Read Tontemboan Lukas 16 Bible Online

Lukas 16 - Tontemboan bible

Lukas 16

¹Kumawusai in itu sisil i Yesus esa andéan a sé murit-Na: “Awéan esa tou siya' makaanu esa tou si tinokéanna mengaurus in doitna. Wo awéan tou mangé kumelak a si tou siya' itu sapaoka si tou mengaurus in doitna itu asaloke' meka'pu in doit i tou siya' itu.

²Wo towanna si tou mengaurus in doit itu wo icuana, ‘Pinalingakuo sapaoka ko asaloke' menga'pu-nga'pu in doitku, ampa'paano in itu intarépé' iwééo mai a yaku pakasa sé andumoro' in tawoienmu maurus in doitku. Ampa'paan ko ra'- io toro murus in doitku.’

³Wo si tou mengaurus in doit itu memero-merot in tana'i, ‘Sapa e musti émaanku intarépé'? Yaku tawio yento' i tuangku an tawoien mengaurus in doitna. Sa macol aku ra'ica makawoo, sa aku mangile-ngilek, kalawiin oka mai.

⁴O, kailekanku en émaanku sa. Wosama' sa aku yento' an tawoien mengaurus in doit, yaku musti mangéré karapi e masalé' tumerima yaku am balé éra sa.’

⁵Wo towanna maesa-esa sé tou awéan utang a si tuangna. Icuana a si tou kataré, ‘Pira réén eng kakeli in utangmu a si tuangku?’

⁶Isowat i tou itu, ‘En utangku esa ngaatus tampayang solo zaitun.’[12] Wo icuana a si tou itu, ‘Nio' en surat utangmu. Lumukuto mio' am bitu ko wo perioreno mio' i matic: Lima ngapulu' tampayang.’

⁷Wo icuana ka'i a si tou karua, ‘Ico, pira réén eng kakeli in utangmu?’ Isowat i tou itu, ‘Sangariwu karong gandum.’[13] Wo icuana a si tou itu, ‘Nio' en surat utangmu, ipatico mio' walu ngaatus karong.’

⁸Wo si tou mengaurus in doit péngkor en até itu iparayo i tuangna ampa'paan sia pandéi maéré-éré lalan torona ing kalooranna in esa. Mémang wutul, sé tou makiit ing kasalé'an ing kayo'baan, séra en lébé pandéi maéré-éré lalan torona ing kalooran éra in esa wotaré sé tou makiit ing kasalé'an i Amang Kasuruan.

⁹Icua-Ku ai camu, pakéno mangé eng kasiyaan ing kayo'baan anio' en tumawang sé tou e makéré karapi, wosama' sa eng kasiyaan iow maka'puo, kamu teriman oka am paento'an an sorga, si ento'an iow akar ing kauré-uré.

¹⁰Si tou ro'na tokéan in tawoien teké', sia ka'i ro'na tokéan in tawoien wangker. Taan si tou ra'ica toro tokéan in tawoien teké', sia ka'i ra'ica toro tokéan in tawoien wangker.

¹¹Anaé, sa kamu ra'ica toro pengatokéan ing kasiyaan ing kayo'baan, si séi en tumoké ai camu ing kasiyaan wutul an sorga?

¹²Wo sa kamu ra'- ica toro pengatokéan e murus ing kasiyaan é tou walina, si séi e masalé' tumoké in sapake' mangé ai camu e mamuali anu miow?

¹³ Si esa ata tantu ra'ica toro tumawoi a sé rua tuang. Ampa'paan sa tanu siitu, icasuutna oka si esa tuang wo mengaupus si tuang walina. Kuma'pa, sia le'tek oka a si tuang esa wo ra'ica mapandung si tuang walina. Taniituo ka'i kamu, tantu ra'ica toro sumelewir a si Amang Kasuruan sa memero-merotke' ing kasiyaan ing kayo'baan.”

¹⁴Pakasa sé aicua i Yesus itu, pakalingan é tou Farisi sé masalé-salé'ke' in doit itu. Wo icé'ké' éra Sia.

