Read Tontemboan Lukas 2 Bible Online

Lukas 2 - Tontemboan bible

Lukas 2

¹Ra'ipé' uré eng ketou i Yohanes, si Kaisar Agustus méé esa perénta rumu'du' pakasa sé touna ang kakolanoan i Romawi en dumaftar i ngaran éra.

²Si anioo en sensus kataré-taré niéma' an tutuw i Kirenius mamuali gubernur an Siria.

³Ampa'paano in itu pakasa sé tou mangé dumaftar i ngaran éra ang kota si niento'an é apo-apo' éra.

⁴Taniitu ka'i si Yusuf, sia a Nazaret owo ang Galilea, mangé ang kota Daud makangaran im Betlehem an Yudea. Sia musti maréng angé am bitu ampa'paan sia itu taranak i Daud.

⁵Si Yusuf mangé am bitu ang karapi i Maria si tinantunao ing kawéngen wosama' e ngaran éra ro'na daftar am bitu. An tutuw itu si Maria maowa-owako.

⁶An tutuw éra am Betlehem, an témponao si Maria makéré toyaang.

⁷Wo sia makéré esa toyaang tuama, toyaangna luluna. Wo si toyaang itu saputenna ing kaéng, itekelna am pawa'uban é binatang ampa'paan séra ra'ica imakéré walé in loséran.

⁸Asi wengi itu awéan sé gembala maento' an sangkum in tana' rerukutan matéir sé domba.

⁹Tumarépé'anke' mapaturu'o mai ai séra si esa malaékat i Amang Kasuruan. Wo en sendot i Amang Kasuruan tumélang iséra, akar séra uli-ulit maindé'.

¹⁰Taan icua i malaékat itu ai séra, “Tioo maindé'! Ampa'paan aku mai kumua in abar kaaruien wangko' ai camu. En abar anio' méma' oka pakasa in tou masalé-salé'.

¹¹En abar itu tana'i: Asi endo anio' ang kota Daud makangaran im Betlehem itumouo si Lumolowir iow, Siao si Kristus, si Kasuruan.

¹²Si anioo en tuusna ai camu wosama' katuusan iow si toyaang teké' itu: Kaséréan iow oka esa toyaang teké', pakasaputen ing kaéng wo ipakatekel am pawa'uban é binatang.”

¹³Kumawusai si malaékat itu maroma', mapaturu'o mai kekelian malaékat an sorga owo mewali-wali wo si malaékat itu. Wo séra im baya mewali-wali rumayo si Amang Kasuruan. Icua éra,

¹⁴“Irayoo wo siriino mangé si Amang Kasuruan an tampa rumangka-rangka'! Wo am bawo ing kayo'baan wéan-Na mai ing kaeluran a sé tou sé mengaarui in até-Na.”

¹⁵Kekawus é malaékat maréng angé an sorga, sé gembala itu kumua a si esa wo si esa, “Mayoo kita maangé am Betlehem, en suméré sapa e mamuali a mangé mbitu, meputé si aicua i Casuruan ai cita.”

¹⁶Wo séra mario-rior angé am Betlehem. Wo peta'up éra si Maria wo si Yusuf ang karapi i Toyaang itu si ipakatekel am pawa'uban é binatang.

¹⁷Keséré é gembala si Toyaang itu, ipakua-kua éra a sé tou am bitu sapa en aicua i malaékat i Amang Kasuruan ai séra andumoro' i Toyaang itu.

¹⁸Wo pakasa sé tou iluminga in aicua é gembala itu mangaya-ngaya'ka'.

¹⁹Taan andumoro' im pakasa sé aicua é gembala itu pakaéma'ke' i Maria an aténa wo pemero-merotenna.

²⁰Kumawus in itu, sé gembala maréng angé sumawel an tampa éra. Ang karoro'an éra imawaréng, séra marayo-rayo wo masiri-siri' si Amang Kasuruan ampa'paan pakasa sé lininga wo sé sinéré éra itu, meputé ulit wo si aicua i malaékat i Casuruan ai séra.

