Read Tontemboan Lukas 4 Bible Online

Lukas 4 - Tontemboan bible

Lukas 4

¹An tutuw i Yesus tumela'u in doyongan Yordan, Sia kinawasa i Roh Le'nas. Wo iwali i Roh Le'nas an tana' kapayasan.

²Sia imento' a mangé mbitu epat ngapulu' ngando eng kauréna wo ra'- ica icuman sapa-sapa. Wo an tutuw-Na imaaremo, Sia pangepé'an i kikiiten é sétang.

³Wo icua i kikiiten é sétang a si Yesus, “Ampa'paan Ko Toyaang i Casuruan, ru'du'o mio' em batu anio' mamuali roti.”

⁴ Taan isowat i Yesus ai sia, “Ang Kitap Le'nas aipatic in tana'i, ‘Sé tou menonou ra'ica asaloke' i roti.’ ”

⁵Kekawus in itu iwali ka'i i kikiiten é sétang si Yesus asi esa tampa rangka'. A mangé mbitu tumarépé'anke'mai turu' i kikiiten é sétang a si Yesus pakasa eng kakolanoan ing kayo'baan.

⁶Wo icuana a si Yesus, “Pakasa eng kakawasaan wo eng kasiyaan itu, iwééku oka waya ai Co! Ampa'paan pakasa en itu aiwééo a yaku wo ro'na ka'i iwééku a si séike' sé icasalé'ku.

⁷Pakasa en itu mamuali oka anu-Mu, sa Ko kumuru en sumiri' yaku.”

⁸ Taan icua i Yesus ai sia, “Ang Kitap Le'nas aipatic in tana'i, ‘Ico musti kumuru en sumiri' a si Casuruan, si Amang Kasuruanmu, wo wayake' Sia em patus pengaapo'an wo paselewiranmu.’ ”

⁹Kekawus in itu si Yesus iwali ka'i i kikiiten é sétang an Yerusalem wo itulungna Sia am buwungan im Balé Le'nas. Wo icuana a si Yesus, “Sa Ko Toyaang i Amang Kasuruan, ilepoko mio' en owak-Mu!

¹⁰ Ampa'paan ang Kitap Le'nas aipatic andumoro' Ico in tana'i, ‘Iru'du' oka i Amang Kasuruan sé malaékat-Na en lumoindong Ico

¹¹wo sumépa Ico maké ing kama éra an tutuw Ko lumepok, wosama' eng kécéi-Mu ra'ica tumena am batu.’ ”

¹² Taan icua i Yesus ai sia, “Awéan ka'i en aipatic ang Kitap Le'nas tana'i, ‘Tioo ko mangepé' a si Casuruan, Amang Kasuruanmu.’ ”

¹³Kekawus i kikiiten é sétang mangepé' a si Yesus ang karapi ing keli pangepé'an wo si Yesus itela'una wo mento' oka in témpo loor, e mangepé' sumawel ai Sia.

¹⁴Si Yesus pakakawasan i Roh Le'nas wo Sia maréng angé ang Galilea. Wo en abar andumoro' si Yesus icaseraro am pakasa in tampa ang Galilea.

¹⁵Wo am bitu Sia masusui am balé-walé paapo'an é agama Yahudi wo pakasa in tou marayo-rayo Sia.

¹⁶Asi makasa si Yesus mai a Nazaret si tampa winangko'an-Na. Imamualio kanaramen-Na asi endo Sabat,[3] Sia muntep am balé paapo'an é agama Yahudi. Am bitu Sia tumulung e maca ing Kitap Le'nas.

¹⁷Wo awéan e iméé ai Sia kitap ginulung, an untepna pinatican i nunuwu' i nabi Yesaya. Wukaan i Yesus eng kitap ginulung itu wo sérén-Na e nats aipatic in tana'i,

¹⁸ “E Roh i Amang Kasuruan a Yakuo ampa'paan Aku sinisir-Nao eng kumua in Abar Kaaruien a sé tou lengéi, wo Yaku ka'i ayutuso i Amang Kasuruan eng kumua a sé tou tana'i: sé tou ayuntep am bui iwekar-Na oka, sé tou wola émaan-Na oka ro'na maséré, sé tou paoko-okoien émaan-Na oka icawekar,

¹⁹wo ka'i mai kumua sapaoka an orasnao si Amang Kasuruan mai lumowir sé tou-Na.”

²⁰Pakabacanai i Yesus si aipatic asi tuus itu wo gulungen-Na eng kitap itu wo iwéé-Na sumawel a si tou matawoi am bitu wo Sia lumukut. Pakasa é tou an untep im balé paapo'an é agama Yahudi itu makatéinteng Sia.

²¹Wo si Yesus tumo'tolo sumusui ai séra in tana'i, “Asi endo anio', imalekepo e nats sé aipatic an untep ing Kitap Le'nas an tutuw iow iluminga sé binaca-Ku.”

²²Wo pakasa sé tou itu kumua, pakasa sé aicua-Na itu wutul wo séra mangaya-ngaya'ka' ampa'paan pakasa sé nunuwu' airoma'-Na itu kaaruien oka mai. Kumawus in itu séra mengkuanan, “Ra'ica réén Sia itu Toyaang i Yusuf?”

