Read Tontemboan Yohanes 13 Bible Online

Yohanes 13 - Tontemboan bible

Yohanes 13

¹Matawio en endo wangko' Paska wo kailekano i Yesus ra'io uré ka'i tela'u-Na eng kayo'baan anio' e maréng angé sumawel a si Amang-Na. Ipaupu-upus-Na keli sé tou sé imamualio anu-Na ang kayo'baan anio', wo icaupus-Na séra akar ing kaakaran ing katouan-Na.

²An tutuw i Yesus wo sé murit-Na ang karoro'an i makan im bengi, si kikiiten é sétang icumewito im basa léwo' an até i Yudas Iskariot toyaang i Simon wosama' kumianat a si Yesus.

³Kailekan i Yesus pakasa eng kawasa aiwééo mai i Amang-Na ai Sia. Kailekan-Na ka'i Sia mai asi Amang Kasuruan owo wo maréng oka ai Sia.

⁴Anaé, ang karoro'an éra i makan, si Yesus tumulung wo muka' in juba-Na. Wo indon-Na en anduk wo ipules-Na am pinggang.

⁵Kumawus in itu ituas-Na en dano an esa loyang, wo tumo'tolo Sia mu'as ing kécéi é murit wo peran-Na in anduk si ipules am pinggang-Na.

⁶An tutuw ing gilirano ing kécéi i Simon Petrus em bu'asan, sia mamuéi a si Yesus, “Tuang, icasalé'-Mu réén mu'as ing kécéiku?”

⁷Isowat i Yesus ai sia, “Sapa en émaan-Ku anio' intarépé' ra'ipé' kailekanmu, taan kakailekanmu oka sa.”

⁸Wo icua ka'i i Petrus, “Ra'ica toro wu'asan-Mu eng kécéiku.” Icua i Yesus a si Petrus, “Sa eng kécéimu ra'ica wu'asan-Ku, ico ra'io ka'i murit-Ku.”

⁹Icua i Simon Petrus, “Tuang, sa taniitu ra'ica asaloke' ing kécéiku, taan eng kama wo en do'kosku, wu'asan ka'i mai!”

¹⁰Icua i Yesus ai sia, “Si tou ilumelé'o, en owakna imaweresio, anaé ra'io ka'i sangali mu'as waya in owakna, waya oka ing kécéina si perlu wu'asan. Wutul kamu maweresio, taan ra'ica pakasa kamu maweresio.”

¹¹Icua i Yesus in taniitu, ampa'paan kailekan-Na si séi eng kumianat oka Sia. Ampa'paan in ituo icua i Yesus, “Ra'ica pakasa kamu imaweresio.”

¹² Pakawu'asan ako i Yesus eng kécéi éra, pakén-Na sumawel en juba-Na wo Sia lumukut sumawel. Wo icua-Na ai séra, “Kaangéan réén iow sapa si niéma'-Kuo ai camu?

¹³Pengatowan iow Aku ‘Guru’ wo ‘Tuang’, si patowa miow itu wutul ampa'paan Yakuo si Guru wo Tuang.

¹⁴Anaé, sa Aku Tuang wo Guru miow imu'aso ing kécéi iow, kamu ka'i musti membu'asan angé ing kécéi.

¹⁵Ampa'paan kamu winéan-Kuo paandéan loor, anaé musti émaan iow ka'i a si esa wo sé walina, kaputé si niéma'-Kuo ai camu.

¹⁶ En ulitna icua-Ku mangé ai camu, si esa ata ra'ica lumébémai wo si tuangna, kuma'pa si esa tou ayutus ra'ica lumébémai wo si tou si mutus sia.

¹⁷Kailekano miow waya sé aisusui-Ku anio', anaé sa kiiten iow sé ipasusui-Ku, kamu kamangen oka.

¹⁸ Sapa sé aicua-Ku anio' ra'ica andumoro' icamu im baya. Kailekan-Ku si séi si sinisir-Kuo. Taan sapa sé aipatic ang Kitap Le'nas musti mamuali, aicua in tana'i: “Si tou icuman i roti mewali-wali wo Yaku, sia mamuali oka kaséké'-Ku.”

¹⁹Icua-Ku en itu ai camu intarépé', mandé ka'i en itu ra'ipé' imamuali. Wo in taniitu sa en itu mamuali sa, percayan iow oka mai sapaoka Yakuo Sia.

