Read Tontemboan Lukas 20 Bible Online

Lukas 20 - Tontemboan bible

Lukas 20

¹Asi sangando, an tutuw i Yesus masusui a sé tou keli wo makua in Abar Kaaruien am Balé Le'nas, wo mai am bitu sé kikiiten é imam, sé makailek wutul in Torat wo sé matu'a é tou Yahudi.

²Icua éra, “Icua mai ai cami, maké réén ing kawasa sapa akar ro'na émaan-Mu waya en itu? Wo si séi réén e iméé ing kawasa itu ai Co?”

³Isowat i Yesus ai séra, “Yaku ka'i méé oka esa wuwuéien ai camu. Icua mai a Yaku,

⁴an tutuw si Yohanes Mabaptis maptis sé tou, imaké ing kawasa i séi réén, asi Amang Kasuruan kuma'pa asé tou owo?”

⁵Wo séra mengkuanan a si esa wo si esa, “Sa icuata imaké ing kawasa asi Amang Kasuruan owo, tantu icua-Na oka, ‘Sa taniitu kéitu réén sia ra'ica percayan iow?’

⁶Taan sa icuata asé tou owo, tantu kita wangkilen é tou im batu, ampa'paan percayan éra sapaoka si Yohanes itu esa nabi.”

⁷Wo isowat éra a si Yesus, “Ra'ica kailekan ami kawasa i séi owo em pinaké i Yohanes an tutuw mengabaptis sé tou.”

⁸Wo icua i Yesus ai séra, “Sa taniitu, ra'ica icua-Ku ka'i ai camu asi séi owo eng kawasa a Yaku akar émaan-Ku waya en itu.”

⁹ Kekawus in itu sisil i Yesus en andéan anio' a sé tou keli: “Awéan esa tou muka' in uma en usewanna in anggor. Wo iséwana en uma itu a sé tou matawoi in uma. Wo sia mangé an doong walina wo uré-uréan toyo' mento' a mangé mbitu.

¹⁰An tutuw in orasnao imupu' in anggor, iru'du'na si esa ata mangé a sé tou matawoi in umana e mangilek im bagéanna am buéna in anggor itu. Taan si ata itu pinangkurke' é tou matawoi in uma wo iru'du' éra maréng ra'ica maali sapa-sapa.

¹¹Kumawus in itu iru'du'na ka'i mangé esa ata walina. Taan si ata itu ka'i pinangkur érake' wo ipapalawi' éra wo iru'du' éra maréng ra'ica imaali sapa-sapa.

¹²Wo iru'du'na ka'i mangé si ata katelu. Taan si ata itu ka'i pinangkur éra akar i mapéla' wo iwangkil éra ang kesot in uma itu.

¹³Wo icua i makauma itu an untep in aténa, ‘Sapapé' e musti émaanku? Aweso taré iru'du'ku si toyaangku si paupu-upusku, tantu sia siriin éra oka.’

¹⁴Taan an tutuw si toyaang i makauma itu sérén é tou matawoi in uma itu wo séra mengkuanan asi esa wo sé walina, ‘Siao e makaanu in uma anio' sa. Mayoo paténta sia, wo en uma anio' mamuali oka anuta.’

¹⁵Wo iwangkil éra sia ang kesot in uma in anggor itu wo patén éra. Intarépé', sapa en émaan i makauma in anggor itu ai séra?

¹⁶Sia maai oka wo paténna sé tou matawoi in umana itu wo en umana itu ipapatawoina a sé tou walina.” Kelinga éra in itu wo icua é tou keli itu a si Yesus, “En itu tioo mamuali ai cami!”

¹⁷ Taan téintengen-Na sé tou keli itu wo icua-Na, “En itu musti mamuali, ampa'paan siituo eng kaangéan i nats si aipatic ang Kitap Le'nas tana'i: ‘Watu aitiya' é bas, imamualio watu patuuran.’

¹⁸Si séike' en lumepok asi watu itu, sia mamu'muk oka wo si séi e rongkoran im batu itu, sia makamu'mu-mu'muk oka tanu in awu.”

¹⁹Kelinga in andéan aicua i Yesus, kailekano é makailek wutul in Torat wo sé kikiiten é imam sapaoka en andéan itu tumuru' iséra. Ampa'paan in ituo asi témpo ituke' raméjin éra in tumangka' Sia, taan caindé' éra sé tou keli.

²⁰Wo si Yesus peméa-méan rékén é makailek wutul in Torat wo sé kikiiten é imam. Wo iru'du' éra mangé tou e mawere-weren si Yesus wo séra mapa in loor kéndo'. Sé tou itu mamuéi a si Yesus maké im buwuéien tanu kéndo' awéan si masalé' kailekan éra wosama' ro'na ta'kongen éra Sia. Wo sa Sia suméa' sumowat, isarakan éra oka Sia a si gubernur Romawi si makakawasa an sangkum itu en ukumen im patén.

²¹Icua é tou itu a si Yesus in tana'i, “Guru, kailekan ami pakasa sé aicua wo sé aisusui-Mu itu wutul wo si Guru ra'ica masisir tou em pasiriin, wo ka'i si Guru masusui ang karapi i makakii-kiit andumoro' ing kasalé'an i Amang Kasuruan.

²²Anaé, wuiéien ami a si Guru, sa kumiit in atoran in agamata Yahudi, ro'na réén kami mér im pajak a si Kaisar kuma'pa ra'ica?”