²³Wo icua i Yesus ai séra, “Tantu icua oka miow a Yaku si andéan anio', ‘Éi dokter, samaano mio' en owak-Mu in esa.’ Icua miow in taniitu ampa'paan liningao miow sapaoka Aku iméma'o ing kakaya'kaan ang kota Kapernaum wo en itu musti émaan-Ku ka'i an doong-Ku in esa.”

²⁴ Wo icua-Na ka'i ai séra, “Iwéé mio' sumama-sama' an dékén, ra'ica wana nabi si pengasiriin an doongna in esa.

²⁵ Taan icua-Ku ai camu sé uli-ulit mamuali, tana'i: Indior an jaman i nabi Elia, linémpen i Amang Kasuruan en langit wo telu ngata'un enem ngaserap eng kauré ra'ica imaura-uran am pakasa in tana' Israel wo ka'i tinena ing kaareman wangko'. Asi témpo itu ka'i a mangé mbitu kelian wéwéné balu.

²⁶Mandé ka'i in taniitu, si Elia ra'ica airu'du' mangé a si esaan asé wéwéné balu an tana' Israel, taan sia asalo airu'du' mangé a si esa wéwéné balu ra'ica tou Israel si maento' ang kota Sarfat, an tana' Sidon si kota ang kesot in tana' Israel.

²⁷ Tanu siitu ka'i an jaman i nabi Elisa, an tana' Israel keli sé tou sumakit kusta. Taan ra'ica wana mandé esake' tou en sinama' i Amang Kasuruan, aluar si esa tou Siria, makangaran Naaman.”

²⁸Kelinga in aicua i Yesus, pakasa sé tou an untep im balé paapo'an é agama Yahudi itu mae'bow keli ai Sia.

²⁹Wo séra tumulung, e musér si Yesus kumesot asi kota itu wo Sia iwali éra an tembir im pokal si winangunan ing kota éra itu, en iténdél asi pokal itu.

³⁰Taan makala'us itela'u i Yesus en tampa itu wo maya' sumolisip an uner é tou keli.

³¹Kekawus in itu, si Yesus mangé ang Kapernaum si esa kota ang Galilea. Asi endo Sabat Sia sumusui a sé tou am balé paapo'- an é agama Yahudi.

³² Sé tou am bitu mangaya-ngaya'ka' luminga in sususuien-Na ampa'paan Sia manuwu' wuta ing kawasa.

³³Am balé paapo'an é agama Yahudi itu, awéan esa tou si rinasuk i sétang. Wo sia maangko',

³⁴“Yesus tou Nazaret, sapa en urusan-Mu wo icami! Mai-Mu réén patén kami? Kailekanku si séi-Ko, Icoo si Le'nas, asi Amang Kasuruan owo.”

³⁵Wo sia réndéren i Yesus, “Menes, kumesot ai sia ko!” Wo iwalintuang i sétang si tou itu an dior é tou keli wo sia kumesot asi tou itu taan en owak i tou itu ra'ica sapa-sapa.

³⁶Wo pakasa sé tou am bitu mangaya'ka' wo séra mengkuanan, “Em pakaroma'-Na itu wuta ing kawasa. Ampa'paan maké ing kawasa wangko'-Na, sé roh léwo' kumiit im perénta-Na wo séra ka'i kumesot.”

³⁷Wo en abar andumoro' i Yesus icaseraro am pakasa in sangkum itu.

³⁸Wo si Yesus kumesot am balé paapo'an é agama Yahudi itu wo mangé am balé i Simon. An tutuw itu si inang émpo i Simon sumakit paso' repet wo pekiupusen éra a si Yesus wosama' sumama' in sakitna.

³⁹Wo si Yesus mangé tumulung an duru i wéwéné itu wo yusér-Na en sakit paso' i inang émpo i Simon wo masama'. Si wéwéné itu makala'us tumoor wo selewiranna séra.

⁴⁰Keuntep ako i yéndo, sé tou keli mai a si Yesus aiwali éra mai waya sé tou membam-balinaan en sakit. Wo si Yesus maro ing kama ai séra esa wo si esa wo sumama' séra.

⁴¹Wo a sé tou keli kumesot ka'i sé sétang wo mengangko-ngangko', “Icoo si Toyaang i Amang Kasuruan.” Wo péronen i Yesus séra, ra'ica iwéé-Na rumoma' ampa'paan kailekano éra sapaoka Sia itu si Kristus.

⁴²Asi woondona mai ra'ipé' mantang si yéndo, itela'u i Yesus eng kota itu wo Sia mangé an esa tampa lulu in tou. Taan sé tou keli maéré-éré Sia Yesus. Wo an tutuw ipeta'up éra Sia, pekiupusen éra sa woo ro'na Sia ra'ica tumela'u séra.

⁴³Taan icua i Yesus ai séra, “Yaku ka'i musti maangé ang kota-kota walina eng kumua in Abar Kaaruien andumoro' i Amang Kasuruan Kumawasa tanu Kolano. Ampa'paan in ituo, Aku ayutusai i Amang Kasuruan ang kayo'baan.”

⁴⁴Wo si Yesus kumua in Abar Kaaruien am balé-walé paapo'an é agama Yahudi am pakasa in tampa an Yudea.