Read Tontemboan Lukas 17 Bible Online

Lukas 17 - Tontemboan bible

Lukas 17

¹ Icua i Yesus a sé murit-Na, “Ang kayo'baan anio', tantu awéan en andumoro' sé ro'na méma' si tou katawéran méma' ing kamesé-meséaan. Taan icawangkuro mio' si tou makawali sé tou walina ang kamesé-meséaan!

²Sa si tou itu tumawér esaan asé tou sé ra'ipé' keter em paémanen anio' akar méma' ing kamesé-meséaan, aweso taré eng kolot i tou itu wa'kesan im batu wangker wo mangé iwangkil an ta'sic.

³ Ampa'paan in itu kamu mareti-retio mangé! Sa si poow iow esa paémanen méma' ing kamesé-meséaan, romaan angé sia. Wo sa sia manesel ing kamesé-meséaanna, ampungano mangé sia.

⁴ Sa sia méma' ing kamesé-meséaan ai camu makapitu en sangando wo makapitu sia maréngai ai camu wo kumua, ‘Yaku manesel ampa'paan aku méma'o ing kamesé-meséaan,’ musti ampungan iow sia.”

⁵Wo sé sangapulu' rua ruru'du'an itu kumua a si Apo' Yesus, “Guru, keterenai em paémanen ami!”

⁶Wo isowat i Apo' Yesus, “Sa kamu maéman mandé ka'i em paémanen iow itu tanuke' im batuna si tumeki-tekic, kamu ro'na merénta in tuura in ara anio' makémbut wo causew an ta'sic, tantu en tuura anio' kumiit im perénta miow.”

⁷“Sa esaan an uner iow makaata si mapajéko in uma kuma'pa matéir sé domba wo an tutuw si ata itu imaréngo mai am balé miow, makala'us réén towan iow sia, ‘Mayoo kuman?’

⁸Tantu ra'- ica! Taan taré cua miow a si ata itu, ‘Tu'tuleno mai eng kakanenku. Sumawelo mio' karai ko wo selewiranmu mai aku akar aku makakan. Sa aku imakakano, ro'nao ko kuman wo melep.’

⁹Wo sa pakasa sé airu'du' miow niéma'o i ata itu, kuanan iow réén i makapulu'sama' sia? Tantu ra'ica!

¹⁰Taniituo ka'i kamu. Sa niéma'o miow waya sé airu'du' i Amang Kasuruan ai camu, kumuao mangé in tana'i, ‘Kami asaloke' ata si ra'ica patus makéré i rarayo. Kami mengaéma'ke' sé airu'du' ai cami.’ ”

¹¹Am bawayaan i maangé an Yerusalem, si Yesus maya' kumiit in supu an sangkum in Samaria wo eng Galilea.

¹²An tutuw Sia muntep an esa roong wo mai sé sangapulu' tou sumakit kusta taan tumulung tumayang toyo',

¹³wo séra maangko' mangé a si Yesus, “Yesus! Guru! Icaupusai kami!”

¹⁴ Wo séra téintengen i Yesus wo icua-Na, “Mangém kamu a sé imam wo ituru'o mio' en owak iow ai séra.” Ang karoro'an éra i mawaya', séra imasama'o.

¹⁵An tutuw si esaan ai séra suméré sapaoka en owakna imasama'o wo sia maréng angé sumawel a si Yesus. Ang karoro'anna imawaya', sia marayo-rayo si Amang Kasuruan ang karapi in taangko'.

¹⁶An tutuw sia icateka'o mangé a si Yesus wo sia kumundu an dior ing kécéi-Na wo méé i makapulu'sama' ai Sia. Si tou itu, tou Samaria.

¹⁷Wo cua i Yesus, “Kailekan-Ku sé sangapulu' tou tarépé' imasama'o waya, am bisa réén sé siow itu?

¹⁸Kéitu réén wayake' si tou ra'ica Yahudi anio' si maréngai sumawel e rumayo wo sumiri' a si Amang Kasuruan?”

