Read Tontemboan Lukas 23 Bible Online

Lukas 23 - Tontemboan bible

Lukas 23

¹Wo pakasa é tou sé kumiit in sidang itu tumulung wo iwali éra mangé si Yesus saru a si gubernur Pilatus.

²Icateka' mangé am bitu, séra tumo'tolo matudu Sia, icua éra, “Sinéréo ami wo lininga amio sapaoka si tou anio' mengasélé'kow sé tou ami tou Yahudi. Wo pengapéron-Na sé tou mengawér im pajak a si Kaisar Romawi wo ka'i makua sapaoka Siao si Kristus si Colano.”

³Wo wuéien i Pilatus a si Yesus, “Wutul réén Ko Kolano é tou Yahudi?” Isowat i Yesus, “Si amango in esa en cumua in itu.”

⁴Wo icua i Pilatus a sé kikiiten é imam wo a sé tou keli am bitu, “Ra'ica kinéréanku eng kaséaan i Tou anio' mandé esake'.”

⁵Taan makarepetke' taré séra malesé' si Pilatus in tana'i, “Sia memaso-maso' sé tou in sususuien-Na am pakasa in tana' paento'- an é tou Yahudi,[20] en sumundur sé pemerénta. Mangé ito'tol-Na mai ang Galilea wo akaro an Yerusalem anio'.”

⁶Kelinga i Pilatus andumoro' in itu wo wuéienna ai séra in tana'i, “Anaé, si Yesus anio' réén tou Galilea?”

⁷Wo an tutuw kinailekano i Pilatus sapaoka si Yesus tou an sangkum ing Galilea owo wo iru'du'na sé tou e makawali mangé si Yesus a si Herodes. Ampa'paan sia makakawasa an sangkum itu wo ka'i asi témpo itu sia ang karoro'ané' an Yerusalem.

⁸Keséré i Herodes si Yesus, en aténa arui keli ampa'paan uréo keli sia masalé' suméré si Yesus. Wo ka'i uréo sia melinga-linga in abar andumoro' i Yesus wo maarap ro'na suméré Sia méma' esa tuus kakaya'kaan.

⁹Wo si Herodes méé keli wuwuéien a si Yesus, taan si Yesus makapeneske'.

¹⁰Ang karoro'an in itu, sé kikiiten é imam wo sé makailek wutul in Torat mangé tumulung an dior wo ra'ica mento' menudu-nudu si ra'ica wutul a si Yesus.

¹¹Wo tumo'tolo si Yesus paséro' wo para'i-ra'ien i Herodes wo sé surarona, karaian éra Sia in juba tanu im papakén é kolano. Wo iwali éra mangé sumawel Sia a si gubernur Pilatus.

¹²Asi endo-endo lumangkoi si Herodes wo si gubernur Pilatus mekaréndér, taan asi endo ituke' séra mekaromaano sumawel.

¹³Wo li'usen i gubernur Pilatus sé kikiiten é imam, sé matu'a é tou Yahudi wo ka'i sé tou éra.

¹⁴Wo icuana ai séra, “Si Tou anio' aiwalio miow a yaku wo icua miow sapaoka Sia mengasélé'kow sé tou in sususuien-Na en sumundur sé pemerénta. Intarépé' sérénai! Pineriksakuo Sia an dior iow, taan ra'ica kinéréanku mandé esake' eng kaléwo-léwo'an sé ipatudu miow ai Sia,

¹⁵taniituo ka'i si Herodes. Sia maanggap si Tou anio' ra'ica wana kaséaan, ampa'paano in itu iwaréngna mai sumawel ai cami. Anaé, si Tou anio' wutu-wutul ra'ica iméma' ing kaléwo-léwo'an si patus makéré in ukumen patén.

¹⁶Ampa'paano in itu, ru'du'ku oka tou en sumambok Sia, kumawusai in itu iwekarku oka.” [

¹⁷Si Pilatus kumua in taniitu ampa'paan susur in endo wangko' Paska, sia musti mekar esa tou si pakabuin, kumiit ing kasalé'an é tou Yahudi.]

¹⁸Taan sé tou keli sé makali'us am bitu imangko'ke' taré mangé a si Pilatus, “Paténo Sia! Iwekaro mai si Barabas torona ami!”

¹⁹Si Barabas anio' ayuntep am bui ampa'paan sia mengasundur sé pemerénta Romawi wo imaté tou ang kota itu.

