yesus ai séra.

¹⁷Asi endo kataré in endo wangko' Roti Ra'ica Rinagian, sé murit i Yesus mai ai Sia wo mamuéi, “Guru, am bisa réén en icasalé' i Guru tu'tulan ami ing kakanen Paska torona i Guru?”

¹⁸Wo isowat-Na, “Mangém ang kota Yerusalem, ipeta'up oka miow si esa tuama wo icua mio' en taar-Ku ai sia, ‘En oras i Guru makatawio, Sia masalé' kuman mewali-wali wo sé murit-Na am balému en tuma'néi in endo wangko' Paska.’ ”

¹⁹Wo émaan é murit-Na tanu si airu'du'-Na ai séra. Wo tu'tulen éra eng kakanen Paska itu.

²⁰Mawengi mio', si Yesus lumukut kuman mewali-wali wo sé sangapulu' rua murit-Na itu.

²¹Ang karoro'an éra i makan, icua i Yesus, “En ulitna icua-Ku ai camu, awéan esaan ai camu en sumarakan oka Yaku.”

²²Kelinga in itu, en até éra mawendu keli wo séra maesa-esa mamuéi ai Sia, “Ra'ica yaku é Guru?”

²³ Wo icua i Yesus, “Si tou mewali-wali wo Yaku tumo'to' i roti am paelepan anio', siao en sumarakan oka Yaku.

²⁴Si Toyaang i Tou maté oka tanu in aipatic ang Kitap Le'nas andumoro' Sia. Taan icawangkuro mio' si tou sumarakan Sia, aweso taré si tou itu ra'ica aitou ang kayo'baan.”

²⁵Wo icua i Yudas si sumarakan oka Sia, “Ra'ica yaku é Gu- ru?” Wo icua i Yesus ai sia, “Icoo in esa en cumua!”

²⁶An tutuw i Yesus wo sé murit-Na ang karoro'an i makan, indon-Na e roti wo kumua mangé makapulu'sama', wo te'bi-te'biin-Na e roti itu, wo yéké-Na a sé murit-Na wo kumua, “Indono, kaneno, si anioo en owak-Ku.”

²⁷Kekawus in itu indon-Na em paelepan in anggor wo kumua i makapulu'sama'. Wo iwéé-Na ai séra wo kumua, “Melepo waya kamu asi paelepan anio'!

²⁸ Ampa'paan si anio' en enda'-Ku, si enda' perjanjian si aituas torona ing kaampungan ing kamesé-meséaan é tou keli.

²⁹Taan icua-Ku mangé ai camu, tumo'tol intarépé' Aku ra'io kawisa ka'i melep in anggor anio', akar asi endona Aku melep in anggor weru mewali-wali wo icamu ang Kakolanoan i Amang-Ku.”

³⁰Kekawus éra kumantar ing kakantaren rarayoan wo si Yesus wo sé murit-Na mangé an Tolaina in Zaitun.

³¹ Wo icua i Yesus a sé murit-Na, “Asi wengike' anio' icamu im baya tumela'u oka Yaku. Ampa'paan ang Kitap Le'nas aipatico in tana'i, ‘Patén-Ku oka si gembala, wo sé domba itu icasera-serar oka.’

³² Taan sa Aku tumouo sumawel, Yaku en dior wo icamu maangé ang Galilea.”

³³Wo icua i Petrus, “Mandé ka'i séra im baya tumela'u si Guru, taan aku wutu-wutul ra'ica.”

³⁴Wo icua i Yesus ai sia, “En ulitna icua-Ku ai co é Petrus, asi wengi anio', ra'ipé' kumukuk karua si co'ko', ko isumangkalo Yaku makatelu.”

³⁵Taan icua i Petrus, “Mandé ka'i yaku maté mewali-wali wo si Guru, ra'ica sangkalenku si Guru.” Pakasa sé murit walina kumua ka'i in taniitu.

³⁶Wo icateka'o mangé si Yesus wo sé murit-Na an esa tampa makangaran Getsemani. Wo icua i Yesus ai séra, “Lumukuto mio' am bia'i kamu, karoro'an Aku mangé sumombayang.”

³⁷Wo iwali i Yesus si Petrus wo sé rua toyaang i Zebedeus kumiit ang karapi-Na. Sia tumo'tolo mapendam im bendu wo ra'io makaaté in sama'.

