Read Tontemboan Lukas 11 Bible Online

Lukas 11 - Tontemboan bible

Lukas 11

¹Asi sangando si Yesus masombayang an esa tampa. Makakawusai Sia isumombayang wo esaan a sé murit-Na kumua ai Sia, “Guru, pekiupusen ami susuianai kami masombayang, tanu ka'i si Yohanes Mabaptis masusui a sé muritna masombayang.”

²Wo icua i Yesus ai séra, “Sa kamu sumombayang, icuao mio' in tana'i, ‘Amang ami an sorga, e ngaran-Mu le'nas wo iparangka-rangka'. Mayoo si Amang Kumawasa tanu Kolano ami.

³Wéanai kami kakanen si paperlun ami susur in endo.

⁴Wo ampunganai eng kamesé-meséaan ami, ampa'paan kami ka'i mawéé ing kaampungan a si tou si méma' ing kameséaan ai cami. Wo ra'ica toro iwali kami muntep am pangepé'an.’ ”

⁵Wo si Yesus kumua a sé murit-Na maké in andéan: “Sa awéan esa tou ai camu mangé am balé i carapina ang katoora im bengi wo kumua, ‘Éi karapi, pekiupusenku sa ro'na iramanai woo aku telu roti.

⁶Ampa'paan awéan si carapiku ang karoro'an imawaya' itumuli am baléku, taan aku ra'io wana kakanen em béé ai sia.’

⁷Wo si carapina an untep im balé itu sumowat in tana'i, ‘Tioo tumerosol yaku! Em baléku pinalenankuo wo ka'i sé toyaangku kumili'o. Ra'io kiimku tumoor e méé sapa em pinangilekmu.’

⁸Icua-Ku ai camu, mandé séra in dua mekarapi, si tou an untep im balé itu ra'ica kiim tumoor e méé sapa em pinangilek i carapina itu. Taan ampa'paan si carapina itu ra'ica malawi' wo meki-kiupuske', ang kasomoianna si tou an untep im balé itu tantu tumoorke' wo méé sapa em pinangilek i carapina itu.

⁹Ampa'paan in ituo icua-Ku ai camu: Mangileko mangé wo kamu wéan oka. Éréno, wo kamu makéré oka. Tuméngkoro, wo em papalen wukaan oka torona miow.

¹⁰Ampa'paan susur in tou i mangilek tumerima oka, wo susur in tou i mangéré makéré oka, wo susur in tou en tuméngkor im papalen wukaan oka.

¹¹Awéan réén amang an uner iow e méé ula' a si toyaangna sa si toyaangna mangilek sera'?

¹²Kuma'pa méé kalajengking sa si toyaangna mangilek wulinga'? Tantu ra'- ica to?

¹³Anaé, sa kamu sé léwo' makailek mawéé sé loor a sé toyaang iow, wopé'taré si Amang iow an sorga! Iwéé-Na oka mai e Roh Le'nas a sé tou sé imangilek ai Sia.”

¹⁴Asi makasa awéan esa tou ampa'paan rinasuk i sétang sia imawowo' wo yusér i Yesus si sétang itu kumesot asi tou itu. An tutuw i sétang icumesoto, si tou itu ro'nao maroma'. Wo sé tou keli am bitu mangaya-ngaya'ka' isuméré ing kinamamualian itu.

¹⁵ Taan an uner é tou keli itu awéan e makua, “Sia mengausér sé sétang mapaké ing kawasa i Beelzebul, si kikiiten é sétang itu.”

¹⁶ Wo awéan ka'i ai séra mangepé' Sia. Pangileken éra ai Sia wosama' ro'na méma' ing kakaya'kaan e méé tuus sapaoka eng kawasa-Na itu asi Amang Kasuruan owo.

¹⁷Taan kailekan i Yesus em paaté-atén éra wo icua-Na ai séra, “Sa sé tou an esa kakolanoan meréndé-réndéran, tantu eng kakolanoan itu makatongka-tongkar. Taniitu ka'i sa sé tou an esa pamalé meréndé-réndéran, tantu em pamalé itu ka'i materi oka.

¹⁸Taniitu ka'i sa si kikiiten é sétang wo sé makiit sia meréndé-réndéran, tantu eng kakolanoan éra ra'ica kawisa tumang. Icua-Ku taniitu ampa'paan patudun iow Aku mengausér sé sétang mapaké ing kawasa i Beelzebul si kikiiten é sétang.

¹⁹Anaé, sa Aku musér sé sétang mapaké ing kawasa i Beelzebul, sé murit iow réén mengausér sé sétang mapaké ing kawasa sapa? Ampa'paan in ituo sé murit iow in esa e méé oka tuus sapaoka kamu suméa'.

²⁰Taan sa Aku musér si sétang maké ing kawasa i Amang Kasuruan, en ulitna si Amang Kasuruan Kumawasao tanu Kolano an uner iow.

