Read Tontemboan Lukas 7 Bible Online

Lukas 7 - Tontemboan bible

Lukas 7

¹Kumawusai si Yesus maroma' a sé tou keli itu wo Sia mangé ang Kapernaum.

²Am bitu, awéan si kikiiten é sanga atus suraro Romawi, makaanu esa ata si paupu-upusna. Si ata itu sumakit repet wo mepaté-patéo.

³An tutuw si kikiiten itu luminga andumoro' i Yesus, iru'du'na piraan matu'a é tou Yahudi mangé a si Yesus, mekiupus sa woo ro'na Sia mai am balé i kikiiten é suraro itu en sumama' si atana.

⁴An tutuw éra icateka'o mangé a si Yesus, séra wutu-wutul mekiupus ai Sia wosama' tawangen-Na si kikiiten é suraro itu. Icua éra ai Sia, “Amang, si kikiiten é sangaatus suraro Romawi itu patus tawangen i Amang,

⁵ampa'paan sia mengaupus sé touta tou Yahudi wo sia ka'i imanguno im balé paapo'an é agama Yahudi torona ami.”

⁶Wo si Yesus mangé mewali-wali wo iséra. An tutuw Sia tawio icateka' am balé i kikiiten itu wo iru'du' na itu sé kara-karapina mangé a si Yesus, icua i perwira itu, icuao mio' in tana'i, “Tuang, nomoo makepé-kepé mai am baléku ampa'paan pawerotenku ra'ica patus aku tumerima si Tuang am baléku.

⁷Ampa'paano in itu aku ra'ica mangé a si Tuang, ampa'paan pawerotenku sapaoka aku ra'ica patus mai a si Tuang. Anaé, icuao mai esa nuwu'ke', tantu si ataku masama' oka.

⁸Ampa'paan aku awéané' kikiiten sé maperénta yaku. Wo ka'i aku, awéan suraro sé paperéntanku. Wo sa peréntanku esaan asé suraro itu: ‘Mangé!’, tantu sia mangé. Wo sa peréntanku si esa suraro: Mai!, tantu sia mai. Wo sa peréntanku si ataku, ‘Tawoien en anio'!’, tantu tawoienna.”

⁹Kelinga i Yesus en aicua éra andumoro' in aitaar i kikiiten é suraro Romawi itu wo si Yesus mangaya'ka' a si kikiiten itu. Wo sérén i Yesus sé tou keli makiit Sia wo icua-Na, “Icua-Ku mangé ai camu, ra'ipé' kawisa ipeta'up-Ku tou makaanu im paémanen wangko' tanu si anio' mandé ka'i an uner é tou Israel.”

¹⁰An tutuw sé tou airu'du' itu maréngo am balé i kikiiten é suraro Romawi, sérén éra si ata itu imasama'o.

¹¹Kumawus in itu, si Yesus mangé asi esa kota si makangaran Nain ang karapi é murit-Na wo sé tou keli.

¹²An tutuw Sia matawio im papalen wangko' ing kota, awéan sé tou makawuléng ing kalékos si pakatekelan i tou imaté. Si tou imaté itu toyaang tuama, toyaang esa-esa i wéwéné balu. Wo keli sé tou ang kota itu mawaya' mewali-wali wo si wéwéné balu itu.

¹³Keséré i Apo' Yesus si wéwéné balu itu, makala'us mai eng kaupusan-Na ai sia. Wo icua-Na a si wéwéné balu itu, “Inang, nomoo mengamé-ngamé'!”

¹⁴Kumawus in itu, Sia rumuru mangé ang kalékos itu, wo timboien-Na. Sé tou makawuléng ing kalékos itu makala'us mento', wo icua-Na, “Éi mangalitou, icua-Ku ai co tumooro!”

¹⁵Si mangalitou imatéo itu tumoor wo sia lumukut wo tumo'tolo maroma'. Wo iwali mangé i Yesus si mangalitou itu a si inangna.

¹⁶Pakasa sé tou am bitu maindé' wo séra rumayo wo sumiri' si Amang Kasuruan. Icua éra, “Si esa nabi wangko' an unertao! Si Amang Kasuruan imayo en lumowir sé tou-Na!”

