Read Tontemboan Matius 7 Bible Online

Matius 7 - Tontemboan bible

Matius 7

¹“Tioo kamu mengaakim, wosama' kamu ra'ica akimen.

²Ampa'paan em pakaakim sé pengapakén iow i maakim sé tou, em pakaakim itu ka'i em pakén oka i Amang Kasuruan e makim icamu. Wo em paukur sé pengaukur iow a sé tou walina, siituo oka ka'i en yukur ai camu.

³Kéitu réén en awu ing kayu am beren i poowmu kaséréan iow, taan em balak am beren iow in esa, ra'ica kailekan iow?

⁴Tambisa réén kamu ro'na kumua a si poowmu, ‘Mayoo icesotku en awu ing kayu am berenmu’, taan awéan balak am beren iow?

⁵Éi tou punek! Icesot owo em balak am beren iow, wosama' ro'na kaséréan iow wutul eng kumesot in awu ing kayu am beren i poowmu itu.

⁶Tioo kamu mengakua in Taar i Amang Kasuruan a sé tou sé ra'ica kiim tumerima, en itu putéke' kamu méé im barang le'nas a si asu kuma'pa mangkil i mutiara a sé wawi. Pakasa en itu ipeléa-léak éra oka wo sumali'si' kumarét icamu.”

⁷“Mangileko mangé, wo kamu wéan oka. Éréno, wo kamu makéré oka. Tuméngkoro, wo em papalen wukaan oka torona miow.

⁸Ampa'paan susur en tou i mangilek tumerima oka, wo susur in tou i mangéré makéré oka, wo susur in tou en tuméngkor im papalen wukaan oka.

⁹Awéan réén esaan tou ai camu e méé watu a si toyaangna, sa sia mangilek roti,

¹⁰kuma'pa méé ula', sa sia mangilek sera'?

¹¹Anaé, sa kamu sé léwo' makailek mawéé sé loor a sé toyaang iow, wopé'taré si Amang iow an sorga! Iwéé-Na oka mai sé loor a sé tou sé imangilek ai Sia.

¹²Sapa sé icasalé' miow émaan é tou walina ai camu, tanu siituo si musti émaan iow a sé tou itu. Siituo en sususuien ang kitap Torat wo ang kitap é nabi.”

¹³“Muntepo mangé kumiit im papalen pesut. Em papalen welar wo en lalan wangko' maangé am papaté, wo kelian en tou muntep kumiit im papalen itu.

¹⁴Taan em papalen pesut wo en lalan pesut, maangé ang katouan akar ing kauré-uré wo wayake' im pira en tou sé kumiit am bitu.”

¹⁵“Maténga-téngamo mangé a sé nabi ra'ica wutul. Séra maai ai camu tanuoka domba, taan en ulitna séra itu serigala léwo'.

¹⁶Kailekan oka miow séra asi wuéna im pinengaéma' éra. Ro'na réén sé tou mupu' im bua'na in anggor an serawet owo kuma'pa wua'na in ara an dukut tutunéan owo?

¹⁷Anaé en tuura loor mawua' loor, taan en tuura ra'ica loor mawua' ra'ica loor.

¹⁸En tuura loor ra'ica kawisa mua' ra'ica loor wo en tuura ra'ica loor ra'ica kawisa mua' loor.

¹⁹ En tuura sé ra'ica mawua' loor, tantu tongkéien wo tiya' an api.

²⁰ Taniitu ka'i wo sé nabi ra'ica wutul. Katuusan oka miow séra asi wuéna im pinengaéma' éra.

²¹Ra'ica pakasa sé tou sé matowa Yaku, ‘Kasuruan, Kasuruan’, muntep oka ang Kakolanoan in Sorga, taan wayake' in tou sé mengaéma' ing kasalé'an i Amang-Ku an sorga.

²²Asi endo kaka'puan ing kayo'baan, keli oka tou e matowa Yaku, ‘Kasuruan, Kasuruan, ra'ica réén ipakua ami en taar i Amang Kasuruan mapaké i ngaran-Mu, wo mausér sé sétang mapaké i ngaran-Mu, wo maéma' keli kakaya'kaan mapaké ka'i i ngaran-Mu?’

²³ Asi oras ituo, icua-Ku oka ai séra ang karapi ra'ica ipaene-enep, ‘Ra'ica katuusan-Ku kamu! Tumayango mangé an dior-Ku, kamu im baya sé mengaéma' ing kaléwo-léwo'an!’ ”

²⁴“Anaé, si esa wo si esa tou sé iluminga in aicua-Ku anio' wo pengaémaanna, sia ipeputé wo si tou pandéi, si mangun im baléna am bawo im batu.

²⁵Wo tumumpao mai en uran repet wo mayo en lewu, wo rumegeso mai en deges repet tumena im balé itu, taan em balé itu ra'ica rume'ba, ampa'paan em balé itu winangun am bawo im batu.

²⁶Taan si esa wo si esa tou sé iluminga in aicua-Ku anio' wo ra'ica pengaémaanna, sia meputé wo si tou bodok, si mangun im baléna am bawo in dangi'ngis.

²⁷Tumumpao mai en uran repet wo mayo en lewu, wo rumegeso mai en deges repet tumena im balé itu, akar em balé itu rume'ba wo ra'io icakua e maléwo'.”

²⁸ An tutuw i Yesus makasusuio, sé tou keli mangaya-ngaya'ka' luminga in sususuien-Na.

²⁹Ampa'paan Sia mengasusui wuta ing kawasa, ra'ica tanu sé makailek wutul in Torat.