²¹Sa awéan esa tou keter, wuta in lulutaw ipatéir im baléna in esa, tantu pakasa eng kasiyaan sé an untep im balé itu ra'ica rombiten é tou.

²²Taan sa awéan esa tou en lébé keter mai sumundur wo kumala si makawalé itu, eng kasiwakana pakasa en lulutaw pawerotenna ro'na lumoindong isia, andéten oka i tou lébé keter itu. Wo pakasa eng kasiyaan sé an untep im balé itu rombiten oka i tou lébé keter itu wo yéké-ékéna a sé kara-karapina.

²³ Si séi si ra'ica kiim mewali-wali wo Yaku, sia masundur Yaku, wo si séi si ra'ica kiim sumémbong lumi'us sé tou mai a Yaku, sia mengaéma' sé tou mentan-tanéan.”

²⁴Wo icua ka'i i Yesus, “Sa si roh léwo' kumesot asi esa tou, sia mangé lumi'cir in tana' karuinsungan e mangéré paento'an. Taan ra'ica kinéréanna wo werotenna, ‘Aweso taré aku maréng angé sumawel am balé si aitela'ukuo itu.’

²⁵Tutuw sia maréng angé am balé itu, sérénna em balé itu kina'isano wo tinu'tulo sumama-sama'.

²⁶Wo mangéna uwasen sé pitu roh walina sé lumébémai eng kaléwo' wo isia. Wo séra muntep wo mento' am bitu. Sumiwak angé em peri i tou itu lumébéomai eng kaléwo'na asi cataré.”

²⁷An tutuw i Yesus manuwu'pé' andumoro' in itu wo awéan esa wéwéné an uner é tou keli itu maangko' mangé a si Yesus, “Pakakamangen si inang e makéréo Toyaang tanu si Amang wo ka'i si sumusuo si Amang.”

²⁸Taan isowat i Yesus, “Sé pakakamangen, sé tou luminga in Taar i Amang Kasuruan wo pengaémaanna.”

²⁹ An tutuw kelio sé tou imali'usai a si Yesus wo icua-Na, “Sé tou menonou intarépé', tou léwo', séra mangilek a Yaku esa tuus. Taan tou tanu icamu ra'ica turu'an-Ku in tuus, aluar in tuus asi nabi Yunus.

³⁰ Ampa'paan meputé si nabi Yunus imamualio tuus a sé tou Niniwe, taniitu ka'i si Toyaang i Tou mamuali oka tuus a sé tou intarépé'.

³¹ Asi endo kaka'puan ing kayo'baan, si ratu Syeba a mékona owo touen oka sumawel mewali-wali wo icamu sé menonou intarépé' wo sia oka en tumuru' ing kaséaan éra. Ampa'paan si ratu itu mai an tempok ing kayo'baan owo en luminga ing kapinteran i Salomo. En ulitna, Yaku am bia'i en lumébémai wo si Salomo wo icamu sé menonou intarépé' ra'ica kiim luminga Sia.

³² Asi endo kaka'puan ing kayo'baan, sé tou Niniwe touen oka sumawel mewali-wali wo sé tou menonou intarépé' wo séra oka en tumuru' ing kameséaan iow sé menonou intarépé' en ukumen. Ampa'paan sé tou Niniwe mape'dis ang kamesé-meséaan éra an tutuw éra luminga in aicua i Yunus. En ulitna Yaku en lumébé mai wo si Yunus an dior iow, taan kamu ra'ica mape'dis.”

³³ “Ra'ica wana mandé esake' tou e méngkét in sosoloan wo iweta'na an darem im balé kuma'pa kelewenna im bantang. Tantu iweta'na en sosoloan itu am patuliran in sosoloan wosama' pakasa en tou sé muntep am balé itu suméré in sendotna.

³⁴ Em beren itu sosoloan in owak. Sa em beren iow itu looré' maséré, eng katouan iow ka'i sumendo-sendot. Taan sa em beren iow kéréw oka, eng katouan iow ka'i mariréimbeng.

³⁵Ampa'paano in itu mareti-retio taré wosama' en sendot ang katouan iow itu ra'ica mariréimbeng.

³⁶Sa en owak iow sendot wo ra'ica wana e riréimbeng, tantu eng katouan iow uli-ulit sendot. En itu meputéo in sendot in sosoloan mengasendot icamu.”

³⁷Kekawus i Yesus maroma', awéan si esa tou Farisi menot si Yesus e mangé kuman am baléna. Anaé, si Yesus mangé am baléna wo kuman am bitu.

³⁸Si tou Farisi itu mangaya'ka' isuméré si Yesus makano ra'ica imu'as ing kama kumiit in atoran agama éra.

