Read Tontemboan Yohanes 1 Bible Online

Yohanes 1 - Tontemboan bible

Yohanes 1

¹Asi kataré-taré ra'ipé' niéma' i Amang Kasuruan eng kayo'baan anio', en Taar awéano. En Taar itu mewali-wali wo si Amang Kasuruan wo en Taar ituo si Amang Kasuruan.[1]

²En Taar itu tumo'tolai ing kataré-taré mewali-wali wo si Amang Kasuruan an tutuw eng kayo'baan ra'ipé' niéma'.

³Ang karapi in Taar itu émaan i Amang Kasuruan em baya-wayana awéan. Ra'ica wana mandé esake' sé niéma' i Amang Kasuruan sa ra'ica ampa'paan in Taar itu.

⁴En Taar itu palemboian ing katouan wo eng katouan itu si sendot en sumendot in até é tou.

⁵En sendot itu sumendot ing kariréimbengan, wo eng kariréimbengan ra'ica makawoo kumala in sendot itu.

⁶ Asi sangando awéan esa tou si ayutus i Amang Kasuruan, e ngaranna Yohanes.

⁷Sia mai eng kumua andumoro' in sendot itu a sé im pakasa é tou wosama' lingan éra eng kasairianna wo mercaya in sendot itu.

⁸Ra'ica si Yohanes en sendot itu, taan sia mai musti méé ing kasairian a sé tou andumoro' in sendot itu.

⁹Wo en sendot si uli-ulit itu ang karoro'an i maai ang kayo'baan. Siituo en sendot si sumendot in até im pakasa é tou.

¹⁰Sia si patuulen sendot ang kayo'baano. Eng kayo'baan niéma' ampa'paan Sia, taan sé tou ang kayo'baan ra'ica makatuus Sia.

¹¹Sia mai a sé tou-Na Yahudi taan Sia ra'ica tinerima éra.

¹²Taan sé tou tumerima wo mercaya ai Sia, séra wéan oka hak wosama' mamuali toya-toyaang i Amang Kasuruan.

¹³Séra mamuali toya-toyaang i Amang Kasuruan ra'ica ampa'paan é matu'a éra, kuma'pa im basa wo ing kasalé'an i tou. Taan si Amang Kasuruan in esa e méma' iséra mamuali toya-toyaang-Na.

¹⁴Wo en Taar itu mamualio tou wo Sia mento' an unerta. Wo sinérétao eng kawangko'-Na itu, si tinerima-Nao asi Amang owo ampa'paan Sia Toyaang-Na in Esa-esa. Ampa'paan en Taar si mamualio tou itu, kinailekantao andumoro' in upus aitambér i Amang Kasuruan wo in sususuien wutul-Na.

¹⁵Asi makasa, si Yohanes Mabaptis méé ing kasairian andumoro' si pakua in Taar itu. Icuana ang karapi in taangko' tana'i, “Si anioo Sia si sumangkumo aicuaku ai camu! Indior aicuaku, ‘Awéan oka e maai kekawus yaku. Sia en lébé iparangka' mai wo yaku, ampa'paan ra'ipé' itumou aku Sia awéano.’ ”

¹⁶Wo en upus-Na ra'io ka'i icakua. Wo ampa'paan in upus-Na itu akar kita ra'ica mento' makéré ing kamang si lumepe-lepet.

¹⁷Tinerimata en ukum-ukum i Amang Kasuruan ampa'paan i Musa, taan kinatuusanta en upus aitambér i Amang Kasuruan wo en sususuien wutul-Na ampa'paan si Yesus Kristus.

¹⁸Ra'ica wana tou en sumangkumo suméré si Amang Kasuruan, wayake' si Toyaang-Na Esa-esa. Sia meputé wo si Amang wo susut keli ai Sia. Siao en cumua ai cita andumoro' si séi si Amang Kasuruan itu.

¹⁹Si anioo eng kasairian i Yohanes an tutuw sé kikiiten é tou Yahudi an Yerusalem rumu'du' piraan imam wo tou Lewi mangé mamuéi in tana'i a si Yohanes, “Si séi réén ko?”

²⁰Ang karapi in da'ica wana em ipaene-enep icua i Yohanes, “Ra'ica yaku si Mesias.”[2]

²¹ Wo wuéien éra ka'i ai sia, “Sa taniitu si séi réén ko? Ico réén si Elia?”[3] Isowat i Yohanes, “Ra'ica!” Wuéien éra ka'i, “Ico réén si nabi si paento-ento'en ami si maai oka itu?” Wo isowat i Yohanes, “Ra'ica!”

²²Wuéien éra ka'i ai sia, “Sa taniitu em butulna si séi réén ko? Ampa'paan musti icua ami a sé kikiiten sé imutus icami. Sapa réén en icuamu andumoro' in owakmu in esa?”

²³ Isowat i Yohanes, “Yakuo si tou si aicua i nabi Yesaya indior, awéan oka tou mengangko-ngangko' an tana' kapayasan, ‘Rondoren en lalan langkoian-Na!’ ”

²⁴Asé tou sé airu'du' itu awéan piraan tou Farisi,

²⁵séra imamuéi in tana'i ai sia, “Sa ko ra'ica si Mesias Kolano Lumolowir ami, ra'ica si nabi Elia wo ra'ica si nabi wangko' si maai oka itu, kéitu réén ko mengabaptis?”

²⁶Isowat i Yohanes ai séra, “Baptisenku kamu in dano. Taan an uner iow am bia'i awéan Tou si ra'ipé' katuusan iow.

