Read Tontemboan Yohanes 16 Bible Online

Yohanes 16 - Tontemboan bible

Yohanes 16

¹Icua i Yesus, “Pakasa en itu aicua-Ku ai camu wosama' kamu ra'ica matapé akar kamu ra'io maéman a Yaku.

²Ampa'paan kamu ra'io ka'i iwéé é kikiiten é agama Yahudi maapo' am balé paapo'an éra. Lébé-lébé ka'i maai oka en témpona si séike' e maté icamu, pawerotenna ang karapi i méma' in taniitu niéma'nao eng kasalé'an i Amang Kasuruan.

³Émaan éra oka en itu ai camu, ampa'paan si Amang-Ku wo Yaku ka'i wutu-wutul ra'ica katuusan éra.

⁴Taan icua-Ku waya en itu ai camu, wosama' sa mai in témpona en itu mamuali, kata'néian oka miow sapaoka en itu aicua-Kuo ai camu.” “Tumo'tolke' mai asi kataré, en anio' ra'ipé' aicua-Ku ai camu ampa'paan Aku mewali-walipé' wo icamu.

⁵Taan intarépé' Aku maangém a si Amang si mutuso mai Yaku, wo ra'ica ka'i wana esaan tou ai camu e mamuéi a Yaku, am bisa em paangéan-Ku.

⁶Taan ampa'paan aicua-Kuo sapaoka Aku maangém, siituo en até miow wendu keli.

⁷Taan en aicua-Ku anio' wutul, lébé awéan eng katoronaan ai camu sa Aku maangém a si Amang, ampa'paan sa Aku ra'ica maangé, si Roh Matawang itu ra'ica kawisa maai ai camu. Taan sa Aku maangém, yutus-Ku oka mai Sia ai camu.

⁸Sa Sia mayo, ituru'-Na oka a sé tou ang kayo'baan andumoro' ing kamesé-meséaan wo andumoro' si wutul, wo andumoro' in ukuman i Amang Kasuruan si maai oka.

⁹Eng kataré, ituru' oka i Roh itu sa séra ra'ica mercaya a Yaku, siituo eng kamesé-meséaan éra.

¹⁰Karua, ituru'-Na oka ai séra sapaoka Yakuo si wutul, ampa'paan Aku maangé oka a si Amang, wo Yaku ka'i ra'io kaséréan iow.

¹¹Katelu, ituru'-Na oka a sé tou sapaoka sé tou mengaéma' ing kamesé-meséaan tantu ukumen, ampa'paan si kikiiten é sétang si cumawasa ing kayo'baan anio' aitantuo in ukumen.

¹²Keliané' woo sé icasalé'-Ku icua ai camu, taan intarépé' ra'ipé' kawooan iow in tumerima.

¹³Taan sa Sia maai, Siao e Roh si tumuru' in sususuien wutul i Amang Kasuruan, isusui-Na oka ai camu akar kailekan iow pakasa sé sususuien wutul andumoro' i Amang Kasuruan. Ampa'paan Sia ra'ica kawisa mengaroma' makiit im bewerot-Na in esa, taan Sia maroma' kumiit sapa sé lininga-Na. Wo icua-Na oka ka'i ai camu andumoro' in sapa sé mamuali sa.

¹⁴Siao oka en sumiri' wo rumayo Yaku, ampa'paan sapa sé tinerima-Na a Yaku, siituo en cua-Na oka ai camu.

¹⁵Pakasa sé anu i Amang, anu-Ku ka'i. Ampa'paan in ituo icua-Ku mangé ai camu, sapa sé tinerima-Na a Yaku siituo en icua-Na oka ai camu.”

¹⁶Icua ka'i i Yesus, “Ra'io uré en témpona Aku ra'io kaséréan iow, wo ra'io ka'i uré kaséréan oka miow Aku.”

¹⁷Kelinga é piraan murit-Na in aicua i Yesus itu, séra membum-buéian, “Icua-Na, ra'io uré ka'i en témpona Sia ra'io kaséréanta, wo ra'io ka'i uré Sia kaséréanta oka, sapa réén eng kaangéan Sia kumua in taniitu? Wo sapa eng kaangéan ka'i Sia in cumua, Sia maangé oka a si Amang?”

