Read Tontemboan Markus 14 Bible Online

Markus 14 - Tontemboan bible

Markus 14

¹Rua ngandopé' sé tou Yahudi méma' in endo wangko' Paska wo in endo wangko' Roti Ra'ica Rinagian.[5] Sé kikiiten é imam wo sé makailek wutul in Torat maéré-éré lalan en tumangka' si Yesus ang karapi i maene-enep e maté Sia.

²Taan séra mengkuanan, “Tioo tumangka' Sia asi endo wangko' Paska, wosama' sé tou ra'ica méma' ing kalicokoan.”

³ An tutuw i Yesus am Betania, am balé i Simon si sumangkumo sinakitan ing kusta wo ang karoro'an-Na imakalukut i makan, mai ai Sia si esa wéwéné maali-ali im botel marmer pinumpunan in solo mawou manam si sosor keli em bééna. Wo wetéén i wéwéné itu eng kekelewna, wo inaamna en solo itu an do'kos i Yesus.

⁴Taan piraan tou sé makaséré in itu mae'bow keli wo séra mengkuanan si esa wo si esa, “Sapa en torona sia mengéla-ngéla in solo mawou manam itu.

⁵Si solo mawou manam itu sosor keli em bééna wo sa en itu iwangkér em bééna lébé telu ngaatus dinar. Wo en doit itu ro'na iwéténg a sé tou lengéi.” Wo icae'bow éra si wéwéné itu.

⁶Taan icua i Yesus ai séra, “Kéitu réén kamu mae'bow ai sia? Wayao mio' sia. Sia méma'o in loor a Yaku.

⁷ Ampa'paan sé tou lengéi tatap ang karapi miow wo kamu ro'na tumawang iséra kawisake' en casalé' miow. Taan Aku ra'ica tatap ang karapi miow.

⁸Si wéwéné anio' iméma'o sapa si ro'na émaanna. Ninaamnao in solo mawou manam en owak-Ku, tanu tumu'tulo i mayat-Ku e mangé icubur.

⁹En ulitna icua-Ku mangé ai camu, am bisake' sé tou makua in Abar Kaaruien-Na a sé tou ang kayo'baan, tantu ipakua éra sapa e niéma' i wéwéné anio' a Yaku, en tuma'néi sia.”

¹⁰Wo si Yudas Iskariot esaan asé sangapulu' rua murit i Yesus, mangé a sé kikiiten é imam eng kumua im basana en sumarakan si Yesus ai séra.

¹¹An tutuw éra i luminga im pawasa-wasanna, séra arui keli wo janjian éra e méé oka roit ai sia. Wo tumo'tol asi témpo itu si Yudas maéré-éré témpo loor en sumarakan si Yesus ai séra.

¹²Asi endo kataré in endo wangko' Roti Ra'ica Rinagian, an tutuw é tou Yahudi mokol domba Paska sé murit i Yesus mamuéi ai Sia, “Guru, am bisa réén en icasalé' i Guru tu'tulan ami ing kakanen Paska torona i Guru?”

¹³Wo iru'du' i Yesus sé rua murit-Na, “Mangém ang kota, a mangé mbitu ipeta'up oka miow si esa tuama maali-ali in tampayang teké' si pinumpunan in dano, kumiito mangé ai sia.

¹⁴Wo am balé si niuntepanna icuao mio' a si makawalé itu, ‘Aitaar i Guru, am bisa réén eng kanan i Guru mewali-wali wo sé murit-Na asi endo wangko' Paska?’

¹⁵Wo ituru' oka i makawalé itu ai camu esa tampa wangker an dangka' wo em pakénta am bituo waya wo tinu'tulo. An tampa ituo e musti tu'tulan iow ing kakanen Paska eng kanenta!”

¹⁶Kekawus ako in itu, sé rua murit itu mangé ang kota. Icateka' mangé am bitu, ipeta'up éra waya tanu en aicua i Yesus ai séra. Wo tu'tulen éra eng kakanen Paska.