²¹ An tutuw imalekepo walu ngando eng ketou i Toyaang itu wo Sia musti sunaten wo ngaranan éra Yesus si ngaran aicua i malaékat a si Maria an tutuwna ra'ipé' maowa-owak.

²² Imayo en témpona si Maria meresi in owak tanu ing kanaramen kumiit in ukum Torat. Ampa'paano in itu si Maria wo si Yusuf mangé an Yerusalem e méma' in atoran itu. Iwali éra ka'i si Toyaang teké'pé' itu en isarakan a si Amang Kasuruan.

²³ Ampa'paan an ukum i Casuruan aipatic in tana'i, “Pakasa sé toyaang tuama luluna musti isarakan a si Amang Kasuruan e mamuali anu-Na.”

²⁴Wo séra maawo-awo iméé raragés rua ku'kur kuma'pa rua mombo peranggang, tanu tuus meresi in owak i Maria kiit in atoran i Casuruan an untep in ukum Torat.

²⁵Asi témpo itu an Yerusalem awéan esa tou makangaran Simeon. Sia itu maéma' im butul an dior i Amang Kasuruan wo le'tek ai Sia. Wo sia ang karoro'an mengento-ngento' in oras i Amang Kasuruan lumowir sé tou Israel wo e Roh Le'nas mewali-wali wo isia.

²⁶Wo aicuao i Roh Le'nas ai sia sapaoka sia ra'ipé' maté sa ra'ipé' isuméré si Kristus, si Kolano ayutus i Amang Kasuruan e mai lumowir sé tou-Na.

²⁷Wo ka'i pakakawasan i Roh Le'nas si Simeon mangé muntep am Balé Le'nas. An tutuw i Simeon an untepé', muntep ka'i mai am bitu si Yusuf wo si Maria makake'kep si Yesus Toyaang teké'pé' itu en isarakan a si Amang Kasuruan, tanu ing kanaramen kumiit in atoran i Casuruan an untep in ukum Torat.

²⁸An tutuw sérén i Simeon séra, kala'usenna mangé ing kume'kep si Yesus teké'pé' itu wo sia marayo-rayo si Amang Kasuruan. Icuana,

²⁹“O Kasuruan, indior si Amang Kasuruan ijumanjio a yaku wo intarépé' en janji itu linekepo i Amang Kasuruan. Anaé, iwayao mai si ata-Mu anio' maté ang kaeluran.

³⁰Ampa'paan sinérékuo in esa si Lumolowir ayutusai i Amang Kasuruan.

³¹Si Lumolowir itu aitu'tulo i Amang Kasuruan torona im pakasa é tou.

³² Wo Sia tanu in sendot si aiwéé i Amang Kasuruan en tumélang in até é tou walina wosama' séra ro'na mai a si Amang Kasuruan, wo ka'i en sendot itu e méma' sé tou-Mu Israel ro'na irayo é tou walina.”

³³Kelinga i Yusuf wo si Maria sapa en aicua i Simeon andumoro' i Toyaang itu, séra mangaya-ngaya'ka'.

³⁴Wo si Simeon sumombayang mangilek a si Amang Kasuruan wosama' méé mai ing kamang ai séra. Wo icuana a si Maria inang i Toyaang itu, “Maria, si Toyaang anio' aitantuo i Amang Kasuruan e mai mukum sé kelian tou Israel sé ra'ica maéman a si Casuruan wo mai lumowir kelian tou Israel sé maéman ai Sia. Wo si Toyaang anio' mamuali oka tuus tanu popokéi i Amang Kasuruan a sé tou iméma' ing kamesé-meséaan. Taan Sia icélong oka é tou keli.

³⁵Wo in taniitu sapa em pawero-weroten é tou keli makawuka-wuka' oka. Wo ico é Maria, ico uli-ulit mendam oka ing kawenduan ampa'paano si Toyaang itu. Eng kawenduan pendamenmu itu tanu ing kame'nget in até an tutuw patopoken im pagi' telew.”