²⁷Siao si maai kekawus yaku, taan Sia en lébé parangka' mai wo yaku akar muka'ke' in tali in sapatu-Na yaku ra'ica patus.”

²⁸Em pepaaren itu imamuali am Betania an lewetico in doyongan Yordan, tampa i Yohanes mengabaptis sé tou.

²⁹Asi woondona mai sérén i Yohanes si Yesus mai ai sia wo icuana a sé tou, “Sérén, si anioo si Toyaang i Domba i Amang Kasuruan si mai misi ing kamesé-meséaan é tou ang kayo'baan.

³⁰Siao si sumangkumo aicuaku indior, sapaoka Sia si maai kekawus yaku, Siao en lébé iparangka' mai wo yaku ampa'paan ra'ipé' itumou aku, Sia awéanno.

³¹Yaku in esa ka'i indior ra'ipé' makatuus Sia tanu Mesias. Taan yaku mai am bia'i e maptis sé tou Israel ang karapi in dano wosama' séra ro'na makatuus si séi Sia.”

³²Sisil ka'i i Yohanes sapa sé sinérénao in esa wo icuana, “Sinéréku e Roh i Amang Kasuruan tanuoka mombo tumumpa mai an langit owo wo tumeka' am bawo-Na.

³³An tutuw itu ra'ipé' katuusanku Sia, taan si Amang Kasuruan si mutus yaku e mengabaptis sé tou ang karapi in dano, icumuao a yaku: ‘Sa sérénmu e Roh itu tumumpa mai an dangka' i esa Tou wo tumeka' am bawo-Na, Sia oka e mengabaptis sé tou ang karapi i Roh Le'nas’.

³⁴Sinérékuo in esa, anaé yaku méé ing kasairian sapaoka Siao si Toyaang i Amang Kasuruan.”

³⁵Asi woondona mai si Yohanes makatulung ka'i an tampa itu ang karapi é rua muritna.

³⁶An tutuwna suméré si Yesus lumangkoi, icuana, “Sérén, Siao si Toyaang i Domba i Amang Kasuruan!”

³⁷Sé rua murit i Yohanes sé luminga sapa en aicuana, wo séra mangé kumiit si Yesus.

³⁸Wo si Yesus maréng in somoi, sérén-Na séra mawaya' makiit Sia. Wo wuéien-Na ai iséra, “Sapa réén em paéré-érén iow?” Isowat éra, “Guru, am bisa réén em paento'an-Mu?”

³⁹Icua i Yesus ai séra, “Mayoo wo sérén iow oka em paento'an-Ku.” Wo séra mangé mewali-wali wo Sia en suméré am bisa em paento'an-Na. An tutuw itu wona' jam ampa im bawaando. Asi sangando itu séra mento' mewali-wali wo Sia.

⁴⁰Esaan asé rua murit itu sé lumingao in aicua i Yohanes wo kumiit angé si Yesus, sia itu makangaran Andreas. Sia metuari wo si Simon Petrus.

⁴¹Wo si Andreas mangé meta'up wo si Simon tuarina, wo icuana ai sia, “Aipeta'upo ami si Mesias.” (Mesias meputé wo si Kristus, eng kaangéanna Kolano Lumolowir).

⁴²Kekawus in itu si Simon iwali i Andreas a si Yesus. Wo téintengen i Yesus si Simon wo icua-Na ai sia, “Ico si Simon toyaang i Yohanes. Ico ngaranan-Ku oka ‘Kefas’. (Kefas puté wo i ‘Petrus’ eng kaangéanna, watu enté').”

⁴³Asi woondona mai si Yesus musé' e maangé an sangkum ing Galilea. Taan Sia mangé meta'up owo wo si Filipus, icua-Na ai sia, “Mayo kumiito mai Yaku.”

⁴⁴Si Filipus tou ing kota Betsaida, si kota i Andreas wo si Petrus.

⁴⁵Wo si Filipus mangé meta'up wo si Natanael, icuana ai sia, “Aipeta'upo ami Sia si aicua i Musa ang kitap Torat, wo si pakua é nabi. Siao si Yesus a Nazaret owo toyaang i Yusuf.”

⁴⁶Taan isowat i Natanael, “Roong Nazaret? Awéan réén esa tou loor si mai an doong itu owo?” Isowat i Filipus, “Mayo sérénmu oka in esa.”

⁴⁷An tutuw i Yesus suméré si Natanael maai ai Sia, icua i Yesus, “Sérén, siao si wutu-wutul tou Israel. Si tou anio' ra'ica mengauwak sé tou walina.”

⁴⁸Wuéien i Natanael a si Yesus, “Tambisa réén Ko wo makatuus yaku?” Isowat i Yesus ai sia, “Ra'ipé' tinowa i Filipus ko, tutuw ko an darem im panga-pangana in tuura in ara, sinéré-Kuo ko.”

⁴⁹Icua i Natanael a si Yesus, “Guru, Ico Toyaang i Amang Kasuruan, Ico Kolano é tou Israel!”

⁵⁰Isowat i Yesus, “Aicua-Kuo ai co sapaoka ko sinéré-Kuo an darem é panga-pangana in tuura in ara. Ampa'paano réén in itu wo ko maéman a Yaku? Sangkumen iow oka sé kamamualian si lébé wangko' mai wo siitu.”

⁵¹ Icua ka'i i Yesus, “En ulitna icua-Ku mangé ai camu, sérén iow oka en langit mawuka' wo sé malaékat i Amang Kasuruan sumosor wo meros maai a Yaku Toyaang i Tou.”