³⁸Wo icua-Na ai séra, “En até-Ku wenduo keli, kapendaman tanu matawio maté. Mentoo mio' am bia'i kamu wo matéi-téiro mangé ang karapi-Ku.”

³⁹Kumawus in itu si Yesus maya' mangé toyo', Sia kumundu wo sumombayang, “O Amang-Ku, sa woo ro'na, angkaien woo mai eng kawenduan anio' a Yaku. Taan ra'ica iciit ing kasalé'an-Ku e mamuali, iciito ing kasalé'an i Amang.”

⁴⁰Makasombayang ako, si Yesus maréng angé a sé murit-Na wo kaumaan-Na séra kinakili'ano. Icua-Na a si Petrus, “Ra'ica réén kalesenan iow matéi-téir ang karapi-Ku mandé in esa jamke'?

⁴¹Matéi-téiro mangé wo sumombayango wosama' kamu ra'ica makéré im pangepé'an. Ulit en até miow masalé' méma' sé aicua-Ku, taan ra'ica kawooan in owak iow i méma'.”

⁴²Kumawus in itu si Yesus maréng angé ka'i sumombayang ing karua, icua-Na, “O Amang-Ku, sa réén musti wuléngen-Ku eng kawenduan anio', mandéo kasalé'an i Amang e mamuali.”

⁴³An tutuw Sia maréng angé sumawel a sé murit-Na, kaumaan-Na mangé séra kinakili'ano ka'i, ampa'paan séra makili'o repet.

⁴⁴Wo iwaya-Na séra am bitu wo Sia mangé sumombayang ing katelu. Wo sumombayang tanu in sombayang tarépé'.

⁴⁵Makasombayang ako wo Sia maréng a sé murit-Na, icua-Na, “Makakili' wo makaena'pé' réén kamu? Sérén, an témponao si Toyaang i Tou isarakan ang kama é tou keli eng kamesé-meséaan.

⁴⁶Tumooro! Mayo sungkulentao mangé si tou sumarakan Yaku, sia an tawio.”

⁴⁷An tutuw i Yesus maroma'pé', wo mai si Yudas si esaan asé sangapulu' rua murit-Na mewali-wali wo sé tou keli sé maali-ali in sa'bel wo im papangkur. Séra airu'du' é kikiiten é imam wo sé matu'a é tou Yahudi.

⁴⁸An tutuw é tou iitu ra'ipé' mai am bitu, aicuao i Yudas ai séra esa tuus tana'i, “Si tou ciomanku oka, Siao si tangkaan iow.”

⁴⁹Icateka' mangé séra am bitu, si Yudas makala'us rumuru mangé a si Yesus wo icuana, “Siri' é Guru!” Wo ciomenna si Yesus.

⁵⁰Wo icua i Yesus ai sia, “É karapi, siitu réén en aienmu?” Wo séra rumiit tumimboi si Yesus wo tangkaan éra Sia.

⁵¹Taan esaan asé tou si makii-kiit si Yesus, kumémbut in sa'belna wo parakenna en lunteng i ata imam wangko' akar imarembus.

⁵²Wo icua i Yesus ai sia, “Iwaléo mio' sumawel en sa'belmu itu am baléna! Ampa'paan si séi maté tou maké in sa'bel, sia ka'i patén oka in sa'bel.

⁵³Kuma'pa werotenmu réén Aku ra'ica makawoo mekiupus a si Amang-Ku wosama' iru'du'-Na sé malaékat-Na ilumébémai asé sangapulu' rua ngareru' suraro é malaékat e mai tumawang Yaku?

⁵⁴Taan sa émaan-Ku en itu, tumambisa sé aipatic ang Kitap Le'nas itu lekepen? Aicua ang Kitap Le'nas sapaoka en anio' musti mamuali.”

⁵⁵ Wo an tutuw ituke', icua i Yesus a sé tou keli sé mai itumangka' Sia, “Paweroten iow réén Aku anio' tou léwo' akar kamu mai tumangka' Yaku maali-ali in sa'bel wo im papangkur? Susur in endo penéré-nérén iow Aku makalukut masusui am Balé Le'nas, wo ra'ica tinangka' miow Aku.

