Read Tontemboan Lukas 18 Bible Online

Lukas 18 - Tontemboan bible

Lukas 18

¹Icua i Yesus esa andéan a sé murit-Na en sumusui séra wosama' ra'ica mengasuut mengasombayang a si Amang Kasuruan.

²Icua-Na, “An esa kota awéan esa akim si ra'ica maindé' a si Amang Kasuruan wo ra'ica mengasiri' sé tou.

³Wo ang kota itu awéan ka'i esa wéwéné balu si menguri-nguri maai a si akim itu wo makua: ‘Tuang akim, pekiupusenku, bélanai em perkaraku wo si kaséké'ku.’

⁴Uré-uréanke' si akim itu ra'ica kiim tumawang si wéwéné balu itu. Taan ang kasomoianna si akim itu memero-merot in tana'i, ‘Mandé aku ra'ica maindé' a si Amang Kasuruan wo ra'ica mengasiri' sé tou,

⁵taan ampa'paan si wéwéné balu anio' menero-nerosolke' yaku, aweso taré bélanku em perkarana wosama' sia ra'ica menguri-nguri mai wo tumerosol yaku.’ ”

⁶Wo icua i Yesus, “Wéanio' rékén sapa en aicua i akim si mengarapitke' itu!

⁷Sa si akim si marapitke' itu ro'na méla im perkara i wéwéné balu itu, wopé'taré si Amang Kasuruan, tantu tawangen-Na oka sé tou sinisir-Nao in esa sé meki-kiupus ai Sia endo wo em bengi. Wo makala'us tawangen-Na wo ra'ica ipauré-uré.

⁸Icua-Ku ai camu: Em perkara é tou sinisir-Na itu makala'us oka bélan-Na! Taan sa si Toyaang i Tou maai sumawel, ra'ipé' tantu sa Sia makérépé' tou sé maéman ai Sia ang kayo'baan anio'.”

⁹Wo icua i Yesus ka'i en andéan anio' a sé tou sé maanggap in owak éra wutul wo maepeske' im beren a sé tou walina. Icua-Na,

¹⁰“Awéan rua tou mangé am Balé Le'nas en sumombayang. Si esa, tou Farisi wo si esa matagi im pajak.

¹¹Si tou Farisi itu tumulung tumané mangé wo sumombayang an untep in até tana'i: ‘O Amang Kasuruan, yaku kumua i makapulu'sama' a si Amang Kasuruan, ampa'paan aku ra'ica mepute wo sé tou walina. Yaku ra'ica maandét, yaku ra'ica mengaéma' in léwo' wo ra'ica mengaéma' in sina. Yaku ka'i ra'ica tanu si matagi im pajak itu.

¹²Yaku mengapuasa makarua susur in duminggu wo yaku ka'i mengawéé sangapepulu' am pakasa im buéna in tinawoiku.’

¹³Taan si mengasaap im pajak itu tumulung angé an tayang wo maindé'ke' kumanat angé an langit. Taan sia menepé-nepé'ke' taré in da'dakna wo kumua: ‘O Amang Kasuruan, icaupusai aku anio' si tou ang kamesé-meséaan.’

¹⁴ Icua-Ku ai camu: An tutuw si tou matagi im pajak itu maréng am baléna, sia si nianggap wutul i Amang Kasuruan, taan si tou ang golongan Farisi itu ra'ica. Ampa'paan si séi e mengarangka' in owak, sia iwawa' oka. Wo si séike' e mengawawa' in owak, sia iparangka-rangka' oka.”

¹⁵Asi makasa sé tou makawali mai sé toyaang teké' a si Yesus, wosama' si Yesus maro ing kama-Na wo kumamang iséra. Keséré in itu, sé tou itu aicae'bowke' é murit-Na.

¹⁶Taan towan i Yesus sé toyaang wo kumua a sé murit-Na, “Iwayao mio' sé toyaang itu mai a Yaku, tioo pepéro-péronen iow séra, ampa'paan sé tou tanu sé ituo e makaanu ing Kakolanoan i Amang Kasuruan.

¹⁷En ulitna icua-Ku mangé ai camu, si séi si ra'ica sumungkul ing Kakolanoan i Amang Kasuruan tanu sé toyaang teké', sia ra'ica kawisa muntep ang Kakolanoan-Na.”

¹⁸Awéan esa tou kikiiten é tou Yahudi mamuéi a si Yesus, “Guru sama', sapa si musti émaanku e makéré ing katouan akar ing kauré-uré?”

¹⁹Isowat i Yesus, “Kéitu réén ko kumua Yaku tou sama'? Ra'- ica wana esaan ka'i tou en sama', wayake' si Amang Kasuruan en sama'.