¹⁷Mawengi mio', maio si Yesus mewali-wali wo sé sangapulu' rua murit-Na itu.

¹⁸ Ang karoro'an éra i makalukut makan am bitu, icua i Yesus, “En ulitna icua-Ku mangé ai camu, awéan esaan tou ai camu en sumarakan oka Yaku. Si tou itu lumukut kuman mewali-wali wo Yaku.”

¹⁹Kelinga in itu, en até éra mawendu keli. Wo esa wo si esa mamuéi ai Sia, “Guru, ra'ica yaku to?”

²⁰Isowat i Yesus, “Si tou itu, esaan angé ai camu in sangapulu' rua anio'. Siao si tumo'to' i roti an esa paelepan wo Yaku.

²¹Ampa'paan si Toyaang i Tou maté oka tanu si aipatic ang Kitap Le'nas andumoro' Sia. Taan icawangkuro mio' si tou sumarakan si Toyaang i Tou. Aweso taré si tou itu ra'ica aitou ang kayo'baan.”

²²An tutuw i Yesus ang karoro'an i makan mewali-wali wo sé murit-Na, indon-Na e roti wo kumua mangé makapulu'sama' a si Amang Kasuruan, te'bi-te'biin-Na e roti itu, wo yéké-Na ai séra wo kumua, “Indono, si anioo en owak-Ku.”

²³Kekawus in itu indon-Na em paelepan in anggor wo kumua i makapulu'sama', wo iwéé-Na ai séra. Wo pakasa séra melep asi paelepan itu.

²⁴ Icua-Na ai séra, “Si anioo en enda'-Ku, enda' im perjanjian si aituas torona é tou keli.

²⁵En ulitna icua-Ku mangé ai camu, ra'io kawisa ka'i Aku melep in anggor anio' akar asi endona Aku melep in anggor weru ang Kakolanoan i Amang Kasuruan.”

²⁶Kumawus ako in itu, séra kumantar ing kakantaren rarayoan wo séra mangé an Tolaina in Zaitun.

²⁷ Wo icua ka'i i Yesus, “Pakasa kamu tumela'u oka Yaku, ampa'paan aicuao i Amang Kasuruan ang Kitap Le'nas in tana'i, ‘Patén-Ku oka Si Gembala, wo sé domba-Na icasera-serar oka.’

²⁸ Taan sa Aku tinouo sumawel, Yaku si rumior angé ai camu mangé ang Galilea.”

²⁹Wo icua i Petrus a si Yesus, “Mandé ka'i séra im baya tumela'u si Guru, taan aku ra'ica.”

³⁰Wo icua i Yesus ai sia, “En ulitna icua-Ku ai co, asi endo anio' asi wengi anio'ke', ra'ipé' kumukuk karua si co'ko', ico isumangkalo Yaku makatelu.”

³¹Taan si Petrus mauli-ulit sumowat, “Mandé ka'i aku musti maté mewali-wali wo si Guru, ra'ica sangkalenku si Guru.” Wo sé murit walina i Yesus ka'i mekiit kumua in taniitu.

³²Wo icateka'o si Yesus wo sé murit-Na an esa tampa makangaran Getsemani. Icua i Yesus ai séra, “Lumukuto mio' am bia'i kamu, ang karoro'an Aku mangé sumombayang.”

³³Wo towan i Yesus si Petrus, si Yakobus wo si Yohanes kumiit angé ang karapi-Na. Asi témpo itu, en até-Na tumo'tolo makapendam im bendu, wo ra'io makaaté in sama'.

³⁴Wo icua-Na ai séra, “En até-Ku wenduo keli, kapendaman tanu matawio maté. Mentoo mio' am bia'i kamu wo matéi-téiro mangé.”

³⁵Si Yesus maya' mangé toyo', Sia kumundu wo rumepa an tana' wo sumombayang, sa woo ro'na Sia ra'ica mamuléng ing kawenduan si kéréan-Na.