⁵⁶Taan pakasa en anio' musti mamuali, wosama' en aipatic é nabi ang Kitap Le'nas musti lekepen.” Wo pakasa sé murit-Na tumela'u Sia wo tumincas.

⁵⁷Kekawus éra tumangka' si Yesus, wo iwali éra Sia am balé i imam wangko' Kayafas. A mangé mbitu imali'uso mai sé makailek wutul in Torat wo sé matu'a é tou Yahudi.

⁵⁸Wo si Petrus mengii-ngiit si Yesus an tayang akar ang kintal im balé i imam wangko'. Wo sia muntep, lumukut mewali-wali wo sé pengawal en suméré sapa e mamuali a si Yesus.

⁵⁹Sé kikiiten é imam wo pakasa sé anggota Mahkamah Agama maéré-éré kasairian ra'ica wutul andumoro' i Yesus wosama' Sia makéré ukuman patén.

⁶⁰Taan mandé esake' ra'ica wana tuus eng kinéréan éra, mandé kelio sé mééo kasairian ra'ica wutul andumoro' Sia. Taan ang kasomoi- ana awéan rua tou mangé méé kasairian,

⁶¹ icua éra a sé anggota Mahkamah Agama, “Si Tou anio' sumangkumo icumua sapaoka em Balé Le'nas ro'na tongkaren-Na wo wangunen-Na sumawel wayake' in telu ngando.”

⁶²Wo si imam wangko' tumulung wo icuana a si Yesus, “Ra'- ica réén sowaten-Mu em patudu éra ai Co?”

⁶³Taan si Yesus makapeneske'. Wo icua i imam wangko' ai Sia, “Ang karapi i ngaran i Amang Kasuruan si menonou, icuao mai ai cami, Ico réén si Kristus Toyaang i Amang Kasuruan, kuma'pa ra'ica?”

⁶⁴ Wo isowat i Yesus, “Si Amango in esa en cumua in itu. Taan icua-Ku ai camu, tumo'tol asi oras anio' kaséréan iow oka si Toyaang i Tou makalukut ang kakan i Makakawasa, wo mai ang kayo'baan an dangka' ing kambung-kambung an langit.”

⁶⁵ Kelinga in itu wo késéén i imam wangko' eng karaina ampa'paan mae'bow keli wo icuana, “Sia maojato si Amang Kasuruan. Anaé, sapapé' en torona kita mangéré sairi. Liningao miow waya e nunuwu'-Na maojat si Amang Kasuruan.

⁶⁶Sa réén iciit im paweroten iow tambisa?” Isowat éra, “Sia musti ukumen patén.”

⁶⁷ Wo ruraan éra en amo-Na wo rukin éra. Taniitu ka'i sé tou walina sumepé' Sia.

⁶⁸Wo icua éra ai Sia, “Éi Kristus, sa Ko uli- ulit nabi icua mai ai cami si séi réén en sumepé' Ico?”

⁶⁹Ang karoro'an in itu si Petrus ang kesot, makalukut ang kintal im balé i imam wangko'. Wo mai si esa ata wéwéné sumusut angé a si Petrus wo kumua, “Ico ka'i si tatap mewali-wali wo si Yesus tou Galilea itu.”

⁷⁰Taan an dior éra waya si Petrus isumangkalke', icuana, “Ra'- ica kailekanku sapa en aicuamu.”

⁷¹Wo si Petrus mangé am papalen wangko'. Am bitu ka'i sia kaséréan i ata wéwéné walina wo icua i ata itu a sé tou am bitu, “Si tou anio' ka'i mewali-wali wo si Yesus, si tou Nazaret itu.”

⁷²Taan si Petrus isumangkalke' ka'i wo sumumpa, “Ra'ica katuusanku si Tou itu.”

⁷³Ra'ica mento' uré, sé tou am bitu mai a si Petrus wo kumua, “Tantu ko ka'i esaan ai séra, en tuusna kailekan ami am pakaroma'mu.”

⁷⁴Wo tumo'tolo si Petrus kumutuk wo sumumpa, “Ra'ica katuusanku si Tou itu!” An tutuw ituke' kumukuko mai si co'ko'.

⁷⁵Wo kata'néiano i Petrus en aicua i Yesus ai sia, “Ra'ipé' kumukuk si co'ko', ko makateluo sumangkal Yaku.” Wo sia kumesot wo maamé' akar i masesendu'an oka.