Read Tontemboan Markus 13 Bible Online

Markus 13 - Tontemboan bible

Markus 13

¹An tutuw i Yesus kumesot am Balé Le'nas, si esa murit-Na kumua ai Sia, “Guru, sérén angé! Loor keli sé wangunan itu, maké ka'i im batu-watu wangker.”

²Wo icua i Yesus ai sia, “Sinéréo miow sé wangunan loor itu? Taan asi sangando si maai sa pakatongka-tongkaren oka akar ra'io wana mandé esake' watu e meliunsunan am bawo im batu walina.”

³Kumawus in itu, si Yesus wo sé murit-Na mangé an Tolaina in Zaitun wo Sia lumukut sumaru mako im Balé Le'nas. Wo si Petrus, si Yakobus, si Yohanes wo si Andreas rumuru mangé ai Sia wo séra tumané e mepaar wo mamuéi ai Sia,

⁴“Guru, icua mai ai cami kawisa réén mamuali en aicua i Guru tarépé'? Wo sapa réén en tuusna sa pakasa en itu tawio mamuali?”

⁵Icua i Yesus ai séra, “Matéi-téiro mangé, oréoka kamu isélé'kow é tou.

⁶Ampa'paan maai oka kelian tou maké i ngaran-Ku makua in tana'i, ‘Yakuo si Mesias’, wo séra sumélé'kow oka sé tou keli.

⁷Sa kamu luminga awéan perang an tampa miow, kuma'pa abar-abar andumoro' im perang, tioo kamu maindé'. Pakasa en itu musti mamuali owo, taan en itu ra'ipé' an endo kaka'puan ing kayo'baan.

⁸Ampa'paan si esa bangsa mensunduran oka wo sé bangsa walina, si esa kakolanoan mensunduran oka wo sé kakolanoan walina. Wo awéan ka'i tana' mangéro' repet am bisa-wisa wo awéan oka ka'i kaareman. Pakasa en itu asalopé' to'tolan ing kawenduan an tutuw ra'ipé' mai en jaman weru.

⁹ Anaé, matéi-téiro mangé kamu! Ampa'paan kamu tangkaan oka é tou wo isarakan éra an sidang agama wo pangkuren éra am balé paapo'an é agama Yahudi. Iwali éra kamu an dior i gubernur wo a sé kolano ampa'paan kamu makiit Yaku. Asi témpo ituo kamu ro'na kumua a sé tou keli andumoro' in Abar Kaaruien.

¹⁰Ampa'paan en Abar Kaaruien itu musti icua owo a sé pakasa im bangsa.

¹¹Sa kamu tangkaan wo isarakan éra an sidang agama, tioo kamu maindé' andumoro' in sapa e musti icua miow. Taan icuao mangé sapa si aicua i Roh Le'nas ai camu asi témpo itu, ampa'paan ra'ica icamu in esa e rumoma' taan si Roh Le'nas.

¹²Maai oka en témpona, si esa tou sumarakan oka si poowna in esa em patén. Taniitu ka'i e mamuali a si esa amang sumarakan oka sé toyaangna. Sé toyaang ka'i sumundur oka sé matu'a wo patén éra.

¹³ Pakasa in tou masuut oka icamu ampa'paan makiit Yaku. Taan sé tou le'tek makiit Yaku akar imaté, séra makéré oka ing kalowiran.”

¹⁴ Icua i Yesus, “Sa sérén iow si tou luméwo-léwo' makatulung asi tampa ra'ica patus ai sia[4][Si séi e maca in anio', wéanio' rékén sumama-sama', lébé loor sé tou an Yudea musti tumincas angé ang kuntu-kuntung.]

¹⁵ Si tou am bawo im balé, nomoo tumumpa wo muntep e mindo sapake' mangé sé an untep im baléna,

¹⁶taniitu ka'i wo sé tou an uma, nomoo maréng e mindo ing karai. Taan makala'uso taré tumincas!

¹⁷Wo si kala'meren keli asi témpo itu, sé wéwéné maowa- owak kuma'pa sé pasusuané' é toyaang makatoué'.