³⁶Icua i Yesus, “O Abba, o Amang. Kailekan-Ku, pakasa ro'na émaan i Amang. Sa woo ro'na angkaieno mai eng kawenduan anio' a Yaku. Taan ra'ica iciit ing kasalé'an-Ku, iciito ing kasalé'an i Amang.”

³⁷Kumawus in itu si Yesus maréng angé a sé telu murit-Na, wo sérén-Na séra kinakili'ano. Icua-Na a si Simon Petrus, “Simon, kinakili'ano réén ko? Ra'ica réén makawoo ko matéi-téir mandé satu jamke'?

³⁸Matéi-téiro mangé wo sumombayango wosama' kamu ra'ica makéré im pangepé'an. Ulit en até miow masalé' méma' sé aicua-Ku, taan ra'ica kaémaan in owak iow.”

³⁹Wo Sia mangé sumombayang sumawel tanu si tarépé'.

⁴⁰Kewaréng-Na mai sumawel, sérén-Na séra kinakili'ano sumawel ampa'paan séra makili'o keli. Wo an tutuw séra pinolo-Na, ra'io kailekan éra sapa e musti icua éra ai Sia.

⁴¹Sia ka'i mangé sumombayang ing katelu. An tutuw-Na maréngai sumawel ai séra, icua-Na, “Makakili' wo makaena'pé' réén kamu? Ro'nao, an témponao. Sérén angé, si Toyaang i Tou isarakan a sé tou sé iméma' ing kamesé-meséaan.

⁴²Tumooro! Mayoo kita mangé a si tou sumarakan Yaku, ampa'paan sia matawio.”

⁴³An tutuw i Yesus maroma'pé', wo mai si Yudas si esaan asé sangapulu' rua murit-Na mewali-wali wo sé tou keli sé maali- ali in sa'bel wo im papangkur. Séra airu'du' é kikiiten é imam, sé makailek wutul in Torat wo sé matu'a.

⁴⁴Ra'ipé' mai am bitu séra, si Yudas icumuao esa tuus ai séra, “Si Tou ciomanku oka, Siao si musti tangkaan iow wo iwalio Sia wo téiran sumama-sama'.”

⁴⁵An tutuw éra icateka' mangé am bitu, si Yudas makala'us rumuru mangé a si Yesus wo kumua, “Guru!” Wo ciomanna si Yesus.

⁴⁶Timboian éra si Yesus wo tangkaan éra Sia.

⁴⁷Esaan asé murit i Yesus am bitu kumémbut in sa'bel wo parakenna si ata i imam wangko', akar en lunteng i tou itu imarembus.

⁴⁸Wo icua i Yesus ai séra, “Paweroten iow réén Aku anio' tou léwo', akar kamu mai tumangka' Yaku maali-ali in sa'bel wo im papangkur?

⁴⁹ Susur in endo penéré-nérén iow Aku masusui am Balé Le'nas, wo ra'ica tinangka' miow Aku. Taan mémang taniitu, wosama' en aipatic ang Kitap Le'nas musti lekepen.”

⁵⁰Wo pakasa sé murit-Na tumela'u Sia wo tumincas.

⁵¹Asi témpo itu, awéan esa mangalitou asaloke' mepaké ing kaéng lénen ipakasaput an owakna. Sia makii-kiit si Yesus an tayang. Wo sé tou am bitu rumaméji tumangka' sia,

⁵²taan séra asalo aicatimboi ing kaéng, wo iweta'na eng kaéng itu wo sia tumincas metangkol.

⁵³Kumawus in itu, iwali éra mangé si Yesus am balé i imam wangko'. Wo pakasa sé kikiiten é imam, sé matu'a wo sé makailek wutul in Torat imali'uso mai am bitu.

⁵⁴Ang karoro'an in itu, si Petrus mengii-ngiit si Yesus an tayang akar ang kintal im balé i imam wangko'. Wo am bitu sia lumukut mewali-wali wo sé pengawal e nguméngé in owak an duru in api.