²⁰Icasalé' woo i Pilatus wekarna si Yesus, ampa'paan in ituo makasapé' ka'i si Pilatus kumua in taangko' a sé tou keli itu.

²¹Taan makarepetke' taré sé tou keli itu masowat in taangko' a si Pilatus, “Isalipo Sia, isalipo Sia!”

²²Wo icua i Pilatus ing kumatelu a sé tou keli itu, “En ulitna, kaléwo'an sapa réén e niéma' i Tou anio'? Mandé esake', ra'ica wana eng kaléwo-léwo'an si kinéréanku ai Sia si patus makéré in ukumen patén. Anaé, ru'du'ku oka tou en sumambok Sia wo iwekarku oka.”

²³Taan pelesé-leséén érake' taré si Pilatus wo séra mengangko-ngangko' wo tumuntut wosama' si Yesus isalip. Sumiwakio' isérake' e imuntung, ampa'paan séra mengangko-ngangko'.

²⁴Wo énan i Pilatus sapa en tinuntut é tou keli itu.

²⁵An tutuw itu si Barabas an untep im bui ampa'paan masundur sé pemerénta wo ka'i maté tou, anaé sia iwekar i Pilatus iciit in aituntut éra. Taan si Yesus aisarakanna a sé tou keli wosama' okoien éra kiit ing kasalé'an éra.

²⁶Wo si Yesus iwali é suraro Romawi kumesot ang kota Yerusalem. An uner in lalan séra meta'up wo si esa tou makangaran Simon tou Kirene si ang karoro'an i meuntep ing kota. Wo tangen éra sia wo papawuléng éra en salip i Yesus, akar wuléngenna en salip itu wo mawaya' an somoi i Yesus.

²⁷Keli en tou sé makiit an somoi i Yesus. An uner éra awéan piraan wéwéné sé mengamé-ngamé' akar in sesendu'an oka ampa'paan en até éra wendu ulit.

²⁸Wo si Yesus suméléng ai séra wo kumua, “Éi wéwéné-wéwéné Yerusalem! Tioo paamé'an iow Aku. Taan amé'ano mio' en owak iow in esa wo sé toyaang iow!

²⁹Ampa'paan maai oka en témpona sé tou sumangkum oka ing kawenduan, akar sé tou makua oka in tana'i, ‘Pakakamangeno si wéwéné ra'ica kawisa maowa-owak, wo si wéwéné ra'ica kawisa méé toyaang wo si wéwéné ra'ica kawisa sumusu toyaang.’

³⁰ Asi témpo itu sé tou okoien oka, akar séra tumo'tolo makua in tana'i a sé kuntu-kuntung, ‘Sa woo ro'na, tawunano mai im pokal kami!’ Wo makua a sé tola-tolaina in tana'i, ‘Sa woo ro'na, mokalo mai ai cami!’

³¹Ampa'paan si kayu maséépé' niéma'o é tou tanu sia'i, wopé'taré sé kayu perao tantu lumébé mai. Eng kaangéanna Yaku si ra'ica meséa' niokoio é tou tanu sia'i, wopé'taré sé tou meséa' tantu lumébé mai in okoien.”

³²Asi témpo itu, awéan ka'i rua tou walina, séra tou léwo' sé aiwali mai é suraro Romawi en ukumen im patén mewali-wali wo si Yesus.

³³An tutuw éra icateka'o an esa tampa makangaran ‘ru'i in do'kos’ wo isalip éra si Yesus am bitu. Sé rua tou léwo' itu ka'i aisalip éra, si esa ang kakan wo si esa ang ka'biri-Na.

³⁴ Wo si Yesus sumombayang, “O Amang, ampunganai séra, ampa'paan ra'ica kailekan éra sapa em pengaémaan éra.” Wo pewéténgen éra eng karai i Yesus ang kerapi in lumotréi.

³⁵Keli sé tou makatulung am bitu wo sinéré éra waya sapa sé imamuali. Ang karoro'an in itu, sé kikiiten é tou Yahudi maséro' Sia, icua éra: “Sé tou walina ro'na lowiren-Na, intarépé', sa Sia wutu-wutul Mesias, Tou sinisir i Amang Kasuruan, mandéo Sia lumowir in owak-Na in esa.”

³⁶Sé suraro ka'i mengara'i-ra'i Sia. Séra rumuru mangé ai Sia wo wéan éra mangé elepen anggor esem Sia,

³⁷wo kumua, “Sa Ko kolano é tou Yahudi, lowireno mangé en owak-Mu!”

