Read Tontemboan Markus 7 Bible Online

Markus 7 - Tontemboan bible

Markus 7

¹Asi makasa, awéan piraan tou Farisi wo sé makailek wutul in Torat an Yerusalem owo mai meta'up wo si Yesus.

²Sérén éra sapaoka piraan murit i Yesus makan ra'ica imu'as ing kama kumiit ing kanaramen é tou Yahudi.

³Ampa'paan sé tou Farisi meputé wo sé tou Yahudi walina, séra ra'ica toro kuman sa ra'ica mu'as ing kama kumiit ing kanaramen. Wo pengatimboien éra in sama' eng kanaramen é apo-apo' éra.

⁴Wo ka'i sa séra maréngai am pasar, séra ra'ipé' toro kuman sa ra'ipé' imeresi in owak. Keliané' ka'i eng kanaramen walina sé pengatimboien éra in sama', tanu mai mu'as ing gelas, tampayang wo sé pakakas tambaga wo ka'i em patekelan.

⁵Ampa'paan in itu, sé tou Farisi wo sé makailek wutul in Torat mamuéi a si Yesus, “Kéitu réén sé murit i Tuang ra'ica makiit ing kanaramen é apo-apo'ta? Séra kuman ra'ica imu'as ing kama.”

⁶ Isowat i Yesus ai séra, “Wutulo sapa en aicua i Yesaya andumoro' miow, éi tou punek, awéan en aipatic in tana'i: ‘Em ba'ba' i bangsa anio' marayo-rayo Yaku, taan en até éra tayang a Yaku.

⁷Ra'ica wana torona séra maapo' a Yaku, ampa'paan en sususuien sé pengasusui éra a sé tou, asaloke' makiit im perénta sé niéma' é tou.’

⁸Em perénta i Amang Kasuruan ra'ica pengakiiten iow, taan em perénta sé niéma' é tou pengakiitan iow.”

⁹Icua ka'i Yesus ai séra, “Pandéi keli tuu kamu makélong im perénta i Amang Kasuruan, wosama' ro'na paliaran iow eng kanaramen iow in esa.

¹⁰ Indior aiwééo i Musa em perénta anio', ‘Siriino mangé si amang wo si inang iow’, wo ‘Si séike' mangé eng kumutuk si amang kuma'pa si inangna, sia musti maté.’

¹¹Taan em pasusui iow tana'i: Sa si esa tou kumua a sé matu'ana, ‘Sapa e musti iwééku a si amang wo si inang, aiwéékuo a si Amang Kasuruan,’

¹²Wo in taniitu aiwaya miow sia ra'ica mapandung ing kaperluan é matu'ana.

¹³Anaé, em pengakiiten iow asaloke' ing kanaramen-kanaramen sé tinerima miow a sé apo-apo', taan en Taar i Amang Kasuruan ra'io pengakiiten iow. Keliané' ka'i em balina sé tanu siitu sé pengaémaan iow.”

¹⁴Wo towan ka'i i Yesus sé tou keli itu wo icua-Na ai séra, “Kamu im baya, lingano mai Yaku, wo wéanio' rékén sumama-sama'.

¹⁵Sapa sé ang kesot owo si imuntep an owak i esa tou, en itu ra'- ica iméma' si tou itu manajis, taan sapa si cumesot an owak i tou itu, siituo e méma' sia manajis.” [

¹⁶Si séike' en awéan lunteng en luminga, aweso taré sia luminga!]

¹⁷An tutuw i Yesus muntep an esa walé en tumayang asé tou keli, sé murit-Na mamuéi ai Sia andumoro' ing kaangéan in andéan itu.

¹⁸Wo isowat-Na ai séra, “Ra'ica réén kaangéan iow en andéan itu? Ra'ica réén kailekan iow sapaoka sapake' sé ang kesot owo sé muntep am ba'ba' i esa tou ra'ica iméma' sia manajis,

¹⁹ampa'paan sé muntep itu ra'ica muntep an até taan muntepke' an tina'ina, wo tiya' ka'i ang kakus?” Wo in taniitu, icua i Yesus ka'i sapaoka pakasa eng kakanen ro'na kanen.

²⁰Wo icua-Na ka'i, “Sapa eng kumesot asi esa tou, siituo e méma' sia manajis,

²¹ampa'paan an untep owo in até é tou kumesot waya em bewerot léwo', mengaéma' in cabul, mengarombit, mengapaté tou,

²²mengasina, mengalongi', kaléwo-léwo'an, mengauwak, mengaéma' sé karican, mengana-nganat, mengaojat, mengatirayo wo keté até.

²³Pakasa en andumoro' sé léwo' itu lumembo mai an até owo, wo pakasa en itu mengaéma' sé tou manajis.”

²⁴Wo itela'u i Yesus en tampa itu wo mangé an sangkum in Tirus. Icateka' mangé am bitu Sia muntep an esa walé, wo ra'ica kiim-Na esaanke' tou e makailek sa Sia am bitu. Taan eng keai-Na am bitu kinailekanke' é tou.

²⁵Wo awéan esa inang si toyaangna wéwéné rinasuk i roh léwo', palinganna andumoro' i Yesus wo sia mai kumundu an dior ing kécéi-Na.

²⁶Si wéwéné itu tou Yunani taranak i Siro-Fenisia. Pekiupusenna a si Yesus sa woo ro'na musér si sétang asi toyaangna wéwéné.

²⁷Wo icua i Yesus ai sia, “Musti wesun-Ku owo sé toyaang, ampa'paan ra'ica loor e mindo ing kakanen é toyaang wo iwangkil a si asu.”

²⁸Taan isowat i wéwéné itu, “Wutul, é Tuang, taan si asu an darem i méja ka'i, icuman ing kakanen tela'u sé iparongkor é toyaang.”

²⁹Wo icua i Yesus a si wéwéné itu, “Ampa'paano i nunuwu'mu itu, maréngo, si sétang itu icumesoto asi toyaangmu.”

³⁰Kekawus in itu, si wéwéné itu maréng am baléna, wo sérénna si toyaangna makatekel am patekelan wo si sétang itu icumesoto.

³¹Wo itela'u i Yesus ka'i en sangkum in Tirus wo kumiit in Sidon e mangé an Lour Galilea, lumangkoi an sangkum in Dekapolis.

³²Am bitu iwali mai é tou ai Sia si esa tou wengel wo lémo' em pakanuwu'. Pekiupusen éra ai Sia wosama' maro ing kama-Na am bawo i tou itu.

³³Kekawus i Yesus wo si tou itu tumané asé tou keli, akar séra oka in dua, wo yuntep-Na em bua'na ing kama-Na an lunteng i tou itu. Sia rumura' wo pendamen-Na mangé en lila' i tou itu.

³⁴Wo si Yesus kumanat angé an langit, Sia méso' in aseng wo kumua, “Efata!” eng kaangéanna: “Mawuka'o!”

³⁵Asi témpo ituke' mawuka'o en lunteng i tou itu, wo en lila'na imasama'o akar sia ro'na maroma' in loor.

³⁶Aitaar i Yesus ai séra wosama' ra'ica ipepaar éra a si séiké' mangé eng kamamualian itu. Taan mandé séra peméro-méronen-Na, makaaweske' taré pengua-ngua éra.

³⁷Séra wutu-wutul mangaya'ka' wo kumua, “Niéma'-Na waya maloor, si wengel niéma'-Na malinga wo si wowo' niéma'-Na maroma'.”