¹⁹Wo cua i Yesus a si tou itu, “Tumulungo wo maya'o mangé, ampa'paano ko maémano a Yaku, ko imasama'o.”

²⁰Asi sangando awéan piraan tou Farisi mamuéi a si Yesus, “Kawisa oka réén si Amang Kasuruan maai kumawasa tanu Kolano a sé tou-Na?” Wo isowat i Yesus ai séra, “Si Amang Kasuruan maai kumawasa tanu Kolano a sé tou-Na, ra'ica rinioran in tuu-tuus sé ro'na kaséréan é tou.

²¹Anaé, ra'ica wana tou e ro'na kumua, ‘Sérénai, Sia am bia'i’ kuma'pa ‘Sérén angé, Sia a mangé mbitu!’ En ulitna, si Amang Kasuruan Kumawasao tanu Kolano an uner iow ang kayo'baan anio'.”

²²Wo cua i Yesus a sé murit-Na, “Maai oka en témpona sa, kamu masalé' keli suméré si Toyaang i Tou mandé sangandoke' taan Sia ra'ica kaséréan iow.

²³Wo cua oka é tou ai camu, ‘Sérén angé, Sia a mangé mbitu’, kuma'pa ‘sérénai, Sia am bia'i!’ Taan tioo kamu mangé am bitu, tioo kumiit angé.

²⁴Ampa'paan an tutuw si Toyaang i Tou maai sumawel, Sia wutu-wutul sérén oka waya é tou. Sia maai tanuoka ing kilat si tumélang tumo'tol asi tempok in langit akar asi tempok in langit walina.

²⁵Taan ra'ipé' mai si endo itu, musti sangkumen-Na owo eng kelian kawenduan wo célong é tou menonou intarépé'.

²⁶ Wo ka'i asi endo si Toyaang i Tou maai sumawel, eng katouan é tou meputé oka ing katouan é tou indior an jaman i Nuh.

²⁷ Sé tou asalo mengangan wo mengele-ngelep, asalo mengkang-kawéngan akar an tutuw si Nuh muntep ang kapal wangker. Wo mai en sonop wangko' e maté pakasa sé tou sé ra'ica muntep ang kapal itu.

²⁸ Taniituo ka'i e imamuali an jaman i Lot. Sé tou asalo mengangan wo mengele-ngelep, memangké-mangkér wo menele-neles, menguse-ngusew wo memangu-mangun im balé.

²⁹Taan an tutuw si Lot kumesot ang kota Sodom, tumumpa mai en uran api wo walélang an langit owo wo méma' séra im baya maté.

³⁰Taniituo ka'i eng katouan é tou sa, asi endo si Toyaang i Tou maai sumawel.

³¹ An tutuw itu, si séi si ang karoro'an am bawo im balé, nomoo tumumpa mio' an untep im balé e mindo im barang-barang. Taniitu ka'i sé tou an uma, nomoo maréng.

³² Ta'néieno mangé sumawel sapa e mamuali a si penanaan i Lot!

³³ Si séike' e menonou toronake' ing katouanna in esa, sia itu ra'ica makéré ing katouan akar ing kauré-uré. Taan si séi e mengawéé ing katouanna eng kumiit Yaku, sia makéré oka ing katouan akar ing kauré-uré.

³⁴Icua-Ku mangé ai camu: Asi endo si Toyaang i Tou maai sumawel, awéan rua tou makatekel an esa patekelan, si esa iwali oka wo si esa itela'u.

³⁵Awéan ka'i rua wéwéné mewali-wali magiling ing gandum, si esa iwali oka wo si esa itela'u.”[

³⁶Sa awéan rua tou an uma, si esa angkaien i Amang Kasuruan wo si esa itela'u.]

³⁷Wo sé murit i Yesus mamuéi ai Sia, “Am bisa réén en itu e mamuali, é Guru?” Isowat i Yesus, “Am bisa en awéan bangké, am bitu em pakali'muran é burung mengakan in sama'na wuruk.”