³⁹Taan icua i Apo' Yesus a si tou Farisi itu, “Kamu sé tou Farisi, ipaturu' miow a sé tou sapaoka kamu mengaéma' in atoran agama miow, taan en até miow imawutao ing kaléwo'an wo mengaandét ing kasiyaan é tou. En itu meputé wo kamu mengawu'as im paelepan wo im pakanan ang kesotnake' taan an untepna kotor keli.

⁴⁰Éi camu tou bodok! Si Amang Kasuruano e méma' sé ang kesot in owak iow wo ka'i in até miow itu.

⁴¹Ampa'paan in ituo iwééo mio' sapa sé ai camu en tumawang sé tou lengéi. An tutuw iow iméma' in tanu siitu, pakasa waya uli-ulit maweresi.

⁴² Icawangkuro mio' kamu sé tou Farisi! Ampa'paan ipengawéé miow a si Amang Kasuruan sangapepulu' wuéna in tinanem iow tanumai salasi, inggu[10] wo pakasa in lalaina in tinanem pengaséndéén sé membam-balinaan. Taan sé pengaémaan iow marapitke' a sé tou walina wo ka'i ra'ica mengaupus a si Amang Kasuruan. En ulitna si musti pengaémaan iow, tioo marapit a sé tou walina wo mengaupus angé a si Amang Kasuruan wo tioo ilupa miow e mengaéma' sé walina.

⁴³Éi kamu sé tou Farisi, icawangkuro mio' kamu! Ampa'paan kamu masalé' mengalukut an tampa pasiri-siriin am balé-walé paapo'an é agama Yahudi wo masalé' pasiri-siriin é tou am pasar.

⁴⁴Icawangkuro mio' kamu! Ampa'paan kamu tanuoka ing kubur ra'ica wana watu ipatuus. Anaé, am bawo ing kubur itu pemaya-mayaan é tou ampa'paan ra'ica kailekan éra sapaoka awéan tou en aicubur am bitu.”

⁴⁵Wo esaan asé makailek wutul in Torat itu kumua a si Yesus, “Guru, sé aicua i Guru itu, maséroo ka'i cami.”

⁴⁶Taan isowat i Yesus ai séra, “Éi kamu sé makailek wutul in Torat, icawangkuro ka'i kamu! Ampa'paan kamu méma' in atoran-atoran uter keli sé ra'ica kaémaan é tou. Taan kamu in esa ra'ica kiim tumawang iséra tumambisa méma' in atoran-atoran itu mandé esake'.

⁴⁷Icawangkuro mio' kamu! Ampa'paan kamu mengaéma' ing kubur é nabi indior wo en ulitna séra indior pinaté é apo-apo' miow.

⁴⁸Wo in taniitu, pangakun iow in esa sapaoka wutulo sapa sé niéma'o é apo-apo' miow indior. Ampa'paan sé apo-apo' miow e imaté sé nabi wo niéma' miow eng kubur é nabi itu.

⁴⁹Ampa'paan in ituo, indior maké ing kapinteran-Na si Amang Kasuruan kumua in tana'i, “Yutus-Ku oka sé nabi wo sé ruru'du'an-Ku mangé a sé tou Israel. Sé sangaperua ai séra okoien oka wo sé sangaperua ka'i patén oka.”

⁵⁰Anaé, ukumen oka i Amang Kasuruan kamu sé menonou intarépé' ampa'paan pakasa sé nabi pinatéo é tou tumo'tolke' mai eng kayo'baan anio' niéma',

⁵¹ tumo'tolke' mai ing kepaté i Habel, akar ing kepaté i nabi Zakharia, si pinaté ang kintal im Balé Le'nas am paawuun im pawetaan i raragés wo ing Kamar Le'nas. Icua-Ku ai camu, pakasa en tou menonou intarépé', ukumen oka i Amang Kasuruan ampa'paano sé niéma' é apo-apo' miow itu.

⁵²Icawangkuro mio' kamu sé makailek wutul in Torat! Kailekan iow tumambisa kumiit ing kasalé'an i Amang Kasuruan, taan kamu in esa ra'ica maéma' taniitu. Taan pakalaan iowke' taré sé tou walina sé masalé' kumiit ing kasalé'an i Amang Kasuruan. En itu meputé kamu makakuluo ing kukusi' im papalen taan ipakaéma'ke' miow akar sé tou ra'ica icauntep.”

⁵³Kumawus in itu si Yesus tumela'u in tampa itu. Wo a si témpo itu sé makailek wutul in Torat wo sé tou Farisi tumo'tolo uli-ulit masuut a si Yesus. Ampa'paan in ituo ta'kongen éra si Yesus maké wuwuéien membam-balinaan.

⁵⁴Ang karoro'an in itu, peméa-méan éra rékén wosama' kéréan éra eng kaséaan i Yesus an sosowat-Na.