²⁰ En ulitna icua-Ku mangé ai camu, si séike' en tumerima si tou ayutus-Ku, sia itumerimao Yaku. Wo si séike' en tumerima Yaku, sia itumerimao si Amang Kasuruan si mutusai Yaku.”

²¹Kekawus i Yesus icumua in taniitu, en até-Na masusa keli, wo icua-Na, “En ulitna icua-Ku mangé ai camu, awéan esaan angé tou ai camu en sumarakan oka Yaku a sé kaséké'-Ku.”

²²Wo sé murit-Na mentéintengan si esa wo sé walina, wo taré séra marua-rua wasa ampa'paan ra'ica kailekan éra si séi em peangé-angén i Yesus.

²³Am bitu awéan esa murit si caupus i Yesus, sia makalukut ang kakan-Na.

²⁴Wo si Simon Petrus suméin a si murit itu, “Wuéien angé si séi em peangé-angén i Yesus itu!”

²⁵Wo si murit makalukut ang kakan i Yesus itu rumiit angé wo mamuéi ai Sia, “Tuang, si séi réén si tou itu?”

²⁶Isowat i Yesus ai sia, “Si tou si wéan-Ku oka i roti si aito'to'-Ku am paelepan, isiao si tou itu.” Makaroma' mako, wo si Yesus mindo sangate'bi' roti, ito'to'-Na mio' am paelepan, wo iwéé-Na a si Yudas toyaang i Simon Iskariot.

²⁷Keterima i Yudas i roti itu, en aténa rinasuko i kikiiten é sétang. Icua i Yesus ai sia, “Sapa si casalé'mu émaan, kala'useno taré émaan.”

²⁸Taan ra'ica wana mandé esake' tou ai séra sé makalukut makan e makailek sapa em peangé-angén i Yesus ing kumua in taniitu a si Yudas.

²⁹Ampa'paan si Yudas mengatimboi in doit éra, akar awéan sé mawerot sapaoka si Yudas airu'du' i Yesus en tumeles sapake' eng kaperluan asi endo pata'néian itu. Awéan ka'i tou mawerot sapaoka sia airu'du' i Yesus e méé roit a sé tou lengéi.

³⁰Keterima i Yudas i roti itu, sia makala'us kumesot. An tutuw itu wengio.

³¹Kekawus i Yudas imangé, rumoma'o si Yesus, “Intarépé' an témponao Aku, si Toyaang i Tou iparayo-rayo wo pasiri-siriin oka, wo ampa'paano Yaku si Amang Kasuruan iparayo-rayo wo pasiri-siriin oka.

³²Wo sa si Amang Kasuruan parayo-rayo wo pasiri-siriin ampa'paano Yaku, émaan-Na oka Aku parayo-rayo wo pasiri-siriin, wo en itu makala'us émaan-Na.”

³³ Icua ka'i i Yesus, “Éi toya-toyaang-Ku, Yaku ra'io mauré-uré mewali-wali wo icamu, wo pangérén oka miow Aku. Taan tanu sé aicua-Kuo a sé kikiiten é tou Yahudi, icua-Ku ka'i, em paangéan-Ku, kamu ra'ica icaangé am bitu.

³⁴ Kamu wéan-Ku perénta weru, meupu-upusan angé kamu. Kamu musti meupu-upusan angé, kaputé Yaku mengaupus camu.

³⁵Sa kamu meupu-upusan, kailekan oka waya é tou, sapaoka kamu murit-murit-Ku.”

³⁶Icua i Simon Petrus a si Yesus, “Tuang, am bisa réén en angéan-Mu?” Isowat i Yesus ai sia, “Em paangéan-Ku, intarépé' ico ra'ipé' makawoo kumiit Yaku. Taan asi endo oka maai sa, ko kumiit oka mangé Yaku.”

³⁷Icua i Petrus a si Yesus, “Tuang, kéitu réén aku ra'ipé' makawoo kumiit si Tuang intarépé'? Icasalé'ku maangé ang karapi-Mu mandé ka'i aku patén ampa'paan makiit Ico.”

³⁸Isowat i Yesus ai sia, “Uli-ulit réén ko masalé' maté ampa'paan Yaku? En ulitna icua-Ku ai co, si co'ko' ra'ipé' kumukuk, ico isumangkalo Yaku makatelu.”