Read Tontemboan Lukas 13 Bible Online

Lukas 13 - Tontemboan bible

Lukas 13

¹Asi témpo itu, awéan piraan tou mai icumua a si Yesus in andumoro' é tou Galilea sé pinaté i Pilatus an tutuw éra ang karoro'an imaali mai i raragés a si Amang Kasuruan an Yerusalem.

²Wo icua i Yesus a sé tou itu, “Pawasan iow réén séra pinaté tanu siitu wo eng kamesé-meséaan éra en lumébémai wo ing kamesé-meséaan é tou Galilea walina?

³Icua-Ku ai camu ra'ica! Taan weroten iow sumama-sama', sa kamu ra'ica mape'dis ang kamesé-meséaan, icamu im baya ka'i maté oka tanu iséra.

⁴Kuma'pa, pawasan iow réén sé sangapulu' walu tou imaté rine'baan i menara an Siloam, eng kameséaan éra lumébémai wo eng kameséaan é tou walina sé maento' an Yerusalem?

⁵Icua-Ku ka'i ai camu ra'ica! Sa kamu ra'ica mape'dis ang kamesé-meséaan, kamu im baya maté oka ka'i tanu iséra.”

⁶Kumawus in itu sisil i Yesus esa andéan, “Awéan esa tou, makaanu tuura in ara ayusew an uma in anggorna. Wo sia mangé méré im bua'na an tuura in ara itu, taan ra'ica wana wua'na mandé esake' eng kinéréanna.

⁷Wo icuana a si tou matawoi in uma itu, ‘Sérén, teluo ngata'un aku mai maéré-éré im bua'na an tuura in ara anio', taan ra'ica wana mandé esake' wua'na eng kinéréanku. Tongkéieno taré si tuura itu! Ra'ica wana torona si tuura anio' menonou!’

⁸Taan isowat i tou matawoi in uma itu, ‘Amang, iwaya owo mio' si tuura anio' menonou asi ta'un anio'. Pacolenku oka en tana' an li'cir in tuura itu wo pupukkenku.

⁹Si séi e makailek, asi ta'un maai mua' oka. Taan sa ra'ica mua', tongkéieno.’ ”

¹⁰Asi esa endo Sabat, si Yesus masusui an esa walé paapo'an é agama Yahudi.

¹¹Am bitu awéan esa wéwéné sangapulu' walu ngata'uno sumakit ampa'paan sia kinawasa i roh léwo', akar en licurna mawo'koo wo ra'io makawoo tumulung in sama'.

¹²Keséré i Yesus si wéwéné itu wo towan-Na, icua-Na, “Inang, en sakitmu imasama'o.”

¹³Wo si Yesus maro ing kama-Na a si wéwéné itu. Asi témpo ituke' si wéwéné itu rondoro em pakatulung. Wo sia rumayo wo sumiri' si Amang Kasuruan.

¹⁴ Taan si kikiiten am balé paapo'an é agama Yahudi itu mae'bow a si Yesus ampa'paan isumama' in tou an endo Sabat. Wo icuana a sé tou keli, “Awéan enem ngando em pengatawoi, ampa'paan in ituo mayo mapasama' ai Sia asi esa endo patawoi itu, tioo asi endo Sabat!”

¹⁵Taan isowat i Yesus a si tou itu, “Icamu anio' punek! Asi endo Sabat kamu im baya mangé mekar si sapi kuma'pa keledai ang kurungan wo iwali miow mangé melep.

¹⁶Am bia'i awéan esa wéwéné taranak i Abraham, sia sangapulu' walu ngata'uno kinawasa i kikiiten é sétang. Suméa' réén sa sia iwekar ang kakawasaan i kikiiten é sétang asi endo Sabat?”[11]

¹⁷En aisowat i Yesus itu, iméma' sé kaséké'-Na wutu-wutul malawi' taan sé tou walina masalé-salé' isuméré pakasa sé kakaya'kaan niéma' i Yesus.

¹⁸Wo icua ka'i i Yesus, “Yandé-Ku in sapa eng Kakolanoan i Amang Kasuruan wo en itu ipeputé-Ku in sapa?