²⁰ Tantu kailekanmu em perénta-perénta i Amang Kasuruan anio': ‘Tioo mengaéma' in sina, tioo mengapaté tou, tioo mengarombit, tioo mengasairi in towo, mengasiri' mangé a si amang wo si inangmu.’ ”

²¹Wo icua i tou itu, “Pakasa em perénta itu niéma'kuo waya an tutuwku i wo'basé'.”

²²Kelinga in itu wo icua i Yesus ai sia, “Awéané' esa e musti émaanmu: Iwangkéro waya eng kasiyaanmu wo iwété-wéténgo mio' en itu a sé tou lengéi wo in taniitu kéréanmu oka eng kasiyaan an sorga. Kumawus in itu mayoo wo kumiito mai Yaku.”

²³Kelinga i tou itu sapa en aicua i Yesus, en aténa mawendu keli ampa'paan sia siya' keli.

²⁴Kailekano i Yesus en até i tou itu wendu keli, ampa'paan in itu icua-Na ai sia, “Susa keli si tou siya' muntep ang Kakolanoan i Amang Kasuruan.

²⁵Lébé taporak si esa unta muntep kumiit am bo'so im biwilit, wotaré si tou siya' muntep ang Kakolanoan i Amang Kasuruan.”

²⁶Wo sé tou makalinga in aicua i Yesus, mamuéi ai Sia, “Sa taniitu, si séi réén e ro'na malowir an ukuman ing kamesé-meséaan wo muntep ang Kakolanoan i Amang Kasuruan?”

²⁷Isowat i Yesus, “Si tou ra'ica kawisa lumowir in owakna in esa, taan si Amang Kasuruan ro'na lumowir sé tou.”

²⁸Wo icua i Petrus, “Tambisa réén wo icami, aitela'u amio waya eng kasiyaan ami wo kumiit si Guru.”

²⁹Icua i Yesus ai séra, “Icua-Ku ai camu, si séike' en tumela'u im baléna, kuma'pa si penanaanna, kuma'pa sé poo-poowna, kuma'pa sé matu'ana kuma'pa sé toyaangna ampa'paan mengaselewir a si Amang Kasuruan,

³⁰si tou itu tumerima oka in laasa si lumepe-lepet asi Amang Kasuruan owo asi oras ya'sa. Wo asi endo mengangai, sia makéré oka ing katouan akar ing kauré-uré.”

³¹Li'usen i Yesus sé sangapulu' rua murit-Na wo icua-Na ai séra: “Intarépé' kita maangé an Yerusalem wo pakasa sé aipatic é nabi andumoro' si Toyaang i Tou, mamuali oka a Yaku a mangé mbitu.

³²Ampa'paan Sia isarakan oka a sé bangsa ra'ica Yahudi wo para'i-ra'ien éra, ipawawa-wawa' wo ruraan éra.

³³Sia okoien oka wo patén éra. Taan asi endo katelu Sia touen oka sumawel.”

³⁴Pakasa sé aicua i Yesus itu ra'ica kaangéan é murit-Na, eng kaangéan i nunuwu'-Na itu ipakaenepé' ai séra. Wo ra'ica kailekan éra si Yesus icumua andumoro' in sapa.

³⁵An tutuw i Yesus tawio icateka' ang kota Yerikho, awéan esa tou wola si makalukut an tembir in lalan wo mangile-ngilek.

³⁶An tutuw i tou wola itu luminga kelian tou malangkoi wo wuéienna, “Awéan sapa réén?”

³⁷Wo icua é tou ai sia, “Si Yesus tou Nazaret malangkoi.”

³⁸Wo sia mangko': “Yesus, taranak i Daud, caupusai aku!”

³⁹Sé tou mawaya' an dior mae'bow wo ru'du' éra si tou wola itu wosama' menes. Taan makarepetke' taré sia maangko', “Taranak i Daud, caupusai aku!”

⁴⁰Wo si Yesus mento' wo iru'du'-Na sé tou e makawali mai si tou wola itu ai Sia. An tutuw i tou wola itu an duruo i Yesus wo wuéien-Na,

⁴¹“Sapa réén en casalé'mu émaan-Ku ai co?” Wo isowat i tou itu, “O Tuang, casalé'ku woo wosama' ro'na suméré!”

⁴²Wo icua Yesus ai sia, “Intarépé' ko ro'nao suméré! Wo ampa'paan ko maéman a Yaku, ko masama'o.”

⁴³Asi témpo ituke', si tou wola itu makala'uso maséré wo kumiit si Yesus ang karapi i marayo-rayo si Amang Kasuruan. Pakasa sé tou isuméré ing kinamamualian itu marayo-rayo ka'i si Amang Kasuruan.