Read Tontemboan Lukas 8 Bible Online

Lukas 8 - Tontemboan bible

Lukas 8

¹Kekawus in itu, si Yesus mangé ang kota-kota wo an doo-roong eng kumua in Abar Kaaruien andumoro' ing kakolanoan i Amang Kasuruan. Sé sangapulu' rua murit i Yesus icumiit ang karapi-Na.

² Taniitu ka'i sé piraan wéwéné sé sumangkumo sinama'-Na asé roh léwo' wo in sakit, icumiit ka'i si Yesus. Esaan ai séra awéan si makangaran Maria tou Magdala si sinama'-Nao asé pitu roh léwo'.

³Wo awéan ka'i si wéwéné makangaran Yohana penanaan i Khuza. Si Khuza anio', kikiiten mengaurus in doit i colano Herodes. Wo awéan ka'i si Susana wo keli sé wéwéné walina. Séra mengaselewir a si Yesus wo sé murit-Na mapaké ing kasiyaan éra.

⁴Asi makasa rérot oka sé tou keli mai a si Yesus, séra ang kota-kota membam-balinaan owo. An tutuw é tou keli mali'uso, isisil i Yesus en andéan anio' ai séra. Icua-Na,

⁵“Awéan esa tou menganguma mangé muras in lulumbo an uma. Ang karoro'anna imawuras, awéan en lulumbo irumongkor an tembir in lalan wo linéakan é tou wo mai ro'keten é burung sé lulumbo itu akar imaka'pu.

⁶Awéan ka'i sé irumongkor an tana' wawatuan. An tutuw sé lulumbo itu itumouo, ra'ica mento' uré en lulumbo itu maperao ampa'paan tumou an tana' ra'ica wana rano.

⁷Wo awéan ka'i lulumbo irumongkor an tana' patowan in dukut tutunéan. Sé rukut tutunéan itu tumou mewali-wali wo in lulumbo. Makarangka'o en dukut tutunéan itu wo sumaput in tinanem itu akar ime'del.

⁸Taan awéan en lulumbo walina sé irumongkor an tana' kemel, sé lulumbo itu tumou wo mua' akar sangaatus lumepet.” Kekawus i Yesus masisil in andéan itu wo icua-Na ka'i, “Si séi e makalunteng, aweso taré sia lumingao sumama-sama'!”

⁹Kumawus in itu, sé murit-Na mamuéi ai Sia sapa eng kaangéanna in andéan itu.

¹⁰ Wo icua-Na, “Kamu intarépé' winéan i Amang Kasuruan kamang tatambér e makailek andumoro' ing Kakolanoan in Sorga. Taan a sé tou walina andumoro' ing Kakolanoan in Sorga itu, icua-Ku maké in andéan wosama', ‘Mandé sinéré éra, taan ra'ica kaangéan éra sapa en sinéré, wo mandé ka'i lininga éra, taan ra'ica kaangéan éra sapa en lininga.’

¹¹Tana'i eng kaangéan in andéan itu: En lulumbo itu, siituo en Taar i Amang Kasuruan.

¹²En lulumbo irumongkor an tembir in lalan itu, ayandé sé tou ilumingao in Taar i Amang Kasuruan. Taan kekawus éra iluminga in Taar itu wo mai si kikiiten é sétang rumombit in Taar itu an até éra wosama' séra ra'ica maéman wo ra'ica malowir.

¹³En lulumbo irumongkor an tana' wawatuan ayandé sé tou ilumingao in Taar i Amang Kasuruan ang karapi in arui en até. Taan en Taar itu ra'ica imaa'mut sama' an untep in até éra. Sé tou tanu siitu tumarépé'anke' maéman wo an tutuw imeta'- up im pangepé'an, séra ra'io ka'i maéman a si Amang Kasuruan.

¹⁴En lulumbo irumongkor an tana' pengatowan in dukut tutunéan, ayandé sé tou ilumingao in Taar i Amang Kasuruan, taan séra maindé-indé'ke' andumoro' ing katouan éra wo masalé'ke' menonou ang kasiyaan wo ang kaaruian asi kayo'baan anio'. Pakasa en itu méma' im paémanen éra ra'ica keter meputé wo in lulumbo ra'ica mengawéé wua'na loor.

¹⁵Wo en lulumbo irumongkor an tana' kemel itu, ayandé sé tou ilumingao in Taar i Amang Kasuruan wo en Taar itu wutu-wutul ayéma' éra an untep in até akar séra méé wua'na ing kale'tekkan.”

¹⁶ “Ra'ica wana tou méngkét in sosoloan wo kelewenna im bantang, kuma'pa iweta'na an darem im patekelan. Taan iweta'na am patuliran in sosoloan wosama' pakasa en tou imuntep am balé ro'na suméré in sendotna.