¹⁹En itu yandé-Ku tanu esa watuna tumeki-tekic am pakasa im batuna niindo i esa tou wo mangé yusewna an umana. Makauré em batuna itu tumou wo mamuali sangatuur wo mai sé burung méma' rumun am panga-pangana in tuura itu.”

²⁰Wo icua ka'i i Yesus, “Yandé-Ku in sapa eng Kakolanoan i Amang Kasuruan?

²¹Eng Kakolanoan i Amang Kasuruan, ayandé ka'i tanu i ragi si niindo i esa wéwéné wo icemuna an topong epat ngapulu' liter akar ruméis waya.”

²²Kumawus in itu si Yesus lumala'us im bawaya'-Na maangé an Yerusalem. An tutuw itu Sia ka'i masusui a sé tou ang kota-kota wo an doo-roong langkoian-Na.

²³Wo awéan esa tou mamuéi ai Sia, “Guru, wayake' réén im pira sé tou en lowiren i Amang Kasuruan?”

²⁴ Isowat i Yesus a sé tou am bitu, “Rumaméjio kumiit im papalen pesut. Ampa'paan, icua-Ku ai camu, keli en tou sé rumaméji kumiit am papalen itu taan séra ra'ica icauntep.

²⁵Sa si makawalé itumulungo wo imaleno im papalen, kamu tumulung oka ang kesot wo menéngko-néngkor im papalen wo icua oka miow, ‘Amang, wukaanai em papalen torona ami!’ Wo isowatna ai camu, ‘Ra'ica katuusanku kamu wo ra'ica kailekanku kamu am bisa owo mai.’

²⁶ Wo icua miow oka, ‘Tantu si Amang makatuus icami. Icamio sé icuman wo melep mewali-wali wo si Amang wo ka'i si Amango e masusui ai cami an lala-lalan ang kota ami.’

²⁷Taan icua i makawalé itu ai camu, ‘Ra'ica katuusan-Ku kamu am bisa owo mai! Mangém kamu im baya sé mengaéma' ing kaléwo-léwo'an.’

²⁸ An tutuw iow suméré si Abraham, Ishak wo si Yakub wo pakasa sé nabi masalé-salé' ang Kakolanoan i Amang Kasuruan, kamu maamé' oka akar mengare-ngare'ket im baang ampa'paan kamu tiya' oka ang kesot.

²⁹Wo sé tou a micona, a makona, a mongéna wo a mékona owo, maai oka wo lumukut kuman mewali-wali wo masalé-salé' an untep ing Kakolanoan i Amang Kasuruan.

³⁰ En ulitna, awéan sé tou sumomo-somoi mamuali oka tou kumataré-taré wo awéan sé tou kumataré-taré mamuali oka tou sumomo-somoi.”

³¹Asi témpo itu, awéan piraan tou Farisi mai icumua a si Yesus, “Amang, mangém wo itela'uo en tampa anio', ampa'paan si Herodes masalé' maté Ico.”

³²Isowat i Yesus ai séra, “Mangém wo icuao mangé a si serigala itu, ‘Asi endo anio' wo woondo yusér-Ku sé roh léwo' wo sumama' sé tou sumakit, taan asi endo katelu, lekepen-Ku waya en tawoien-Ku.’

³³Mandé ka'i in taniitu, asi endo anio', woondo wo asi endo katelu, Yaku musti lumala'us im bawaya'-Ku maangé an Yerusalem. Ampa'paan tumo'tolke' mai indior akar intarépé', ra'ica kawisa sé nabi pinaté ang kesot in Yerusalem.

³⁴Éi tou Yerusalem, éi tou Yerusalem! Pinaté miow sé nabi wo ka'i winangkil iow im batu sé tou ayutusai i Amang Kasuruan. Makapirao Aku masalé' lumi'us icamu im baya mai anduru-Ku, meputé si inang é ko'ko' lumi'us sé sisina an darem in tétéléwna. Taan ra'ica kiim iow.

³⁵ Ampa'paan in ituo, eng kotamu itela'u oka wo mamuali oka lulu in tou. Icua-Ku ai camu, Yaku ra'io kaséréan iow. Taan asi orasna, sérén iow oka Aku wo icua miow, ‘Irayoo mangé Sia si mai ang karapi ngaran i Amang Kasuruan.’ ”