Read Tontemboan Matius 6 Bible Online

Matius 6 - Tontemboan bible

Matius 6

¹“Ta'néieno mangé, tioo paémaan iow en atoran in agama an dior é tou wosama' sérén éra wo irayo éra kamu, ampa'paan sa kamu maéma' tanu siitu, ra'ica kéréan iow en laasa i Amang iow an sorga.

²Anaé, sa kamu méé sapa-sapake' en tumawang sé tou lengéi, tioo ipakua-kua tanu sé pengaémaan é tou punek am balé-walé paapo'an é agama Yahudi wo an lala-lalan wosama' séra irayo é tou. En ulitna icua-Ku mangé ai camu, séra makéréo in laasa éra.

³Taan sa kamu méé sapa-sapake', tioo kailekan ing kama ka'biri miow sapa e niéma' ing kama kakan iow.

⁴Anaé, en aiwéé miow itu iwééo mangé i maene-enep, wo in taniitu si Amang iow si makaséré mai sé icaenep, suli'an-Na oka ai camu sapa si niéma' miow itu.”

⁵“Sa kamu sumombayang, tioo mengasombayang tanu sé tou punek. Séra mengasombayang, casalé' éra makatulung am balé-walé paapo'an wo ka'i am péngko-péngkoran in lalan wangko', wosama' séra sérén é tou. En ulitna icua-Ku mangé ai camu, séra makéréo in laasa éra.

⁶Taan sa kamu sumombayang, muntepo ang kamar iow, palenano em papalen wo sumombayango mangé a si Amang iow si an tampa caenep. Wo in taniitu, si Amang iow si makaséré mai sé caenep, suli'an-Na oka sapa e niéma' miow itu.

⁷Wo ka'i an sombayang iow itu tioo talambot tanu ing kanaramen é bangsa sé ra'ica makatuus si Amang Kasuruan. Paweroten éra sapaoka sa maké ing keli nunuwu' en sombayang éra énan oka.

⁸Anaé, tioo kamu kaputé éra, ampa'paan ra'ipé' pinangilek iow a si Amang Kasuruan, kinailekan-Nao sapa em paperlun iow.

⁹Ampa'paan in itu, sumombayango in tana'i, ‘Amang ami an sorga, e ngaran-Mu le'nas wo iparangka-rangka',

¹⁰mayoo si Amang kumawasa tanu Kolano ami, mamualio eng kasalé'an-Mu ang kayo'baan meputé an sorga.

¹¹Wéanai kami asi endo anio' kakanen si paperlun ami.

¹²Wo ampunganai eng kamesé-meséaan ami, kaputé ami ka'i mawéé ing kaampungan a si tou si méma' ing kameséaan ai cami.

¹³Wo tioo woo iwali kami muntep am pangepé'an, taan iwekaro mai kami ang kawasa i léwo'. [Ampa'paan si Amango e makaanu ing kakolanoan wo ing kawasa, wo iparangka-rangka' akar ing kauré-uré. Ulit.’]

¹⁴Sa ampungan iow eng kameséaan sé niéma' é tou ai camu, si Amang iow an sorga ka'i méé oka ing kaampungan ai camu.

¹⁵Taan sa kamu ra'ica mengaampung sé tou mengaéma' ing kaséaan ai camu, si Amang iow an sorga ka'i ra'ica kawisa méé ing kaampungan ang kaséaan iow.”

¹⁶“Sa kamu mengapuasa, tioo en amo miow susa tanu sé tou punek. En amo éra mapa in susa kéndoon, wosama' sérén é tou sapaoka séra ang karoro'an i mapuasa. En ulitna icua-Ku mangé ai camu, siituo en laasa si kinéréano éra.

¹⁷Taan sa kamu mengapuasa, mu'aso mio' in amo an dano wo ko'koteno mangé em buuk an do'kos iow,

¹⁸wosama' ra'ica kailekan é tou sapaoka kamu ang karoro'an imapuasa, taan wayake' si Amang iow si an tampa ra'ica kaséréan e makailek. Wo si Amang iow si makaséré mai sé caenep, suliin-Na oka mai sapa e niéma' miow itu.”

¹⁹“Tioo kamu masuun ing kasiyaan torona in owak iow ang kayo'baan, ampa'paan eng kasiyaan ang kayo'baan anio' lolondin oka wo léwoon in taincéré' wo mai egan é rombit e rombiten éra eng kasiyaan itu.

²⁰Taan umungeno eng kasiyaan iow an sorga, si ra'ica léwoon é lolondi wo in taincéré' wo ra'ica egan é rombit e rombiten.

²¹Ampa'paan am bisa eng kasiyaan iow, am bitu ka'i en até miow.

²²Em beren itu sosoloan in owak. Sa em beren iow loor, sendoto waya en owak iow.

²³Sa em beren iow makewuro, imariréimbengo waya en owak iow.

²⁴Ra'ica wana esa tou ka'i e ro'na tumawoi a sé rua tuang. Ampa'paan sa tanu siitu, icasuutna oka si esa tuang wo icaupusna si tuang walina, kuma'pa sia le'tek oka a si tuang esa wo ra'ica mapandung si tuang walina. Taniituo ka'i kamu, tantu ra'ica toro sumelewir a si Amang Kasuruan sa memero-merotke' ing kasiyaan ing kayo'baan.”

²⁵“Ampa'paan in itu, icua-Ku mangé ai camu, tioo maindé-indé' andumoro' ing katouan iow, andumoro' ing kakanen iow kuma'pa in elepen, wo tioo maindé-indé' andumoro' in owak iow, andumoro' in sapa em pakén iow. Ra'ica réén eng katouan si lébé pentingai wo ing kakanen wo en owak itu si lébé pentingai wo ing karai?

²⁶Séréno mangé sé burung an langit, sé ra'ica mausew wo ra'ica maupu' wo ra'ica wana paumungan im buéna, taan pengawéanai kanen i Amang iow an sorga. Ra'ica réén icamu en lébé awéan wééna wo sé burung itu?

²⁷Si séi réén an esaan ai camu ampa'paan i maindé-indé', ro'na lumambot in umurna ang katouanna?

²⁸Kéitu réén kamu maindé-indé' andumoro' ing karai? Wéanio' rékén em bungang bakung am pangumaan, si tumou ra'ica matawoi wo mawi'bit.

²⁹Icua-Ku mangé ai camu, eng kasiyaan i Salomo ra'io icakua, taan sia ra'ica kawisa mekarai tanu ing kapasung im bungang itu.

³⁰Sa en dukut am pangumaan asi endo anio' awéan taan woondona mai tiya' an api, taan piniara wo niéma' i Amang Kasuruan pasung. Ra'ica réén icamu en émaan-Na lébé pasung, éi tou sé ra'ipé' talos maéman?

³¹Ampa'paan in itu, tioo kamu maindé-indé' wo makua, ‘Sapa eng kanen oka ami?’ wo ‘Sapa en elepen oka ami?’ kuma'pa ‘Sapa ka'i eng karaien oka ami?’

³²Pakasa en itu pinangéré é bangsa sé ra'ica makatuus si Amang Kasuruan. Taan kailekan i Amang iow an sorga pakasa sé paperlun iow.

³³Anaé, pangérén owo eng Kakolanoan i Amang Kasuruan wo eng kasalé'an-Na, wo pakasa em paperlun iow itu yawes-Na oka ai camu.

³⁴Anaé, tioo kamu maindé-indé' andumoro' si endo woondo, ampa'paan si endo woondo awéan eng kaindé-indé'ana in esa. Eng kasusaan sangando aweske' in sangando.”