³⁶Awéan ka'i am bitu esa nabi wéwéné matu'ao, e ngaranna Hana, toyaang i Fanuel an suku Asyer owo. Makakawéng ako, sia menonou mewali-wali wo si penanaanna pitu ngata'un eng kauré,

³⁷wo si penanaanna matéo anaé sia balu oka. Wo intarépé' en umurna walu ngapulu' epat ngata'uno. Sia ra'ica kawisa tumela'u im Balé Le'nas. Endo wo em bengi sia maapo' a si Amang Kasuruan ang karapi mapuasa wo masombayang.

³⁸An tutuw i Simeon mapaar ang karapi i Yusuf wo si Maria, si Hana ka'i mai am bitu. Sia kumua makapulu'sama' a si Amang Kasuruan wo ipakua-kuana in andumoro' i Toyaang teké' makangaran Yesus itu a sé im pakasa é tou am bitu sé mengento-ngento' in endo an tutuw i Amang Kasuruan maai mekar sé tou Israel.

³⁹ Pakaémaanai i Yusuf wo si Maria pakasa eng kanaramen kumiit in ukum Torat wo séra maréngo mangé sumawel ang kota paento'an éra si a Nazaret ang Galilea.

⁴⁰Wo si Yesus makawangkoo wo makaketero ka'i. Sia wuta ing kapinteran asi Amang Kasuruan wo icaupus-Na keli.

⁴¹Susur in ta'un, sé matu'a i Yesus mengaangé an Yerusalem eng kumiit méma' in endo wangko' Paska.[2]

⁴²Wo an tutuw i Yesus imalekepo sangapulu' rua ngata'un, séra mangé an Yerusalem, kumiit méma' in endo wangko' itu.

⁴³En endo wangko' itu niéma' pira ngando. Kekawus éra iméma' in endo wangko' itu, séra maréngo sumawel taan si Yesus imento'ke' an Yerusalem ra'ica kailekan é matu'a-Na.

⁴⁴Pawasan éra si Yesus an uner é tou mawaya' mewali-wali wo iséra. Sangandoo séra mawaya', pangérén érao Sia an uner é poo-poow éra wo a sé tou katuusan éra.

⁴⁵Ampa'paan Sia ra'ica kinéréan éra wo waréngen éra mangé sumawel mangéré Sia an Yerusalem.

⁴⁶Telu ngandoo Sia paéré-érén wo ipeta'up éra Sia am Balé Le'nas. Sia makalukut an uner é guru agama Yahudi makalinga wo memuéi-muéi ai séra.

⁴⁷Wo pakasa in tou mangaya-ngaya'ka' makalinga im pakanuwu'-Na wo eng kapandéi-Na masowat im buwuéien éra.

⁴⁸Wo an tutuw é matu'a-Na suméré Sia, séra mangaya'ka' wo icua i inang-Na ai Sia, “Toyaangku, kéitu réén-Ko iméma' tanu siitu ai cami? Si amang-Mu wo yaku ra'io makaaté in sama' maéré-éré Ico.”

⁴⁹Taan aisowat-Na ai séra in tana'i, “Kéitu réén si amang wo si inang maéré-éré Yaku? Ra'ica réén kailekan i amang wo si inang sapaoka Aku musti am balé i Amang-Ku?”

⁵⁰Taan ra'ica kailekan i inang wo si amang-Na sapa eng kaangéanna en aicua i Yesus ai séra.

⁵¹Wo si Yesus maréng a Nazaret mewali-wali wo sé matu'a-Na wo Sia menonou le'tek a sé matu'a-Na. Pakasa sé imamuali itu pakaéma'ke' i Maria an untep in aténa.

⁵² Wo si Yesus makawangkoo wo makaaweso ka'i eng kapinteran-Na. Sia icaupus i Amang Kasuruan wo icasalé' ka'i é tou.