Read Tontemboan Markus 11 Bible Online

Markus 11 - Tontemboan bible

Markus 11

¹An tutuw i Yesus wo sé murit-Na matawio in Yerusalem, si an diit in doong Betfage wo im Betania si an Tolaina in Zaitun, si Yesus rumu'du' sé rua murit-Na,

²icua-Na ai séra, “Mangém kamu asi roong an dior itu. An tutuw iow muntep am bitu, kaséréan iow oka esa keledai wo'bas ipakawa'kes si ra'ipé' sumangkum ako pinaké. Wukaano mio' en tali wo paalinai.

³Wo sa awéan tou mamuéi, ‘Kéitu réén pawukaan iow en tali i celedai itu?’, sowateno mio' in tana'i, ‘Paperlun i Tuang ami, wo makala'- us oka iwaréng-Na mai sumawel am bia'i.’ ”

⁴Wo séra mangé wo kaséréan éra si esa keledai wo'bas ipakawa'kes an tembir in lalan an dior im papalen im balé. Wo wukaan éra si celedai itu.

⁵Wo sé tou makatulung am bitu tumegor iséra, “Éi! Sapa em paémaan iow? Kéitu réén wekar iow si celedai itu?”

⁶Wo isowat éra tanu si aicua i Yesus. Wo iwaya é tou itu séra e maali si celedai itu.

⁷Kumawus in itu paalin éra mai si celedai wo'bas itu a si Yesus, wo ya'li' éra eng karai éra an licur i celedai. Wo si Yesus sumaké am bawo i celedai itu.

⁸Keli en tou mengaa'li' ing karai éra an lalan. Awéan ka'i sé imeta' im panga-pangana rintek ang karapi in lalaina mata' sé niindo éra an uma.

⁹ Sé tou mawaya' an dior i Yesus wo sé walina ka'i makiit an somoi. Ang karoro'an imawaya' séra marayo-rayo Sia ang karapi i maangko', “Hosana! Irayoo mangé Sia si mai a ngaran i Amang Kasuruan.

¹⁰Pakakamangen Sia si mai kumawasa tanu kolano meputé si apo'ta Daud. Hosana! Irayoo si Casuruan an tampa Rumangka-Rangka'!”

¹¹Icateka' mangé an Yerusalem, Sia muntep am Balé Le'nas. Am bitu Sia menéré-néré sapa waya sé am Balé Le'nas. Taan ampa'paan i mekeremo, Sia kumesot wo mangé am Betania mewali-wali wo sé sangapulu' rua murit-Na.

¹²Mando mai, si Yesus wo sé murit-Na kumesot am Betania. An uner in lalan, si Yesus makapendamo in arem.

¹³An tayangé' sérén-Na mangé en tuura in ara keli lalaina. Susuten-Na mangé en tuura in ara itu e ruma'da sa awéan wua'na. Taan icateka' mangé an tuur itu, ra'ica kinéréan-Na sapa-sapa aluar in lalainake', ampa'paan asi témpo itu ra'ipé' an orasna in ara mua'.

¹⁴Wo icua-Na a si tuura in ara itu, “Mandé esake' tou ra'io wana eng kuman im bua'namu akar ing kauré-uré!” Sé murit-Na ka'i luminga in aicua-Na itu.

¹⁵An tutuw i Yesus wo sé murit-Na icateka'o an Yerusalem wo Sia muntep am Balé Le'nas. Wo tumo'tolo yusér-Na sé tou mawangkér wo mateles ang kintal im Balé Le'nas. Wo iwalintuang-Na e méja-méja pasawelan éra in doit wo em palukutan é mawangkér sé mombo.

¹⁶Wo ra'ica iwéé-Na mandé esake' tou maali-ali im barang-barang éra lumangkoi ang kintal im Balé Le'nas.

¹⁷ Wo Sia sumusui ai séra, icua-Na, “Ang Kitap Le'nas aipatic in tana'i, ‘Em balé-Ku patuulen oka é tou walé pengasombayangan é pakasa im bangsa.’ Taan niéma'o miow tampa mengauwak sé tou!”

¹⁸An tutuw é kikiiten é imam wo sé makailek wutul in Torat luminga andumoro' ing kamamualian itu, séra rumaméji maté Sia. Taan icaindé' éra Sia ampa'paan en sususuien-Na iméma' pakasa sé tou mangaya-ngaya'ka'.

¹⁹Ampa'paan i mekeremo, si Yesus wo sé murit-Na kumesot an Yerusalem.

²⁰Asi mamoondona mai, an tutuw i Yesus wo sé murit-Na lumangkoi asi tuura in ara itu, kaséréan éra en tuura itu imaperao akar an a'mu-a'mutna.

²¹Wo kata'néiano i Petrus en aicua i Yesus kaawii wo icuana ai Sia, “Guru, sérén angé! Si tuura in ara si kinutuk-Mu imaperao.”

²²Wo isowat i Yesus ai séra, “Maémano mangé a si Amang Kasuruan.

²³ En ulitna icua-Ku mangé ai camu, si séike' mangé eng kumua a si cuntung anio', ‘Icaangkaio wo icawangkilo an ta'sic!’ Asalo en aténa ra'ica marua-rua wasa taan uli-ulit maéman sapaoka en aicuana itu mamuali oka, en itu tantu mamuali oka.

²⁴Ampa'paan in ituo icua-Ku ai camu, sapake' en aisombayang wo em pinangilek iow a si Amang Kasuruan, percayano sapaoka en itu tinerimao miow wo en itu kéréan oka miow.

²⁵ Sa kamu tumulung en sumombayang, musti ampunganmu owo eng kameséaan i esa tou ai co wosama' si Amang iow an sorga méé oka ka'i kaampungan ang kameséaan iow.” [

²⁶Taan sa kamu ra'ica mengawéé ing kaampungan a sé tou sé iméma' ing kameséaan ai camu, si Amang iow an sorga ka'i ra'ica méé ing kaampungan ang kameséaan iow. ]

²⁷Si Yesus wo sé murit-Na maréng angé sumawel an Yerusalem. Wo an tutuw Sia maya' lumi'cir ang kintal im Balé Le'nas, wo mai sé kikiiten é imam, sé makailek wutul in Torat wo sé matu'a.

²⁸Wuéien éra a si Yesus, “Maké ing kawasa sapa réén akar ro'na émaan-Mu waya en itu? Wo si séi réén e iméé ing kawasa itu ai Co?”

²⁹Isowat i Yesus ai séra, “Yaku ka'i méé esa wuwuéien ai camu. Sa kasowatan iow em buéien-Ku, sowaten-Ku oka ka'i em buéien iow a Yaku andumoro' ing kawasa sapa akar émaan-Ku waya en itu.

³⁰Si Yohanes Mabaptis maptis sé tou imaké réén ing kawasa i séi? Asi Amang Kasuruan owo kuma'pa asé tou owo? Sowateno mai!”

³¹Séra wo i séra mengkuanan, “Sa icuata, ‘Asi Amang Kasuruan owo’, icua-Na oka ai cita, ‘Sa taniitu, kéitu réén sia ra'ica percayan iow?’

³²Taan ra'ica wona' mamuali sa icuata, ‘Asé tou owo’. Caindé' éra sé tou keli itu ampa'paan paanggapen éra sapaoka si Yohanes itu wutu-wutul esa nabi.”

³³Wo isowat éra a si Yesus, “Ra'ica kailekan ami!” Wo icua i Yesus ai séra, “Sa taniitu, ra'ica icua-Ku ka'i ai camu asi séi owo eng kawasa itu akar émaan-Ku waya en itu.”