¹⁸Sumombayango mangé, wosama' pakasa en itu ra'ica mamuali an oras ing kautingan.

¹⁹ Ampa'paan asi témpo itu awéan oka kawenduan si ra'ipé' kawisa mamuali tumo'tolai eng kayo'baan niéma' i Amang Kasuruan akar intarépé', wo ra'io kawisa ka'i mamuali.

²⁰Wo sa sé endo kawenduan itu ra'ica kinolek i Amang Kasuruan ra'ica wana esa tou e malowir. Taan ampa'paano ing kaupusan-Na a sé tou sé sinisir-Nao, akar kinolek-Na en endo itu.

²¹Asi témpo itu, sa awéan tou kumua ai camu, ‘Sérén, Si Mesias am bia'i!’ kuma'pa ‘Sérén, Si Mesias am bitu!’, tioo percayan iow en itu.

²²Ampa'paan sé mesias ra'ica wutul wo sé nabi ra'ica wutul maai oka sa. Émaan éra oka en tuu-tuus wo eng kakaya'kaan-kakaya'kaan en sumélé'kow sé tou sinisir i Amang Kasuruan.

²³Anaé, matéi-téiro mangé kamu! Pakasa en anio' aicua-Kuo ai camu.”

²⁴ “Taan kekawus ing kawenduan asé endo itu, si yéndo mariréimbeng oka wo si serap ra'io ka'i tumélang.

²⁵ Sé sumesendot an langit makarongko-rongkor oka wo pakasa eng kawasa an langit malicoko oka.

²⁶ Asi témpo itu, sérén oka é tou si Toyaang i Tou mai ang kayo'baan pakasaputen ing kambung-kambung. Sia mai ang karapi pakasa ing kawasa wo ing kawangko'-Na.

²⁷Asi témpo ituke', iru'du'-Na sé malaékat-Na en lumi'us pakasa sé tou sinisir-Nao am pakasa in tampa asi cayo'baan anio', tumo'tol an tempok ing kayo'baan akar an tempok in langit.”

²⁸“Mindoo mio' susuien asi andéan tuura in ara. Sa sé pangana rintek mamata'o wo tumo'tolo maséé, kailekano miow sa matawio en oras ing kasendangen.

²⁹Taniitu ka'i sa sérén iow in andumoro' sé aicua-Ku tarépé' itu mato'tolo mamuali, kailekano miow sa si Toyaang i Tou maai sumawel makatawio, Sia an dioro im papalen.

³⁰En ulitna icua-Ku mangé ai camu, sé tou menonou intarépé' ra'ipé' maté sa pakasa en itu ra'ipé' mamuali.

³¹En langit wo eng kayo'baan maka'pu oka, taan e nunuwu'-Ku ra'ica maka'pu akar ing kauré-uré.

³² Ra'ica wana esa tou makailek sa kawisa en orasna si Toyaang i Tou maai sumawel. Sé malaékat an sorga wo si Toyaang in esa ra'ica ka'i makailek, taan wayake' si Amang.”

³³“Mareti-retio wo matéi-téiro mangé, ampa'paan ra'ica kailekan iow kawisa en itu mamuali.

³⁴ En oras itu tanu si esa tou tumela'u im baléna ampa'paan mangé an tampa tayang. Ra'ipé' mangé sia, tinokéannao sé atana e murus im balé wo ka'i icuana en tawoien éra si esa wo si esa. Iru'du'na si matéir im balé wosama' matéi-téir akar sia maréngai.

³⁵Taniitu ka'i kamu musti matéi-téir angé ampa'paan ra'ica kailekan iow kawisa si makawalé maréngai, wona' matawio im bengi kuma'pa katoora im bengi kuma'pa matawio i mando kuma'pa i mamoondopé' keli,

³⁶wosama' sa sia icateka' mai, kamu kaumaanna ra'ica makatekel.

³⁷Sapa en aicua-Ku ai camu, aicua-Ku ka'i a sé pakasa in tou, ‘Matéi-téiro mangé!’ ”