Read Tontemboan Lukas 15 Bible Online

Lukas 15 - Tontemboan bible

Lukas 15

¹ Kelian sé matagi im pajak wo sé tou ang kamesé-meséaan mai a si Yesus en luminga Sia.

²Wo sé tou Farisi wo sé makailek wutul in Torat tumo'tolo mengimbu-ngimbulu. Icua éra, “Si Tou anio' tumerima sé tou iméma ing kamesé-meséaan wo kuman mewali-wali wo iséra.”

³Ampa'paano in itu, isisil i Yesus en andéan anio' ai séra:

⁴“Sa esaan ai camu makadomba sangaatus wo katalaan esa, sapa en émaanna sa? Tantu itela'una sé siow ngapulu' siow domba itu an tana' rerukutan wo mangé mangéré si esa domba si aicatala itu.

⁵Wo sa si domba itu kinéréannao, ang karapi in arui wuléngenna sia wo uwitenna mangé am balé.

⁶An tutuw icateka'o am balé, towanna sé kara-karapina wo sé katana'na wo icuana ai séra, ‘Mayoo maaru-arui ang karapiku ampa'paan si dombaku icatala kinéréankuo.’

⁷Icua-Ku ai camu, taniitu ka'i pakasa sé a mangé en sorga séra maaru-arui oka sa awéan esa tou ang kamesé-meséaan mape'dis. Séra lébé arui ampa'paano i esa tou si mape'diso itu, wotaré sé siow ngapulu' siow tou sé mengaéma'o im butul sé ra'io sangali mape'dis.”

⁸“Awéan esa wéwéné makaanu sangapulu' roit pérak. Wo sia kinatalaan esa. Sapa en émaanna? Tantu sia méngkét in sosoloan, ka'isanna em balé wo érénna sumama-sama' en doit itu akar ing kéréan.

⁹An tutuw en doit itu kinéréannao, towanna sé kara-karapina wo sé katana'na wo icuana, ‘Mayoo maaru-arui ang karapiku, ampa'paan en doit pérakku si catala kinéréankuo.’

¹⁰Icua-Ku ai camu, tanu siitu ka'i sé malaékat i Amang Kasuruan an sorga séra ka'i maaru-arui oka sa awéan esa tou mape'dis ang kamesé-meséaan.”

¹¹Sisil ka'i i Yesus esa andéan, “Awéan esa amang makatoyaang, rua tuama.

¹²Asi makasa, si toyaang ka'karan kumua a si amangna, ‘Amang, iwééo mai a yaku asi endo anio', si mamuali bagéanku asi kasiyaanta.’ Wo iwéténg i amang itu eng kasiyaan éra a sé rua toyaangna.

¹³Asaloke' maya' im piraan ngando wo iwangkér waya i toyaang ka'karan em bagéanna itu wo sia mangé an esa roong tumaya-tayang. A mangé mbitu sia menonou asaloke' makiit ing kasalé'anna sé ra'ica loor wo menga'pu-nga'puke' in doit.

¹⁴An tutuw en doitna imaka'puo waya, wo pakasa sé roong an sangkum itu tinenao ing kaareman wangko', akar si toyaang ka'karan anio' tumo'tolo mawendu.

¹⁵Wo sia mangé tumawoi a si esa tou an doong itu. Wo sia iru'du' i tou itu mangé an uma en tuméir sé wawina.

¹⁶Sia maaremo keli, akar casalé'nao woo kuman ing kakanen é wawi itu. Mandé ka'i sia maaremo keli, ra'ica wana mandé esake' tou e méé ing kakanen ai sia.

¹⁷Wo sia manesel in owak wo memero-merot waya sé niéma'nao wo kumua, ‘Am balé i amangku pakasa sé atana kumeli-keli eng kakanen, taan am bia'i aku tawio maté in arem.’

¹⁸Aweso taré aku tumu'tulo wo maréngo mangé a si amangku wo icuaku oka ai sia, ‘Amang yaku méma'o ing kamesé-meséaan a si Amang Kasuruan wo a si amang.

¹⁹Ra'io patus ka'i aku patuulen toyaang i amang. Émaano mai aku esaan tou matawoi a si amang.’

²⁰Wo sia tumu'tul wo maréng angé a si amangna. Tayangé' im balé, sia kinaséréano i amangna. Wo mai eng kaupusan i amangna wo sia tuméron angé sumungkul si toyaangna itu, ke'kep- enna wo ciomenna.

²¹Wo si toyaang itu kumua a si amangna, ‘Amang, aku méma'o ing kamesé-meséaan a si Amang Kasuruan wo a si amang. Ra'io patus aku patuulen toyaang i amang.’

²²Taan si amangna itu asalo tumowa sé atana wo icuana, ‘Mario-rior, paalinai eng karai si lumoo-loor wo pakéo mio' ai sia. Wo ka'i pakéano mio' cincin am bua'na ing kamana wo sapatu ang kécéina.

²³Kumawus in itu sisiro mio' sapi wo'bas kemel, pokoleno, siwon wo mayoo kuman wo masalé-salé'.

²⁴Ampa'paan si toyaangku anio' imatéo taan itumouo sumawel. Wo ka'i sia icatalao taan kinéréano sumawel.’ Wo tumo'tolo séra maaru- arui.

²⁵Asi témpo itu si toyaang luluna an umapé'. An tutuw sia mawaréngo wo matawio im balé, kalingaanna en suara musik wo kakantaren maéngké.

²⁶Kumawus in itu towanna esaan asé ata itu wo mamuéi ai sia, ‘Sapa réén e mamuali am baléku?’

²⁷Isowat i ata itu, ‘Si tuarimu maréngo mai sumawel wo si amangmu rumu'du' mokol sapi wo'bas kemel, ampa'paan kinéréannao si toyaangna ang karapi in owak sama'.’

²⁸Kelinga in itu, si toyaang luluna anio' mae'bow akar sia ra'- ica kiim muntep am balé. Wo si amangna kumesot, lepéienna sia wosama' muntep.

²⁹Taan sinowatnake' taré si amangna, ‘Ta'uno aku mawendu-wendu matawoi wo maselewir a si amang wo ra'ipé' kawisa aku kumélong im perénta i amang, sapao en aiwéé i amang a yaku? Mandé esake' mémbé' teké', ra'ipé' kawisa iwéé i amang a yaku e méma' ing kasalé-salé'an wo sé kara-karapiku!

³⁰Si toyaang i amang itu kuma'puo ing kasiyaan i amang ang karapi é wéwéné sundal. Taan an tutuw sia maréngai, si amang mokol sapi wo'bas kemel iwéé ai sia!’

³¹Wo isowat i amangna, ‘Toyaangku, ico tatap mewali-wali wo yaku am bia'i. Pakasa eng kasiyaanku, kasiyaanmu ka'i.

³²Anaé, intarépé', kita musti masalé-salé' wo maaru-arui, ampa'paan si tuarimu itu imatéo taan intarépé' itumouo sumawel, sia aicatalao taan intarépé' kinéréano.’ ”