¹⁷Wo icaseraro en abar andumoro' i Yesus am pakasa in tana' Yudea wo an li'cirna itu.

¹⁸An tutuw lingan i Yohanes Mabaptis a sé muritna andumoro' im pakasa sé niéma' i Yesus,

¹⁹wo towanna rua tou asé muritna wo iru'du'na séra mangé mamuéi a si Apo' Yesus, “Amang, si Amang réén si tou aijanjio i Amang Kasuruan maai itu? Kuma'pa tou walina e musti entoon ami?”

²⁰Kumawus in itu sé rua murit i Yohanes Mabaptis mangé a si Apo' Yesus wo icua éra tana'i, “Si Yohanes Mabaptis guru ami, irumu'du' icami mai mamuéi a si Amang: Si Amang réén si tou aijanjio i Amang Kasuruan maai itu, kuma'pa tou walina e musti entoon ami?”

²¹Asi témpo itu, si Yesus sumama' sé tou keli sé membam-balinaan en sakit si méma' iséra mawendu wo musér ka'i sé roh léwo'. Sia ka'i iméma' kelian sé tou wola ro'na maséré.

²² Wo en ai sowat i Yesus ai séra, “Maréngo mangé a si Yohanes Mabaptis wo icuao mio' ai sia sapa sé sinéréo miow wo sé liningao miow: si tou wola maséréo, si tou késo' mawaya'o, si tou sumakit kusta masama'o, si tou wengel malingao, si tou imatéo tinou sumawel, wo en Abar Kaaruien i Amang Kasuruan ipakua-kuao a sé tou lengéi.”

²³Wo icua ka'i i Yesus, “Pakakamangen sé tou ra'ica marua-rua wasa maéman a Yaku wo ra'ica icumélong Yaku.”

²⁴An tutuw sé ayutus i Yohanes mangém, tumo'tolo sisil i Yesus a sé tou keli en andumoro' i Yohanes, “Sapa réén en torona kamu maangé a si Yohanes an tana' kapayasan? Mangé réén suméré in saraw pengéro-ngéro' in deges?

²⁵Sapa en torona miow maangé? Suméré réén si tou mekarai in loor? Si tou mekarai in loor wo menonou ang kasiyaan itu, em paento'anna am balé i colano.

²⁶Anaé, sapa en torona miow maangé? Suméré réén si nabi? En itu wutul, taan icua-Ku mangé ai camu, sa si Yohanes lumébé mai wo si nabi.

²⁷ Ampa'paan, andumoro' sia awéan en aipatic ang kitap le'nas, ‘Séréno! Airu'du'-Ku mai si utusan-Ku rumiorai ai Co, sia oka en tumu'tul in lalan wayaan-Mu.’

²⁸Icua-Ku mangé ai camu, asé im pakasa in tou si ai tou é wéwéné ra'ica wana en ilumébé mai eng kawangko' i Yohanes Mabaptis. Taan sé tou ipawawa-wawa' ang Kakolanoan i Amang Kasuruan, ilumébé mai eng kawangko' i Yohanes Mabaptis.”

²⁹ Wo pakasa sé tou iluminga in aicua i Yesus, wo ka'i sé tou matagi im pajak, makua sapaoka si Amang Kasuruan itu wutul. Ampa'paan séra im baya imééo in owak em baptisen i Yohanes Mabaptis.

³⁰Taan sé tou Farisi wo sé makailek wutul in Torat makélong im pawasa-wasan i Amang Kasuruan ang katouan éra. Sérao sé tou sé ra'ica kiim baptisen i Yohanes Mabaptis.

³¹Wo icua i Yesus ka'i a sé tou keli itu in tana'i, “Sapa en yandé-Ku sé tou menonou intarépé'? Maké in sapa ka'i séra itu peputé-Ku?

³²Séra itu tanu sé toyaang makalukut am pasar, maangko' a sé kara-karapi éra, ‘Pasengon ami em peloit torona miow, taan ra'ica kiim iow maéngké. Pakantar ami eng kakantaren mala'lu, taan ra'ica kiim iow maamé'.’

³³Kamu, meputé wo sé toyaang itu. Ampa'paan an tutuw i Yohanes Mabaptis imai, sia ra'ica mengakan i roti wo ra'ica mengaelep in anggor wo icua miowke', ‘Sia rinasuk i sétang.’