¹⁷ Ampa'paan ra'ica wana mandé esake' si ipakaenep wo ra'ica ipapaturu' oka wo ra'ica wana sé ipakaenep wo ra'ica kakailekan oka wo ipakua-kua.

¹⁸ Ampa'paano in itu, iwéé mio' sumama-sama' an dékén sapa sé lininga miow. Ampa'paan si séi e masalé' makailek sapa sé aicua-Ku, émaan oka i Amang Kasuruan sia lébé makailek. Taan si séi si ra'ica kiim makailek sapa sé aicua-Ku, sapa sé pawasanna kailekannao émaan oka i Amang Kasuruan ra'io kata'néianna waya.”

¹⁹Si inang wo sé mepoow wo si Yesus, mai ai Sia, taan séra ra'ica icaruru mangé ai Sia ampa'paan keli en tou.

²⁰Wo awéan esa tou mangé kumua ai Sia, “Tuang, si inang wo sé mepoow wo si Tuang ang kesot. Séra masalé' meta'up wo si Tuang.”

²¹Taan icua i Yesus ai séra, “Sé tou iluminga wo sé mengaéma' in Taar i Amang Kasuruan, sérao si inang-Ku wo sé mepoow wo Yaku.”

²²Asi sangando si Yesus wo sé murit-Na sumaké an londéi wo icua-Na a sé murit-Na, “Mayoo, kita mangé an lewet in lour.” Wo séra mangé lumewet.

²³Ang karoro'an éra i malewet, si Yesus kinakili'an. Tumarépé'anke', mai en deges repet wo en sempa' wangker an lour, wo en londéi itu pauntepeno in dano akar séra metine-tinepo.

²⁴Wo si Yesus polon é murit-Na. Icua éra, “Guru, Guru, tawio maté kita!” Wo si Yesus mapolo, peréntan-Na en deges wo en lour itu wosama' menteng. Wo en lour itu wutu-wutul malener.

²⁵Wo icua i Yesus a sé murit-Na, “Kéitu réén kamu ra'ica maéman a Yaku?” Séra mangaya-ngaya'ka' wo maindé'. Wo séra mengkuanan si esa wo si esa, “Si séi réén si Tou anio', akar en deges wo en sempa' itu kumiit im perénta-Na?”

²⁶Si Yesus wo sé murit-Na icateka'o mangé an lewet in lour Galilea, an sangkum é tou Gerasa.

²⁷Icateka' mangé si Yesus ang katanaan wo mai am bitu si esa tuama ang kota owo meta'up Sia. Si tou itu rinasuk é sétang wo uréo sia ra'ica mekarai wo ra'ica maento' am balé taan maento'ke' am pakuburan.

²⁸Keséréna si Yesus, sia mangko' wo kumundu an dior-Na. Icuana in taangko', “Sapa en urusan-Mu wo yaku, éi Yesus Toyaang i Amang Kasuruan Si Rumangka-rangka'? Pekiupusenku ai Co tioo okoien-Mu aku!”

²⁹Si tou rinasuk é roh léwo' itu kumua in taniitu ampa'paan ayusér i Yesus si roh léwo' itu kumesot ai sia. Sé roh léwo' itu manaramo mengakawasa si tou itu, ampa'paan in ituo eng kama wo eng kécéi i tou itu rinanté wo pakatéiran é tou am bitu. Mandé in taniitu, kinarembusannake' e ranté itu akar sia iwali i sétang an tampa lulu in tou.

³⁰Wo wuéien i Yesus a si tou itu, “Sapa réén e ngaranmu?” isowatna, “E ngaranku Legion,” ampa'paan kelian sé sétang irumasuk sia.

³¹Kumawus in itu sé sétang itu mekiupus a si Yesus wosama' ra'ica yusér-Na séra mangé muntep ang kepal im papaté.

³²Ra'ica talos tayang am bitu, kelian ulit sé wawi ang karoro'- an i maéré-éré kanen an tolaina. Wo pangileken é sétang itu a si Yesus wosama' wéan-Na kaloasan séra mangé muntep a sé wawi itu. Wo énan i Yesus em pinangilek éra itu.

³³Kumawus in itu sé sétang itu kumesot a si tou itu wo mangé muntep a sé wawi itu. Wo sé reru' é wawi itu lumo'tic ang kepal wo muntep an lour akar imaté imalesem.

³⁴An tutuw é tou matéir sé wawi itu isuméré sapa e imamuali, séra makala'us tuméron wo mangé isisil éra waya eng kamamualian itu ang kota wo an doo-roong an sangkum in tampa itu.

³⁵Kumawus in itu sé tou ang kota wo an doo-roong an sangkum itu kumesot angé suméré sapa e mamuali. Séra mai a si Yesus wo sérén éra si tou rinasuk i sétang itu imasama'o. Sia makalukut an duru ing kécéi i Yesus wo mekaraio, sia uli-ulit imasama'o ampa'paan in ituo séra maindé'.