¹⁸Séra wo iséra membum-buéian, “Ra'io uré? Sapa eng kaangéan si aicua-Na? Ra'ica kaangéanta.”

¹⁹Kailekan i Yesus eng kasalé'an éra i mamuéi woo ai Sia, wo icua-Na ai séra, “Kamu si esa wo sé walina membum-buéian andumoro' si aicua-Ku tarépé', ‘Ra'io uré ka'i en témpona Aku ra'io kaséréan iow, wo ra'io uré ka'i Aku kaséréan oka miow.’

²⁰En ulitna icua-Ku mangé ai camu, an tutuw-Ku i maangém a si Amang, paamé'an iow oka Aku akar in sesendu'an, taan sé tou ang kayo'baan sé ra'ica maéman a Yaku maaru-arui oka. Wo kamu mawendu oka, taan eng kawenduan iow sawelan oka mai ing kaaruian.

²¹Sa si esa wéwéné tawio makéré toyaang, sia mawendu ampa'paan an témponao itouna si toyaang. Taan kekawusna i makéré toyaang, ra'io ka'i pena'né-na'néienna eng kawenduan itu. Sia arui keli ampa'paan si esa tou aitounao ang kayo'baan.

²²Tanu siituo ka'i en até miow intarépé' mawendu keli. Taan Aku meta'up oka sumawel ang karapi miow wo en até miow maarui oka, wo ra'ica wana tou e ro'na mandét ing kaaruian in até miow.

²³Wo asi endo itu, kamu ra'io ka'i sangali mamuéi sapa-sapa a Yaku. En ulitna icua-Ku mangé ai camu, sapake' em pangileken iow a si Amang-Ku a ngaran-Ku, iwéé-Na oka mai.

²⁴Akar intarépé' kamu ra'ipé' mangilek sapa-sapake' a si Amang-Ku ang karapi i ngaran-Ku. Mangileko mangé wo teriman oka miow en itu, wo kamu wutu-wutul arui.

²⁵Pakasa en anio' aicua-Kuo ai camu maké in andéan. Taan maai oka en témpona icua-Ku ai camu ra'ica ka'i maké in andéan. An tutuw itu icua-Ku oka ai camu ang karapi in da'ica ipaene-enep andumoro' i Amang-Ku.

²⁶Asi témpo itu icamu oka in esa e mangilek a si Amang ang karapi i ngaran-Ku, anaé ra'io sangali ka'i Aku mangilek a si Amang torona miow,

²⁷ampa'paan si Amang in esa mengaupus icamu. Sia mengaupus icamu, ampa'paan Aku icaupus iow wo paémanen iow sapaoka Aku mai asi Amang Kasuruan owo.

²⁸Yaku asi Amang owo, wo mai ang kayo'baan anio'. Wo intarépé' itela'u-Ku ka'i eng kayo'baan anio' wo maréng angé sumawel a si Amang-Ku.”

²⁹Wo icua é murit-Na, “Intarépé' ang karapi in da'ica ipaene-enep si Guru icumua ai cami, ra'io ka'i maké andéan.

³⁰Intarépé' kailekan ami sapaoka si Guru makailek im baya-waya, wo ra'io sangali sé tou mamuéi sapa-sapa a si Guru. Ampa'paan in ituo percayan ami si Guru imai asi Amang Kasuruan owo.”

³¹Wo isowat i Yesus ai séra, “Intarépé' uli-ulito réén percayan iow?

³²Ta'néien! Maai oka en témpona, wo an témponao kamu icasera-serar oka e maréng an tampana i esa wo i esa, wo itela'u oka miow Yaku in esa. Taan en ulitna ra'ica Yakuke' in esa, ampa'paan Si Amang mewali-wali wo Yaku.

³³Icua-Ku waya en itu ai camu, wosama' kéréan iow eng kaeluran ampa'paan meesao ang karapi-Ku. Ang kayo'baan anio' ipeta'up oka miow eng kawenduan, taan kete-ketereno mangé en até miow, ampa'paan kinala-Kuo waya eng kawasa ing kayo'baan anio'.”