⁵⁵Sé kikiiten é imam wo pakasa sé anggota Mahkamah Agama maéré-éré kasairian e méé kameséaan a si Yesus wosama' Sia makéré in ukuman patén, taan séra ra'ica makéré tuus.

⁵⁶Keli en tou masairi ka'i sé ra'ica wutul e méé kameséaan a si Yesus, taan pakasa sé aicua éra membam-balinaan.

⁵⁷Eng kasiwakana, awéan piraan tou e méé kasairian sé ra'ica wutul, icua éra,

⁵⁸ “Pinalinga ami si tou anio' kumua in tana'i, ‘Tongkaren-Ku oka em Balé Le'nas si niéma' é tou, wo asi endo katelu émaan-Ku oka Walé Le'nas walina, si ra'ica niéma' é tou.’ ”

⁵⁹Taan pakasa sé aicua éra itu ka'i ra'ica mensomaan si esa wo sé walina.

⁶⁰Wo si imam wangko' tumulung an uner in sidang wo mamuéi a si Yesus, “Kelian en aitudu éra ai Co, ra'ica réén sowaten-Mu en aitudu éra itu?”

⁶¹Taan si Yesus asaloke' imakapenes, Sia ra'ica sumowat in sapa-sapa. Wo wuéien ka'i i imam wangko' ai Sia, “Icoo réén si Mesias, si Toyaang i parayo-rayo ami?”

⁶² Wo isowat i Yesus, “Yakuo Sia. Kaséréan iow oka si Toyaang i Tou makalukut ang kakan i Makakawasa, wo mai an dangka' ing kambung-kambung an langit.”

⁶³Kelinga in itu, si imam wangko' mae'bow keli, ampa'paan in itu késéénna eng karaina wo icuana, “Sapapé' en torona kita mangéré sairi?

⁶⁴ Liningao miow in esa sapaoka Sia mangkaio in owak-Na mamuali Toyaang i Casuruan, en itu imojato si Amang Kasuruan. Wo sa réén kumiit icamu tambisa?” Wo puséén éra im baya sa si Yesus musti ukumen patén.

⁶⁵Wo tumo'tolo paruraan éra Sia. Tutuwan éra ing kaéng en amo-Na wo rukin éra Sia, wo mamuéi, “Éi Nabi! Icua-Mu mai é, séi si rumuki Ico?” Kumawus in itu Sia sepéén é pengawal-pengawal.

⁶⁶Ang karoro'an in itu, si Petrus ang kintalé' im balé i imam wangko', wo mai am bitu si ata wéwéné i imam wangko'.

⁶⁷An tutuwna in suméré si Petrus mangéngé an duru in api, tuusenna sama' eng gio i Petrus wo icuana, “Ico to si tatap mewali-wali wo si Yesus tou Nazaret itu?”

⁶⁸Taan si Petrus isumangkalke', “Ra'ica kailekanku sapa en aicuamu.” Kekawus ako in itu si Petrus mangé am papalen wangko' im balé i imam wangko'. Asi témpo itu, kumukuko mai si co'ko'.

⁶⁹Am bitu, si ata wéwéné makaséré ka'i si Petrus, wo icuana a sé tou am bitu, “Si tou anio' esaan asé makiit si Yesus.”

⁷⁰Taan si Petrus isumangkalke' ka'i. Ra'ica mento' uré, sé tou am bitu kumua a si Petrus, “Ra'io suméa' icoo si esaan ai séra, ampa'paan ko tou Galilea!”

⁷¹Wo tumo'tolo si Petrus kumutuk wo sumumpa, “Ra'ica katuusanku si tou ipengua-ngua miow itu!”

⁷²Wo asi témpo ituke' kumukuko mai makarua si co'ko'. Wo kata'néiano i Petrus en aicua i Yesus ai sia, “Ra'ipé' kumukuk karua si co'ko', ico makateluo sumangkal Yaku.” Wo si Petrus maamé' akar in sesendu'an.