³⁶Wo sé tou sé suméréo in esa pakasa eng kinamamualian itu, isisil éra a sé tou sé makaaié', tumambisa si tou rinasuk é sétang itu ro'na imasama'.

³⁷Wo pakasa sé tou an sangkum ing Gerasa mekiupus a si Yesus wosama' itela'- u-Na en tampa éra. Icua éra in taniitu ampa'paan séra im pakasa uli-ulit maindé'. Anaé, si Yesus sumaké sumawel an londéi wo maréng.

³⁸Wo si tou imasama'o itu mekiupus a si Yesus sa woo ro'na énan-Na eng kumiit Sia. Taan sia airu'du'ke' i Yesus maréng, icua i Yesus,

³⁹“Maréngo mangé am balému wo isisilo mangé waya sapa sé niéma'o i Amang Kasuruan ai co.” Wo si tou itu maréng wo mangé am pakasa ing kota wo isisilna waya a sé tou am bitu, andumoro' im pakasa sé niéma'o i Yesus ai sia.

⁴⁰An tutuw i Yesus maréng angé sumawel an lewet in lour, Sia sinungkul é tou keli ang karapi in arui ampa'paan séra im baya ang karoro'an mengento-ngento' Sia.

⁴¹Wo mai a si Yesus si esa tou makangaran Yairus, sia kapala im balé paapo'an é agama Yahudi. Sia kumundu an dior-Na wo mekiupus wosama' si Yesus mai am baléna,

⁴²ampa'paan si toyaangna wéwéné si toyaang esa-esa, mepaté-patéo. En umur i toyaang itu wona' sangapulu' rua ngata'un. Ang karoro'an i Yesus maangé am balé i Yairus, keli en tou meréngké-réngké'an an duru-Na.

⁴³An uner é tou keli itu, awéan si esa wéwéné sangapulu' rua ngata'uno wenduo in sakit ampa'paan pengeso-ngesotan in enda'. Pakasa eng kasiyaanna aiwangkérnao e mapasama' a sé dokter, taan ra'ica wana e ro'na sumama' isia.

⁴⁴Wo si wéwéné itu mangé rumuru an somoi i Yesus wo misu' in tempok in juba-Na wo an tutuw ituke' mentoo en enda' si mengeso-ngesot ai sia.

⁴⁵Kumawus in itu icua i Yesus, “Si séi réén wona' e misu' Yaku?” Taan ra'ica wana mandé esake' tou e mangaku. Wo icua i Petrus ai Sia, “Guru, keli en tou meréngké-réngké'an an duru i Guru.”

⁴⁶Icua i Yesus, “Taan awéan tou e misu' Yaku, ampa'paan kapendaman-Ku awéan kawasa en icumesot an owak-Ku.”

⁴⁷Sérén i wéwéné itu sapaoka e niéma'na kinailekano, anaé ang karapi in indé' wo mege'ge-ge'ger sia mai kumundu an dior i Yesus. Wo sisilna an dior é tou keli am bitu, kéitu sia misu' si Yesus wo an tutuw ituke' en sakitna makala'us masama'.

⁴⁸Wo icua i Yesus a si wéwéné itu, “É toyaang-Ku, ampa'paan ko maéman a Yaku, asi oras anio' ko masama'o. Mangém ang karapi in elur.”

⁴⁹An tutuw i Yesus maroma'pé', mai si esa tou si am balé i Yairus owo wo kumua, “Si toyaang i tuang imatéo. Anaé, nomoo ka'i ko menusa-nusa si Guru!”

⁵⁰Taan en aicua i tou itu lininga i Yesus wo icua-Na a si Yairus, “Ra'ica toro maindé', percayano mai Aku! Tantu si toyaangmu malowir.”

⁵¹Icateka'o mangé am balé i Yairus, ra'ica iwéé i Yesus sé tou walina muntep, aluar si Petrus, si Yohanes, si Yakobus wo si amang wo si inang i toyaang itu.

⁵²Pakasa sé tou mengamé-ngamé' wo masesendu'an repet a si toyaang itu. Taan icua i Yesus, “Nomo mengamé-ngamé'! Si toyaang itu ra'ica imaté, taan asalo tumekel.”

⁵³Taan aipeké'ké' érake' taré Sia ampa'paan kailekan éra si toyaang itu imatéo.

⁵⁴Wo timboian i Yesus eng kama i toyaang itu wo kumua in taangko', “Éi toyaang, tumulungo!”

⁵⁵Wo si toyaang itu makala'- us tumou sumawel wo asi témpo ituke' sia makala'us tumulung. Kumawusai in itu ru'du' i Yesus séra e méé kanen a si toyaang itu.

⁵⁶Sé matu'a i toyaang itu mangaya-ngaya'ka' isuméré in itu. Taan pinéro i Yesus séra wosama' ra'ica sisil éra a si séike' mangé andumoro' ing kamamualian itu.