¹⁵Wo icua i Yesus ai séra, “Kamu mapaturu-turu' kéndo' a sé tou walina sapaoka kamu mengaéma' im butul, taan en até léwo' miow kailekan i Amang Kasuruan. Ampa'paan sapa em paanggapen é tou awéan wééna, nianggap i Amang Kasuruan wutu-wutul ra'ica wana wééna.

¹⁶ Eng kitap-kitap sé aipatic i Musa wo eng kitap-kitap sé aipatic é nabi walina, tatap pengapakéné' akar an jaman i Yohanes Mabaptis menonoué'. Wo tumo'tolai an jaman itu en Abar Kaaruien andumoro' ing Kakolanoan i Amang Kasuruan tumo'tolo ipakua-kua wo sé tou uli-ulit rumaméji mamuali tou-Na ang Kakolanoan-Na.

¹⁷ Mandé in taniitu en ukum Torat awéan akar ing kauré-uré. Mandé en langit wo eng kayo'baan catala, taan en ukum Torat ra'ica wana em batalen mandé esake' urup.

¹⁸ Si séi en cuméré si penanaanna wo kumawéng wéwéné walina, sia itu mabersinao. Wo si séike' eng kumawéng si wéwéné aicéré i penanaan, sia ka'i mabersinao.”

¹⁹“Awéan esa tou siya' si memaké-maké in juba pares niéma' ang kaéng alus owo, susur in endo sia masalé-salé' ang kasiyaanna.

²⁰Wo awéan ka'i esa tou lengéi makangaran Lazarus. En owakna wuta im péla' wo aitekel an dior im papalen im balé i tou siya' itu.

²¹Sia maaremo keli akar sia masalé' woo kuman ing kakanen si marongkor a méja i tou siya' itu. Wo mai ka'i sé asu sumila' im péla-péla'na.

²²Wo si Lazarus itu maté wo sia iwali mangé é malaékat lumukut an diit i Abraham an sorga. Si tou siya' itu ka'i maté wo sia cubur é tou.

²³An tampa é tou imaté si tou siya' itu ang karoro'an imawendu. Wo an tutuw sia kumanat angé, sérénna si Abraham an tampa tayang wo si Lazarus an duruna.

²⁴Wo si tou siya' itu maangko' mangé icuana, ‘Amang Abraham, icaupusai aku. Wenduo keli aku an untep in api anio', anaé ru'du'o si Lazarus tumo'to' in tempok im bua'na ing kamana an dano wo mai rumames in lila'ku.’

²⁵Taan icua i Abraham, ‘Éi toyaangku, ta'néieno mangé sumama-sama', an tutuw ko menonoué', ico imakéréo waya sé loor taan karu' si Lazarus makéréke' waya sé ra'ica loor. Intarépé' sia makéréo im pangiboran am bia'i wo ico mawendu keli.

²⁶Wo ka'i am paawuun ami wo ico, awéan eng kumawu', esa pokal rarem wo welar keli, anaé sé tou am bia'i sé masalé' mio' am bitu kuma'pa sé tou am bitu sé masalé' mai am bia'i ra'ica calewet.’

²⁷Wo icua i tou siya' itu, ‘Sa réén taniitu, pekiupusenku a si amang, wosama' ru'du'mu si Lazarus mangé am balé i amangku.

²⁸A mangé mbitu awéané' lima metuari tuama. Anaé, ru'du'o si Lazarus e mangé mokéi ai séra akar séra ra'ica muntep an tampa kawenduan anio' sa.’

²⁹Taan icua i Abraham, ‘Ai séra awéano eng kitap-kitap si aipatic i Musa wo ka'i eng kitap-kitap é nabi! Mandéo séra kumiit sapa sé aipatic ang kitap-kitap itu.’

³⁰Wo isowat i tou siya' itu, ‘Ra'ica awes é amang Abraham. Taan sa awéan tou tumou sumawel am papaté wo mangéna pokéian séra, tantu séra mape'dis oka ang kamesé-meséaan.’

³¹Icua i Abraham ai sia, ‘Sa ra'ica pandungen éra eng kasairian ang kitap-kitap i Musa wo sé nabi, séra ra'ica kawisa maéman, mandé ka'i awéan tou tumou sumawel am papaté e mangé mokéi ai séra.’ ”