Read Tontemboan Matius 8 Bible Online

Matius 8 - Tontemboan bible

Matius 8

¹Kekawus i Yesus merosio' in tolaina, sé tou keli meréro-rérot makiit Sia.

²Wo mai ai Sia si esa tou kusta, kumundu en sumiri', icuana “Tuang, sa woo casalé' i Tuang, ro'na samaan i Tuang en sakitku.”

³Wo yulur i Yesus eng kama-Na e misu' si tou itu wo kumua, “Icasalé'-Ku, masama'o ko.” Asi témpo ituke' imasama'o eng kusta i tou itu.

⁴ Wo icua i Yesus ai sia, “Ta'néieno mangé, tioo icuamu en anio' a si séike' mangé, taan mangéo ipapaturu' en owakmu a si imam wo mééo mio' raragés binatang pinokol tanu si aiperénta i Musa, en itu tanu tuus ai séra.”

⁵An tutuw i Yesus muntep ang Kapernaum, mai si esa perwira meta'up wo Sia, wo mekiupus,

⁶“Tuang, si ataku makatekel oka am balé ampa'paan ing késo', sia wenduo keli.”

⁷Icua i Yesus ai sia, “Maai oka Aku en sumama' sia.”

⁸Taan icua i perwira itu, “Tuang, ra'ica patus aku tumerima si Tuang am baléku, taan icuao mai esa nuwu'ke', tantu si ataku masama' oka.

⁹Ampa'paan yaku awéané' kikiiten sé maperénta yaku. Wo ka'i yaku awéan suraro sé paperéntanku. Sa peréntanku esaan asé suraro-suraro itu ‘Mangé!’, tantu sia mangé. Wo sa peréntanku si esa ‘Mai!’, tantu sia mai, kuma'pa ka'i a si ataku, ‘Tawoien si anio'!’, tantu tawoienna.”

¹⁰Kelinga in itu, si Yesus mangaya'ka' wo icua-Na ai séra sé makiit Sia, “En ulitna icua-Ku mangé ai camu, ra'ipé' kawisa ipeta'up-Ku em paémanen wangko' tanu si anio' mandé esake' tou an uner é tou Israel.

¹¹ Icua-Ku ai camu, kelian en tou maai oka a micona wo a makona owo en lumukut kuman mewali-wali wo si Abraham, Ishak wo si Yakub an untep ing Kakolanoan in Sorga.

¹² Taan kelian tou Yahudi sé musti woo mamualio tou i Amang Kasuruan tiya' oka ang kariréimbengan si riréimbeng keli. A mangé mbitu séra maamé' oka akar mengare-ngare'ket im baang.”

¹³Wo icua i Yesus a si perwira itu, “Maréngo mangé wo mamualio ai co tanu im paémanenmu.” An tutuw ituke' masama'o si atana itu.

¹⁴Icateka' mangé am balé i Petrus, sérén i Yesus si inang émpo i Petrus makatekel ampa'paan in sakit paso'.

¹⁵Timboian-Na eng kama i wéwéné itu wo icatalao en sakit paso'na. Sia ka'i tumoor wo selewirenna si Yesus.

¹⁶An tutuw matawio im bengi, iwali éra mai waya a si Yesus sé tou rinasuk i sétang, wo ang karapi i makasake' numuwu' yusér-Na sé roh léwo' itu wo samaan-Na waya sé tou sumakit.

¹⁷ En itu imamuali wosama' malekep en taar si aicua i nabi Yesaya, “Siao e muléng ing kalembianta wo tumanggong in sakitta.”

¹⁸An tutuw i Yesus suméré sé tou keli lumi'cir Sia, ru'du'-Na sé murit en lumewet angé in lour.

¹⁹Wo mai si makailek wutul in Torat wo kumua a si Yesus, “Guru, yaku kumiit oka si Guru, am bisake' en angéan i Guru.”

²⁰Icua i Yesus ai sia, “Si serigala awéan wileng paento'an, taniitu ka'i sé burung awéan em parumunan. Taan si Toyaang i Tou ra'ica wana paento'an.”

²¹Wo awéan esa tou walina, esaan asé murit-murit i Yesus, kumua ai Sia, “Tuang, énanai mangéku icubur owo si amangku.”

²²Taan icua i Yesus ai sia, “Kumiito mai Yaku wo iwayao mio' si tou imaté eng kumubur si tou imaté.”

²³Wo si Yesus sumaké an londéi wo kiiten ka'i é murit-Na.

²⁴Tumarépé'anke', rumegesai en deges repet keli an lour itu, akar en londéi itu tawio tuminep, taan si Yesus kinakili'an.

²⁵Wo mai sé murit-Na e molo Sia, Icua éra, “Guru, tawangenai, kita tawio maté.”

²⁶Icua-Na ai séra, “Kéitu réén kamu maindé', éi camu sé ra'ipé' talos maéman?” Wo si Yesus tumulung wo peréntan-Na en deges wo en lour itu, akar en lour wutu-wutul malener.

²⁷Sé tou itu ka'i mangaya'ka' wo kumua, “Tou tanu sapa réén Sia, akar en deges wo en lour ka'i kumiit im perénta-Na?”

²⁸An tutuw i Yesus icateka' an lewet in lour, an sangkum é tou Gadara, mai sé rua tou sé rinasuk i sétang ang kubur owo e meta'up wo Sia. Séra itu léwo' keli akar ra'ica wana mandé esake' tou em brani lumangkoi an lalan itu.

²⁹Wo séra ka'i mangko', “Sapa en urusan-Mu wo icami, éi Toyaang i Casuruan? Mai-Mu réén okoien kami mandé ra'ipé' an témpona?”

³⁰Ra'ica tayang ai séra itu, kelian ulit sé wawi ang karoro'an i maéré-éré kanen.

³¹Wo pangileken é sétang itu a si Yesus, “Sa yusér-Mu kami, iru'du'o mangé kami méra a sé reru' é wawi itu.”

³²Icua i Yesus ai séra, “Mangém!” Wo kumesoto séra wo muntep a sé wawi itu. Sé reru' é wawi itu lumo'tic ang kepal wo muntep an lour wo maté an untep in dano.

³³Wo sé matéir sé wawi itu tumincas angé ang kota, icateka' mangé ang kota, wo isisil éra waya eng kamamualian itu, wo ka'i andumoro' sé imamuali a sé rua tou sé rinasuk é sétang.

³⁴Kelinga in itu, sé tou ang kota itu mangé meta'up wo si Yesus. An tutuw éra meta'upo, séra wutu-wutul mekiupus wosama' Sia tumela'u in sangkum éra.