³⁴Wo mai si Toyaang i Tou, Sia makan wo maelep, wo ipakua miow, ‘Séréno, Sia tampenganen wo tampengelepen. Sia ka'i mekarapi wo sé matagi im pajak wo sé tou iméma' ing kamesé-meséaan.’

³⁵Taan eng kapinteran asi Amang Kasuruan owo, kaséréan oka a sé tou sé mengaéma' in sususuien wutul itu.”

³⁶Awéan esa tou Farisi makangaran Simon, menot si Yesus eng kuman ang karapina. Wo mai si Yesus am balé i tou itu wo lumukut kuman am bitu.

³⁷ Ang kota itu awéan esa wéwéné si kailekano é tou, sia menonou ang kamesé-meséaan. An tutuw sia luminga sapaoka si Yesus ang karoro'an makan am balé i tou Farisi itu wo sia makala'us mai am bitu maali-ali im botel teké' niéma' am batu pualam pinumpunan in solo mawou manam.

³⁸Wo sia mangé tumulung an somoi i Yesus an duru ing kécéi-Na. Wo sia maamé' akar eng kécéi i Yesus marames in dano im berenna. Kumawus in itu lapenna maké im buukna eng kécéi i Yesus, ciomenna eng kécéi wo naamenna in solo mawou manam.

³⁹An tutuw i tou Farisi si menot si Yesus suméré sapa e niéma' i wéwéné itu, sia kumua an untep in aténa tana'i, “Sa Sia uli-ulit nabi, tantu kailekan-Na si séi si wéwéné itumimboi ai Sia anio' wo tantu kailekan-Na sapaoka si wéwéné itu wéwéné menonou ang kamesé-meséaan.”

⁴⁰Wo icua i Yesus a si Simon, “Simon, awéan en icasalé'-Ku icua ai co.” Isowat i Simon, “Icuao mai é Guru.”

⁴¹Icua i Yesus, “Awéan rua tou miram roit a si tou mengawéé pairaman roit. Si esa tou miram roit lima ngaatus dinar wo si esa lima ngapulu' dinar.

⁴²Taan en doit niiram éra in dua ra'io icawaréng, akar en doit niiram éra itu ra'io pinangilekna iwaréng sumawel. Anaé é Simon, si séi ai séra in dua en lébé mengaupus a si tou pairaman roit itu?”

⁴³Isowat i Simon, “Sa werotenku, si tou miram roit keli.” Icua i Yesus ai sia, “En aicuamu itu wutul.”

⁴⁴Wo si Yesus suméré a si wéwéné itu wo icua-Na a si Simon, “Simon, sinérémuo sapa e niéma' i wéwéné anio'? Yaku muntepai am balému, taan ra'ica aitu'tulmu rano wu'as ing kécéi-Ku tanu ing kanaramenta. Taan si wéwéné anio' rano im berenna em pinakéna e mu'as ing kécéiku wo lapenna im buukna.

⁴⁵An tutuw-Ku imai, ra'ica sinungkulmu in cumiom. Taan si wéwéné anio', keuntep-Ku mai am bia'i, ra'ica mento' sia menyio-nyiom ing kécéi-Ku.

⁴⁶Ra'ica ninaammu in solo mawou manam en do'kos-Ku, taan si wéwéné anio', numaamo in solo mawou manam ang kécéi-Ku.

⁴⁷Icua-Ku ai co, en upusna wangko' itu, itumuru'o sapaoka eng kamesé-meséaanna sé kumeli-keli itu niampungano. Taan sa si tou niampungan wayake' im pira, eng kaupusanna ka'i wayake' im pira.”

⁴⁸Wo icua i Yesus a si wéwéné itu, “Eng kamesé-meséaanmu niampungano!”

⁴⁹Sé tou makalukut makan mewali-wali wo si Yesus, mawerot an até éra, “Si séi réén Sia akar eng kamesé-meséaan ro'na ampungan?”

⁵⁰Taan icua i Yesus a si wéwéné itu, “Ampa'paan ko maéman a Yaku, ico linowiro. Anaé, maya'o mangé ko ang karapi in elur!”