²³Taan kailekan i Yesus em basa éra léwo'. Ampa'paan in ituo icua-Na ai séra in tana'i,

²⁴“Ituru' mai a Yaku esa dinar! Gambar wo ngaran i séi asi roit anio'?” Isowat éra, “Gambar wo ngaran i Kaisar.”

²⁵Wo icua i Yesus ai séra, “Sa taniitu iwééo mangé a si Kaisar sapa si musti iwéé miow a si Kaisar wo iwééo mangé a si Amang Kasuruan sapa si musti iwéé miow a si Amang Kasuruan.”

²⁶Anaé, Sia ra'ica kinata'kongan é tou mawere-weren itu an tutuw Sia sumowat séra an dior é tou keli itu. Taan taré séra mangaya-ngaya'ka' luminga in aisowat-Na akar séra makapenes oka.

²⁷ Kekawus in itu, piraan tou Saduki mai a si Yesus. Ra'ica pangakun éra sa sé tou imatéo touen oka sumawel. Wuéien éra a si Yesus,

²⁸ “Guru, aipatic i Musa en atoran anio' ai cita tou Yahudi, tana'i: Sa si esa tuama icumawéngo wo sia maté wo si wewéné kinawéngna menonoué' taan ra'ica imakéré toyaang, si wéwéné balu itu musti kawéngen i tuama metuari wo si tuama imatéo itu, wosama' si tuama imatéo itu ro'na imakéré taranak.

²⁹Awéan pitu tuama metuari, si luluna kumawéng wo si esa wéwéné wo si tuama itu maté taan ra'ica imakéré toyaang.

³⁰Kumawus in itu si wéwéné itu kawéngen ka'i i tuama karua,

³¹wo si tuama katelu, taniitu e imamuali akar a si tuama kapitu. Wo séra im baya maté taan ra'ica makéré toyaang.

³²Sumiwakio', si wéwéné itu ka'i maté.

³³Anaé, tambisa wo si wéwéné itu asi endo i Amang Kasuruan tumou sumawel sé tou imatéo. Si séi réén asé pitu tou itu e mamuali penanaan i wéwéné itu? Ampa'paan séra im pitu imenana'o sia.”

³⁴Isowat i Yesus ai séra, “Sé tou menonou ang kayo'baan anio' kumawéng wo kawéngen.

³⁵Taan sé tou tinou sumawel i Amang Kasuruan wo nianggap patus makéré im bagéan ang kayo'baan weru, séra ra'io kumawéng wo kawéngen.

³⁶Ampa'paan séra ra'io kawisa maté kaputé é malaékat sé ra'ica maté. Wo sé tou itu toya-toyaang i Amang Kasuruan ampa'paan séra tinou-Nao sumawel am papaté.

³⁷ Wo aicuao ka'i i Musa andumoro' sé tou imatéo touen oka sumawel. Aipaticna en itu an sisilen andumoro' in dukut tutunéan mengembu-ngembung, aicuana sapaoka si Amang Kasuruan kumua in tana'i, ‘Yakuo si Amang Kasuruan i Abraham, Ishak wo si Yakub.’

³⁸Si Abraham, Ishak wo si Yakub imatéo, taan kailekan i Amang Kasuruan sapaoka séra touen oka sumawel. Anaé, si Amang Kasuruan itu ra'ica Amang Kasuruan é tou imaté, taan Amang Kasuruan é tou menonou. Ampa'paan an dior i Amang Kasuruan pakasa e roh é tou menonou, mandé ka'i en owak éra imatéo.”

³⁹An tutuw luminga in aisowat i Yesus wo icua é piraan tou sé makailek wutul in Torat, “Guru, en aisowat-Mu itu wutul!”

⁴⁰Ampa'paano in itu ra'io wana ai séra em brani mamuéi in sapake' mangé a si Yesus.

⁴¹Wo icua i Yesus ai séra, “Ipakua é tou sapaoka si Kristus itu taranak i Daud owo. Taan wutul réén Sia taranakke' i Daud?

⁴² Ampa'paan sia in esa imatico ang kitap Mazmur andumoro' i Kristus tana'i, ‘Si Amang Kasuruan icumuao a si Tuangku tana'i: Lumukuto mai asi tampa pasiri-siriin ang kakan-Ku

⁴³akar sé kaséké'-Mu iweta'-Ku am palara ing kécéi-Mu.’

⁴⁴Anaé, sa si Daud in esa mengatuul si Kristus itu Tuangna, tambisa réén wo icuata Sia itu taranakna ka'i?”

⁴⁵Ang karoro'an é tou keli makalinga si Yesus maroma' wo icua-Na a sé murit-Na,

⁴⁶ “Mareti-retio mangé kamu a sé makailek wutul in Torat, sé masalé' mawaya-waya' mepaké in juba wo masalé' pengasiriin ang kakelian in tou tanumai am pasar. Wo masalé' ka'i mengalukut an tampa pasiri-siriin am balé paapo'an é agama Yahudi wo am pésta-pésta.

⁴⁷Wo ka'i mengauwak sé wéwéné balu e maandét im balé éra. Wo mengaakal ka'i sé tou mengasombayang in lalambotan wosama' paanggapen é tou loor. Séra itu tantu makéré oka in ukuman si uter keli.”