Read Tontemboan Yohanes 15 Bible Online

Yohanes 15 - Tontemboan bible

Yohanes 15

¹Icua i Yesus a sé murit-Na, “Yakuo en tuura in anggor wutul wo si Amang-Kuo e matawoi an uma in anggor.

²Pakasa em pangana sé a Yaku sé ra'ica mengawua' pokolen-Na, wo pakasa em pangana sé a Yaku sé mengawua' weresin-Na wosama' em bua'na makaawes eng kakeli.

³Kamu tanuoka im pangana in tuura si wineresio, kamu imaweresio ampa'paan mercaya in taar sé aiwéé-Ku ai camu.

⁴Anaé, menonouo mangé meesa wo Yaku, wo Yaku ka'i meesa wo icamu. Meputé wo im pangana in anggor si ra'ica mengawua' ampa'paan ra'io ka'i meesa wo in tuurana, taniitu ka'i wo icamu. Sa kamu ra'ica menonou meesa wo Yaku, kamu ra'ica méé wua'na.

⁵Yakuo en tuura in anggor, wo icamuo em panga-panganana. Si séike' si menonou meesa wo Yaku, Yaku ka'i meesa wo isia, sia méé oka keli wua'na. Ampa'paan sa sia ra'ica meesa wo Yaku, sapa-sapake' ra'ica kaémaanna.

⁶Si séike' mangé si ra'ica menonou meesa wo Yaku, sia tanuoka im pangana si ra'ica mawua', itiya' oka wo mapera, wo li'usen oka é tou wo iténdél an untep in api wo tunun.

⁷Sa kamu menonou meesa wo Yaku wo en taar-Ku an untepo in até miow, mangileko mangé sapake' en icasalé' miow, wo teriman oka miow sé pinangilek iow.

⁸Sa kamu mua' keli, si Amang-Ku oka em parayo-rayo wo pasiri-siriin. Wo in taniitu kamu mééo tuus sapaoka icamuo sé murit-Ku.”

⁹Icua ka'i i Yesus, “Kamu icaupus-Ku kaputé si Amang mengaupus Yaku. Mentoo mio' an upus-Ku itu.

¹⁰Sa kamu le'tek mengéma-ngéma' im perénta-Ku, kamu ro'na mendam in upus-Ku, meputé Yaku le'tek mengéma-ngéma' im perénta i Amang-Ku, akar Aku mendam in upus-Na.

¹¹Pakasa en itu icua-Ku ai camu, wosama' kamu ro'na maarui meputé wo Yaku, wo eng kaaruian iow itu makakii-kiit.

¹² Si anioo em perénta-Ku: Meupu-upusano mangé kamu kaputé Yaku mengaupuso icamu.

¹³Ra'ica wana upus en lébé wangko'mai wo in upus i esa tou si méé in owakna maté en lumowir sé kara-karapina.

¹⁴Kamu itu kara-karapi-Ku, sa émaan iow sapa sé aiperénta-Ku ai camu.

¹⁵Kamu ra'io ka'i tuulen-Ku ata, ampa'paan ra'ica kailekan i ata sapa en émaan i tuangna. Taan kamu patuulen-Ku kara-karapi, ampa'paan aicua-Kuo waya ai camu sapa-sapake' sé lininga-Kuo asi Amang-Ku.

¹⁶Ra'ica icamu en isumisir Yaku, taan Yakuo en isumisir icamu mamuali murit-Ku. Kamu winéan-Kuo tawoien, wosama' kamu mangé wo méé wua'na kumeli-keli sé ra'ica maka'pu. Anaé, sapake' em pangileken iow a si Amang-Ku a ngaran-Ku, en itu iwéé-Na oka ai camu.

¹⁷Si anioo em perénta-Ku ai camu: Meupu-upusano mangé kamu si esa wo sé walina.”

¹⁸“Sa kamu icasuut é tou ang kayo'baan sé ra'ica maéman a Yaku, musti ta'néien iow sapaoka Yakuo en diorai ipasuu-suut éra.

¹⁹Sa kamu kaputé éra ra'ica maéman a Yaku, tantu kamu icaupus éra tanu tou makiit iséra. Taan ampa'paan kamu sinisir-Kuo an uner éra, kamu ra'io meputé wo iséra sé ang kayo'baan, ampa'paan in ituo séra masuut icamu.

²⁰ Ta'néieno mangé sapa sé aicua-Kuo ai camu: Si esa ata ra'ica lumébémai wo si tuangna. Sa séra imokoio Yaku, séra ka'i mokoi oka icamu. Sa émaan éra en taar-Ku, émaan éra oka ka'i sé aicua miow.

²¹Taan séra mokoi oka icamu, ampa'paan kamu makiit Yaku. Niéma' éra in taniitu ampa'paan Si Amang si mutusai Yaku ra'ica katuusan éra.

²²Sa Aku ra'ica mai ang kayo'baan wo ra'ica aicua-Ku ai séra en sususuien i Amang Kasuruan, tantu séra ra'ica perlu kumélong Yaku, anaé séra ra'ica iméma' ing kamesé-meséaan. Taan intarépé' Aku ang kayo'baano wo aicua-Kuo en sususuien itu ai séra, taan Aku aicélong érake'. Anaé, ra'ica wana alasan séra kumua sapaoka séra ra'ica méma' ing kamesé-meséaan.

²³Si séike' mangé si masuut Yaku, sia ka'i masuut si Amang-Ku.

²⁴Sa ra'ica niéma'-Ku en tuu-tuus kakaya'kaan sé ra'ica kawisa émaan é tou walina, tantu séra ra'ica iméma' ing kamesé-meséaan. Taan intarépé' mandé ka'i sinéré érao pakasa sé niéma'-Ku, taan Yaku wo Si Amang-Ku kasake' ipasuu-suut éra.

²⁵ Taan en itu mamuali wosama' en taar si aipatic ang kitap Torat musti lekepen, en aipatic tana'i: ‘Séra ra'ica wana alasan e masuut Yaku.’

²⁶Taan yutus-Ku oka ai camu si Matawang asi Amang owo. Siao si Roh Le'nas si maali icamu asi sususuien wutul andumoro' i Amang Kasuruan. An tutuw-Na i maai, Sia méé oka ing kasairian andumoro' Yaku.

²⁷Wo icamu ka'i musti méé ing kasairian a sé tou walina andumoro' Yaku, ampa'paan kamu mewali-walio wo Yaku tumo'tolke' mai asi kataré.”