³⁸A mangéna in do'kos i Yesus ang kayu salip, pinakuan esa papang si pinatican in tana'i, “Si anioo si Colano é tou Yahudi.”

³⁹Esaan asé rua tou léwo' aisalip itu maojat si Yesus, icuana, “Ico anio' to si Kristus? Lowireno mio' en owak-Mu wo ka'i cami in dua!”

⁴⁰Taan sia rinomaan i esa tou léwo' walina, icuana, “Ra'ica réén maindé' ko a si Amang Kasuruan? Ico ka'i mewali-wali makéré in ukuman tanu Sia.

⁴¹Kita in dua patus makéré ukuman ampa'paan kita makéré ukuman si patus suli' ang kaléwo-léwo'an niéma'ta. Taan si Tou anio' wutu-wutul ra'ica iméma' ing kaséaan mandé esake'.”

⁴²Wo icuana a si Yesus, “Yesus, ta'néienai aku, sa Ko maai tanu Kolano sa.”

⁴³Icua i Yesus ai sia, “En ulitna icua-Ku ai co, asi endo anio'ke', ico mewali-wali oka wo Yaku an sorga.” [21]

⁴⁴Asi oras itu, makuao wona' in jam dua belas katoora i yéndo, tumarépé'anke'mai si yéndo mento' masendot. Pakasa in sangkum in tampa itu mariréimbeng akar asi jam tiga im bawaando.

⁴⁵ Wo eng kaéng pengakawu' si aiwérén am Balé Le'nas pengakawu' ing Kamar Le'nas wo ing Kamar Lume'na-le'nas mawirang maperua.

⁴⁶ Wo si Yesus kumua in taangko', “O Amang, ang kakawasaan-Muo, isarakan-Ku e mu'kur-Ku.” Kekawusai kumua in taniitu wo Sia maté.

⁴⁷An tutuw sérén i kikiiten é suraro Romawi sapa e imamuali wo sia rumayo si Amang Kasuruan, icuana, “Si Tou anio' uli-ulit ra'ica wana kaséaan!”

⁴⁸Sé tou keli sé mai mali'us asi tampa itu, séra pakasa imakaséré sapa e imamuali. Keséré éra in itu wo séra maréng ang karoro'- an in itu menepé-nepé' in owak ampa'paan en até éra wendu keli.

⁴⁹ Wo pakasa in tou sé wutu-wutul makatuus si Yesus cauntep ka'i sé wéwéné makii-kiit Sia tumo'tolke' mai ang Galilea, séra makatulung an tayang wo makaséré waya ing kinamamualian itu.

⁵⁰Awéan esa tou makangaran Yusuf, anggota Mahkamah Agama Yahudi, tou loor wo ka'i mengaéma' im butul an dior i Amang Kasuruan.

⁵¹Sia ang kota Arimatea owo an Yudea wo ang karoro'an i mengento-ngento' in oras i Amang Kasuruan mai Kumawasa tanu Kolano. Mandé sia anggota Mahkamah Agama taan ra'ica énanna sapa em pinusé' wo e niéma' é Mahkamah Agama itu andumoro' in ukuman si aiwéé a si Yesus.

⁵²Wo sia mangé meta'up wo si Pilatus, pangilekenna e mayat i Yesus wosama' cuburna.

⁵³Wo énan i Pilatus. Kumawus in itu sia mangé wo mangé tumpana e mayat i Yesus an salip wo saputenna ing kaéng lénen. Wo tekelna ang kubur, am bo'bok an tolaina wawatuan. Eng kubur itu ra'ipé' sumangkum winetaan i mayat.

⁵⁴En endo itu tumena in endo tumu'tul in endo Sabat wo mekeremo, anaé tawio tumo'tol muka' in Sabat.

⁵⁵Wo sé wéwéné sé imai ang Galilea owo sé mewali-wali wo si Yesus an tutuw Sia menonoué', séra kumiit ka'i ang karapi i Yusuf wo suméré ing kubur itu. Séra ka'i suméré tambisa e mayat i Yesus aitekel.

⁵⁶ Kumawus in itu séra maréng angé en tumu'tul i nanamur wo in solo mawou manam en icisu' a mayat i Yesus. Wo a si endo Sabat séra mento' am pakasa in tawoien éra, kumiit in atoran an ukum Torat.